மத்திய கிழக்கின் முக்கிய நீர்வழித்தடமான ஹார்முஸ் ஜலசந்தியை (Strait of Hormuz) ஒரு நாள் இடைவெளிக்குப் பிறகு ஈரான் மீண்டும் மூடியுள்ளதாக அறிவித்துள்ளது. அமெரிக்கா தனது கடல்வழி முற்றுகையை (Blockade) நீக்க மறுத்ததால் இந்த முடிவு எடுக்கப்பட்டதாக ஈரான் கூறியுள்ளது. இது குறித்து வெள்ளை மாளிகையில் பேசிய அதிபர் டொனால்ட் டிரம்ப், “ஈரான் மீண்டும் ஒருமுறை வேடிக்கை காட்டத் தொடங்கியுள்ளது (Got a little cute); அவர்கள் எங்களை மிரட்டிப் பணிய வைக்க முடியாது” (Can’t blackmail us) என்று ஆவேசமாகத் தெரிவித்தார். மேலும், 47 ஆண்டுகளாக எந்த அமெரிக்க அதிபரும் செய்யாத வகையில், தற்போது தான் ஈரானின் “பயங்கரவாத ஆட்சிக்கு” எதிராகக் கடுமையான நிலைப்பாட்டை எடுத்துள்ளதாகவும் அவர் குறிப்பிட்டார்.
சனிக்கிழமை (ஏப்ரல் 18, 2026) காலை ஹார்முஸ் ஜலசந்தியை கடக்க முயன்ற வணிகக் கப்பல்கள் மீது ஈரானியப் புரட்சிகரக் காவல்படையினர் (IRGC) துப்பாக்கிச் சூடு நடத்தியதாகத் தகவல்கள் வெளியாகியுள்ளன. ஓமன் அருகே சென்று கொண்டிருந்த ஒரு கச்சா எண்ணெய் டேங்கர் கப்பலை இரண்டு ஈரானியப் படகுகள் நெருங்கி, எவ்வித முன்னெச்சரிக்கையுமின்றித் துப்பாக்கியால் சுட்டதாகப் பிரிட்டன் கடல்வழிப் பாதுகாப்பு அமைப்பு (UKMTO) தெரிவித்துள்ளது. இதில் இந்தியாவிற்குச் சொந்தமான இரண்டு கப்பல்கள் உள்ளிட்ட பல வணிகக் கப்பல்கள் ஜலசந்திக்குள் நுழைய முடியாமல் பாதியிலேயே திரும்பிச் சென்றுள்ளன.
இந்தத் துப்பாக்கிச் சூடு சம்பவத்தைத் தொடர்ந்து, ஈரானியத் தூதரை நேரில் அழைத்து இந்திய வெளியுறவுத் துறை அமைச்சகம் தனது கடுமையான கண்டனத்தைப் பதிவு செய்துள்ளது. ஜலசந்தி மூடப்பட்டதால் வளைகுடா நாடுகளில் சுமார் 20,000 மாலுமிகளும், நூற்றுக்கணக்கான கப்பல்களும் சிக்கித் தவிக்கின்றனர். டிரம்ப் தனது பேச்சில், “ஈரானிடம் தற்போது கடற்படையோ, விமானப் படையோ அல்லது தகுதியான தலைவர்களோ இல்லை; அவர்களின் ஆட்சி முடிவுக்கு வந்துவிட்டது” என்று கூறி, அந்நாட்டில் ‘ஆட்சி மாற்றம்’ (Regime Change) அவசியம் என்பதை மீண்டும் வலியுறுத்தினார்.
இருப்பினும், பாகிஸ்தானின் இஸ்லாமாபாத் நகரில் அமெரிக்கா மற்றும் ஈரானிய அதிகாரிகளுக்கு இடையே ரகசியப் பேச்சுவார்த்தைகள் நடைபெற்று வருவதாகத் தெரிகிறது. “பேச்சுவார்த்தைகள் மிகச் சிறப்பாகச் சென்று கொண்டிருக்கின்றன; இன்று மாலைக்குள் நல்ல செய்தி கிடைக்கும்” என்று டிரம்ப் ஒருபுறம் நம்பிக்கையுடன் கூறினாலும், மறுபுறம் அமெரிக்கக் கடற்படை தனது முற்றுகையைத் தீவிரப்படுத்தியுள்ளது. ஈரானின் அணுசக்தி மையங்களை அழித்து அங்கிருந்து யுரேனியத்தை ஒப்படைக்காத வரை, அமெரிக்காவின் கடல்வழி முற்றுகை முழு வீச்சில் தொடரும் என்று வெள்ளை மாளிகை வட்டாரங்கள் தெரிவிக்கின்றன.
