நியூயார்க் நகர மேயர் ஜோரன் மம்தானியின் அதிகாரப்பூர்வ இல்லமான ‘கிரேசி மேன்ஷன்’ (Gracie Mansion) பகுதிக்கு வெளியே நேற்று (மார்ச் 7) நடைபெற்ற போராட்டங்களின் போது, தீப்பற்றிய நிலையில் இருந்த சந்தேகத்திற்கிடமான சில கருவிகள் வீசப்பட்டதால் பரபரப்பு ஏற்பட்டது. இஸ்லாமிய எதிர்ப்புப் போராட்டம் மற்றும் அதற்கு எதிராக நடைபெற்ற மற்றொரு போராட்டம் என இரு குழுக்களுக்கிடையே மோதல் ஏற்பட்டபோது, இந்த அசம்பாவிதம் நிகழ்ந்தது. இந்தச் சம்பவத்தில் ஈடுபட்டதாகக் கருதப்படும் இருவர் உட்பட, போராட்டத்தின் போது ஏற்பட்ட வன்முறைகளுக்காக மொத்தம் ஆறு பேரை நியூயார்க் நகர காவல்துறையினர் (NYPD) கைது செய்துள்ளனர்.
இந்தச் சம்பவம் குறித்து நியூயார்க் காவல்துறை ஆணையர் ஜெசிகா டிஷ் விளக்கமளிக்கையில், கருப்பு டேப் மற்றும் ஃபியூஸ் (fuse) மூலம் இணைக்கப்பட்ட ஜாடிகளில் நட்ஸ், போல்ட் மற்றும் ஸ்க்ரூக்கள் நிரப்பப்பட்டிருந்த இந்தக் கருவிகள், கையெறி குண்டுகளைப் போல வடிவமைக்கப்பட்டிருந்ததாகத் தெரிவித்தார். இக்கருவிகள் வெடிக்கும் திறன் கொண்டதா அல்லது போலி சாதனங்களா என்பது குறித்த மேலதிக தடயவியல் சோதனைகள் நடைபெற்று வருகின்றன. அதிர்ஷ்டவசமாக, இச்சம்பவத்தில் யாருக்கும் எந்தவித காயங்களும் ஏற்படவில்லை என்றும், அப்பகுதியில் தொடர்ந்து தீவிரக் கண்காணிப்பு மேற்கொள்ளப்பட்டு வருவதாகவும் காவல்துறை தரப்பில் தெரிவிக்கப்பட்டுள்ளது.
இஸ்லாமிய வெறுப்புப் பிரச்சாரத்திற்கு எதிராக நடைபெற்ற எதிர் போராட்டத்தின் போது, 18 வயது இளைஞர் ஒருவர் இந்தக் கருவிகளைப் போராட்டக்காரர்களை நோக்கி வீசியதாகவும், பின்னர் மற்றொரு கருவியுடன் தப்பி ஓட முயன்ற போது காவல்துறையினரால் பிடிக்கப்பட்டதாகவும் காவல்துறை கூறியுள்ளது. மேயர் ஜோரன் மம்தானி மற்றும் அவரது குடும்பத்தினர் சம்பவத்தின் போது இல்லத்திற்குள் பாதுகாப்பாக இருந்ததாகவும், மேயர் மற்றும் அவரது மனைவியின் பாதுகாப்புக்கு எவ்வித பாதிப்பும் ஏற்படவில்லை என்றும் உறுதிப்படுத்தப்பட்டுள்ளது. இந்தச் சம்பவம் அமெரிக்காவில் நிலவும் தற்போதைய அரசியல் பதற்றங்களுக்கிடையே பெரும் அதிர்ச்சியை ஏற்படுத்தியுள்ளது.
இந்தக் குழப்பமான சூழல் குறித்து நியூயார்க் ஆளுநர் கேத்தி ஹோச்சூல் கண்டனம் தெரிவித்துள்ளார். ஜனநாயக ரீதியான போராட்டங்களுக்கு உரிமையுண்டு என்றாலும், வன்முறையையோ அல்லது வெறுப்புணர்வையோ சகித்துக்கொள்ள முடியாது என்று அவர் திட்டவட்டமாகக் கூறியுள்ளார். மேலும், இந்தச் சம்பவம் ஈரானுடனான தற்போதைய சர்வதேச போர் பதற்றங்களுடன் தொடர்புடையது அல்ல என்று காவல்துறை தெளிவுபடுத்தியுள்ளது. இருப்பினும், எஃப்.பி.ஐ (FBI) மற்றும் பயங்கரவாத தடுப்புப் பிரிவு அதிகாரிகள் இந்த வழக்கை உன்னிப்பாகக் கவனித்து விசாரணை நடத்தி வருகின்றனர்.
