வடகொரியாவின் உச்ச மக்கள் அவை (SPA) அண்மையில் தனது அரசியல் சாசனத்தில் மிக முக்கியமான மாற்றங்களைச் செய்துள்ளது. இதன்படி, நாட்டின் தலைமைத்துவத்திற்கு எதிராக ‘தலை துண்டிப்பு’ (Decapitation strike) போன்ற தாக்குதல்களை எதிரிகள் நடத்தினால், எவ்வித மேலதிக உத்தரவுகளும் இன்றி வடகொரியாவின் அணுஆயுத ஏவுகணைகள் எதிரி நாடுகளின் இலக்குகளைத் தானாகவே தாக்கும். கடந்த மார்ச் மாதம் ஈரானின் முக்கியத் தலைவர்கள் மீது அமெரிக்கா மற்றும் இஸ்ரேல் நடத்திய அதிரடித் தாக்குதல்களைத் தொடர்ந்தே, தனது பாதுகாப்பை உறுதி செய்ய கிம் ஜாங் உன் இந்த ‘தானியங்கி பழிவாங்கல்’ முறையைச் சட்டமாக்கியுள்ளார்.
இந்த புதிய சட்டத் திருத்தத்தின் மூலம், அணுஆயுதங்களை ஏவும் முழு அதிகாரம் அதிபர் கிம் ஜாங் உன்னிடம் மட்டுமே இருக்கும் என்றாலும், அவர் இல்லாத சூழலில் ஒரு குறிப்பிட்ட ராணுவக் கட்டமைப்பு இந்தத் தாக்குதலை முன்னெடுக்கும். “நாட்டின் தலைமையை எதிரிகள் குறிவைத்தால், அந்த நாட்டின் அழிவு உறுதி” என்பதை உலகுக்குத் தெரிவிக்கவே இந்த மாற்றம் செய்யப்பட்டுள்ளது. மேலும், தனது அரசியல் சாசனத்தில் இருந்து ‘தென்கொரியாவுடன் அமைதி மற்றும் இணைப்பு’ தொடர்பான வாசகங்களை முழுமையாக நீக்கியுள்ள வடகொரியா, தென்கொரியாவை தனது ‘நிரந்தர எதிரி’ நாடாகவும் அதிகாரப்பூர்வமாக அறிவித்துள்ளது.
அமெரிக்காவின் செயற்கைக்கோள் கண்காணிப்பு மற்றும் நவீன ஏவுகணைத் தாக்குதல்களுக்குப் பயந்து, கிம் ஜாங் உன் தனது இருப்பிடங்களை அடிக்கடி மாற்றி வருகிறார். தற்போது கொண்டு வரப்பட்டுள்ள இந்த ‘தானியங்கி அணுத்தாக்குதல்’ விதி, கிம் கொல்லப்பட்டாலும் வடகொரியாவின் அணுஆயுத பலம் குறையாது என்பதை நிரூபிக்கிறது. இது தென்கொரியா மற்றும் ஜப்பான் போன்ற அண்டை நாடுகளுக்குப் பெரும் அச்சுறுத்தலாக மாறியுள்ளது. ஒருவேளை தவறுதலாகச் சமிக்ஞைகள் கிடைத்தால் கூட, இது உலகப் போருக்கு வழிவகுக்கும் என சர்வதேச ராணுவ வல்லுநர்கள் எச்சரிக்கின்றனர்.
வடகொரியாவின் இந்தத் தீவிர நிலைப்பாடு, ஆசியப் பிராந்தியத்தில் அணுஆயுதப் போர் ஏற்படுவதற்கான வாய்ப்பை அதிகரித்துள்ளது. “அணுஆயுத நாடு” என்ற அந்தஸ்திலிருந்து பின்வாங்கப் போவதில்லை என்று திட்டவட்டமாகத் தெரிவித்துள்ள கிம், ரஷியாவுடனான ராணுவ உறவையும் பலப்படுத்தி வருகிறார். ஒரு நாட்டின் அதிபர் படுகொலை செய்யப்பட்டால், ஒட்டுமொத்த பிராந்தியத்தையும் அழிக்கும் வகையில் சட்டம் இயற்றியிருப்பது நவீன உலக வரலாற்றில் இதுவே முதல் முறையாகும். கிம் ஜாங் உன்னின் இந்த ‘அணுஆயுத வஞ்சினம்’ உலக அரங்கில் பெரும் விவாதங்களைக் கிளப்பியுள்ளது.
