இயக்குனர் மணிரத்னம் இயக்கத்தில், உலக நாயகன் கமல்ஹாசன் நடிப்பில் பிரம்மாண்டமாக உருவாகி வரும் ‘துக் லைஃப்’ (Thug Life) திரைப்படம், அறிவிக்கப்பட்டபடி ஜூன் 5 ஆம் திகதி திரையரங்குகளில் வெளியாகவுள்ளது! படப்பிடிப்பு விறுவிறுப்பாக நடந்து வரும் நிலையில், படத்தின் வெளியீட்டு தேதி அறிவிக்கப்பட்டு, படக்குழுவினர் தற்போது விளம்பர வேலைகளில் இறங்கியுள்ளனர்.
இதன் ஒரு பகுதியாக, ‘துக் லைஃப்’ படத்தின் டிரெய்லர் மே 17 ஆம் திகதி வெளியாகும் என்றும், படத்தின் பிரம்மாண்டமான இசை வெளியீட்டு விழா மே 24 ஆம் திகதி நடைபெறும் என்றும் சமீபத்தில் அறிவிக்கப்பட்டது. தயாரிப்பு நிறுவனமான ராஜ்கமல் ஃபிலிம்ஸ் இன்டர்நேஷனல், படக்குழுவின் விளம்பரப் பயணத்திற்கான நகரங்கள் மற்றும் கால அட்டவணையையும் வெளியிட்டு எதிர்பார்ப்பை மேலும் எகிற வைத்துள்ளது.
இந்தச் சூழலில்தான், தற்போது சமூக வலைத்தளங்களில் ஒரு காட்டுத் தீ போல வதந்தி ஒன்று பரவி, தமிழ் சினிமா ரசிகர்களை பெரும் ஆச்சரியத்தில் ஆழ்த்தியுள்ளது! அது என்னவென்றால், ‘துக் லைஃப்’ திரைப்படம், மணிரத்னம் இயக்கத்தில் 1987 ஆம் ஆண்டு வெளியாகி தமிழ் சினிமாவின் ஒரு ‘மைல்கல்லாக’ கருதப்படும் ‘நாயகன்’ படத்தின் தொடர்ச்சியாக இருக்கலாம் என்று பரவலாகப் பேசப்படுகிறது.
‘நாயகன்’ படத்தில் கமல்ஹாசன் ஏற்று நடித்த ‘சக்திவேல் நாயக்கர்’ கதாபாத்திரம், தமிழ் சினிமா வரலாற்றிலேயே மறக்க முடியாத ஒன்று. தற்போது பரவி வரும் உறுதிப்படுத்தப்படாத தகவல்களின்படி, ‘துக் லைஃப்’ படத்தின் கதையே சக்திவேல் நாயக்கரை மையமாகக் கொண்டதாம்! இறந்துவிட்டதாகக் கருதப்பட்ட நிலையில், அவர் மீண்டும் திரும்புவது, சர்வதேச அளவிலான குற்ற உலக தொடர்புகளில் ஈடுபடுவது, மற்றும் தனது மகனுடனான விரிசல் போன்ற பரபரப்பான கதைக்களத்துடன் படம் உருவாகி வருவதாகக் கூறப்படுகிறது.
இந்தத் தகவல்கள், ‘துக் லைஃப்’ திரைப்படம் ‘நாயகன்’ படத்தின் ஒரு ‘spiritual sequel’ அல்லது நேரடித் தொடர்ச்சியாக இருக்குமா என்ற பரவலான ஊகங்களுக்கு வழிவகுத்துள்ளது. மணிரத்னம் – கமல்ஹாசன் கூட்டணியில் மீண்டும் சக்திவேல் நாயக்கரின் அத்தியாயம் தொடர்ந்தால், அது தமிழ் சினிமா வரலாற்றில் ஒரு புதிய சாதனையாகப் பதிவாகும் என்பதில் சந்தேகமில்லை.
எனினும், இந்த கதை விவரங்கள் மற்றும் ‘நாயகன்’ தொடர்ச்சி என்பது குறித்த தகவல்கள் இன்னும் படக்குழுவால் அதிகாரப்பூர்வமாக அறிவிக்கப்படவில்லை. ஜூன் 5 ஆம் திகதி திரைப்படம் திரைக்கு வரும் போது அல்லது டிரெய்லர் வெளியாகும் போது இதற்கான உண்மை நிலை தெரியவருமா என்று கோலிவுட் வட்டாரமும், ரசிகர்களும் ஆவலுடன் காத்திருக்கின்றனர்!