ஈரானின் ஹார்முஸ் ஜலசந்தி திறக்கப்பட்டது என சற்று முன் அறிவித்தார் ரம் !

சர்வதேச அளவில் பெரும் பதற்றத்தை ஏற்படுத்தி வந்த ஹார்முஸ் ஜலசந்தி (Strait of Hormuz) இப்போது வணிகக் கப்பல்களின் போக்குவரத்துக்காக முழுமையாகத் திறக்கப்பட்டுள்ளதாக அமெரிக்க அதிபர் டொனால்ட் டிரம்ப் அதிகாரப்பூர்வமாக அறிவித்துள்ளார். இது குறித்து தனது ‘ட்ரூத் சோஷியல்’ (Truth Social) தளத்தில் பதிவிட்டுள்ள அவர், “ஈரான் இப்போதுதான் ஹார்முஸ் ஜலசந்தி முழுமையாகத் திறக்கப்பட்டுள்ளதாகவும், கப்பல் போக்குவரத்திற்குத் தயாராக இருப்பதாகவும் அறிவித்துள்ளது. இது உலகிற்கே ஒரு சிறந்த மற்றும் அற்புதமான நாள்!” என உற்சாகமாகப் பதிவிட்டுள்ளார். ஈரானின் இந்த முடிவை வரவேற்றுள்ள டிரம்ப், இனி இந்த நீர்வழிப்பாதை உலகிற்கு எதிரான ஒரு ஆயுதமாகப் பயன்படுத்தப்படாது என்றும் சூளுரைத்துள்ளார்.

லெபனான் மற்றும் இஸ்ரேல் இடையே ஏற்பட்டுள்ள 10 நாள் தற்காலிக போர் நிறுத்த ஒப்பந்தத்தைத் தொடர்ந்தே, இந்த முக்கிய நீர்வழிப்பாதையைத் திறக்க ஈரான் சம்மதித்துள்ளது. ஈரானிய வெளியுறவுத்துறை அமைச்சர் அப்பாஸ் அரக்சி இது குறித்துக் கூறுகையில், லெபனான் மீதான தாக்குதல்களை இஸ்ரேல் நிறுத்த ஒப்புக்கொண்டதால், வணிகக் கப்பல்கள் அனைத்தும் ஹார்முஸ் ஜலசந்தி வழியாகச் செல்ல அனுமதிக்கப்படும் என்றார். இருப்பினும், கப்பல்கள் அனைத்தும் ஈரானிய துறைமுக ஆணையம் வழங்கியுள்ள குறிப்பிட்ட ஒருங்கிணைந்த பாதையிலேயே (Coordinated route) பயணிக்க வேண்டும் என்ற நிபந்தனையும் விதிக்கப்பட்டுள்ளது.

ஹார்முஸ் ஜலசந்தி திறக்கப்பட்டாலும், ஈரான் மீதான அமெரிக்காவின் பிடி இன்னும் தளர்த்தப்படவில்லை. ஈரானிய துறைமுகங்களுக்குச் செல்லும் அல்லது அங்கிருந்து வரும் கப்பல்களைத் தடுத்து நிறுத்தும் அமெரிக்க கடற்படையின் முற்றுகை (Naval Blockade) “முழு வீச்சில்” தொடரும் என்று டிரம்ப் திட்டவட்டமாகத் தெரிவித்துள்ளார். அமெரிக்காவுக்கும் ஈரானுக்கும் இடையே 100% முழுமையான உடன்பாடு எட்டப்படும் வரை இந்த முற்றுகை நீடிக்கும் என்று அவர் எச்சரித்துள்ளார். இதன் மூலம் மற்ற நாடுகளின் வணிகக் கப்பல்கள் தடையின்றிச் சென்றாலும், ஈரானின் பொருளாதாரத்தை முடக்கும் நடவடிக்கைகள் தொடரும் என்பது உறுதியாகியுள்ளது.

இந்த அறிவிப்பு வெளியான சில நிமிடங்களிலேயே சர்வதேச சந்தையில் கச்சா எண்ணெய் விலையில் பெரும் சரிவு ஏற்பட்டுள்ளது. உலகத் தேவையில் ஐந்தில் ஒரு பங்கு எண்ணெய் இந்த ஜலசந்தி வழியாகவே கொண்டு செல்லப்படுவதால், அதன் திறப்பு உலகப் பொருளாதாரத்திற்குப் பெரும் நிம்மதியை அளித்துள்ளது. கச்சா எண்ணெய் விலை சுமார் 7% முதல் 10% வரை சரிந்துள்ளதால், எரிபொருள் தட்டுப்பாடு ஏற்படும் என்ற அச்சம் தற்காலிகமாக நீங்கியுள்ளது. இருப்பினும், ராணுவக் கப்பல்கள் இந்த நீர்வழிப்பாதையைப் பயன்படுத்த இன்னும் அனுமதி அளிக்கப்படவில்லை என்பது குறிப்பிடத்தக்கது.