தமிழக சட்டமன்றத் தேர்தல் முடிவுகளுக்குப் பிறகு, நடிகர் ரஜினிகாந்த் முன்னாள் முதல்வர் மு.க.ஸ்டாலினை நேரில் சந்தித்துப் பேசினார். இந்த சந்திப்பு அரசியல் ரீதியாகப் பெரும் விவாதத்தைக் கிளப்பியது. குறிப்பாக, தமிழக வெற்றிக் கழகத் தலைவர் விஜய் ஆட்சி அமைப்பதைத் தடுக்க திமுக – அதிமுக இடையே ரஜினிகாந்த் ‘தூது’ சென்றதாகச் சமூக வலைதளங்களில் வதந்திகள் பரவின. இதற்குப் பதிலடி கொடுத்துள்ள ரஜினிகாந்த், “ஸ்டாலின் எனது 40 கால நண்பர்; தேர்தலில் அவர் தோல்வியடைந்தது எனக்கு வருத்தத்தை அளித்தது. ஒரு நண்பனாகவே அவரைச் சந்தித்தேன். மற்றபடி, இரு கட்சிகளுக்கு இடையே உடன்படிக்கை செய்ய நான் ஒன்றும் ‘மூன்றாம் தரமான’ ஆள் கிடையாது” என்று காட்டமாகத் தெரிவித்துள்ளார்.
மேலும், புதிய முதல்வர் விஜய் குறித்துப் பேசிய அவர், “விஜய் சாதித்தது மிகப்பெரிய விஷயம். மத்தியில் ஆளும் பாஜக மற்றும் தமிழகத்தின் இரு பெரும் திராவிடக் கட்சிகளை எதிர்த்து நின்று அவர் வெற்றி பெற்றுள்ளார். இது எம்.ஜி.ஆர், என்.டி.ஆர் ஆகியோரின் சாதனைகளை விடவும் பெரியது” என்று புகழாரம் சூட்டியுள்ளார். விஜய்க்கும் எனக்கும் 25 ஆண்டுகள் வயது வித்தியாசம் உள்ளது; நான் அரசியலில் இல்லாத போது அவர் மீது நான் ஏன் பொறாமைப்பட வேண்டும்? என்றும் அவர் கேள்வி எழுப்பியுள்ளார். விஜய்யின் ஆட்சியை விமர்சிக்கக் குறைந்தது இரண்டு ஆண்டுகளாவது அவருக்குக் கால அவகாசம் வழங்க வேண்டும் என்றும் ரஜினி வேண்டுகோள் விடுத்துள்ளார்.
ரஜினிகாந்தின் இந்தச் சந்திப்பு மற்றும் விளக்கத்திற்கு திமுக தரப்பிலிருந்து உடனடி எதிர்வினைகள் வந்துள்ளன. திமுக-வின் மூத்த தலைவர்கள் கூறுகையில், “ரஜினிகாந்த் மற்றும் ஸ்டாலின் இடையேயான நட்பு அரசியல் கடந்தது என்பதை நாங்கள் அறிவோம். தேர்தல் தோல்வியின் போது அவர் காட்டிய ஆறுதல் ஒரு நல்ல நண்பருக்குரியது. ஆனால், அதிமுக-வுடன் இணைவது போன்ற பேச்சுக்களுக்கு இடமே இல்லை; திமுக ஒருபோதும் தனது கொள்கையில் சமரசம் செய்து கொள்ளாது” என்று தெரிவித்துள்ளனர். ரஜினியின் நேர்மையான விளக்கத்தை திமுக ஆதரவாளர்கள் வரவேற்றுள்ள அதே வேளையில், அவர் விஜய்யைப் புகழ்ந்திருப்பதை அரசியல் நகர்வாகவும் சிலர் பார்க்கின்றனர்.
60 ஆண்டுகால திராவிடக் கட்சிகளின் ஆட்சிக்குப் பிறகு ஒரு மாற்றம் தேவை என்று மக்கள் நினைத்திருக்கலாம் என ரஜினி குறிப்பிட்டிருப்பது கவனிக்கத்தக்கது. “விஜய் மீது எனக்கு எந்த வருத்தமும் இல்லை, அவர் மீது மிகப்பெரிய எதிர்பார்ப்பு உள்ளது, அவருக்கு எனது வாழ்த்துகள்” என்று ரஜினி கூறியிருப்பது தவெக தொண்டர்களிடையே உற்சாகத்தை ஏற்படுத்தியுள்ளது. தமிழக அரசியலில் அடுத்தடுத்த அதிரடி மாற்றங்கள் நிகழ்ந்து வரும் வேளையில், சூப்பர் ஸ்டாரின் இந்த ‘பிரஸ் மீட்’ தேவையற்ற யூகங்களுக்கு முற்றுப்புள்ளி வைத்துள்ளது.
