சிறுவர்கள் இனி சிறைக்குச் செல்ல வேண்டாம்! ;பிரிட்டனில் புதிய சட்டச் சீர்திருத்தம்!

பிரிட்டனின் நீதித்துறை அமைச்சராகப் (Justice Secretary) பொறுப்பேற்றுள்ள டேவிட் லாமி, அந்நாட்டு நாடாளுமன்றக் கூட்டத்தொடர் நிறைவடைவதற்குள் சிறைவாசத்தில் இருக்கும் சிறார்களின் எண்ணிக்கையை 25 சதவீதம் வரை குறைக்க இலக்கு நிர்ணயித்துள்ளார். இந்த புதிய சீர்திருத்தத்தின் கீழ், 18 வயதுக்குட்பட்ட இளம் குற்றவாளிகளின் வாழ்நாள் குற்றப் பதிவுகள் (Lifelong criminal records) குறித்தான மறுபரிசீலனை, புதிய சிறார் தலையீடு நீதிமன்றங்கள் (Youth intervention courts) மற்றும் சிறுவர்களைக் குற்றச் செயல்களில் ஈடுபடுத்தும் பெற்றோருக்கு எதிரான கடுமையான பொறுப்புக்கூறல் நடவடிக்கைகள் ஆகியவை கொண்டுவரப்பட உள்ளன.

அமைச்சர் டேவிட் லாமி இந்தச் சீர்திருத்தங்களுக்குப் பின்னால் உள்ள தனது சொந்த வாழ்க்கைப் பின்னணியை மிகவும் உருக்கமாகப் பகிர்ந்துள்ளார். 1980-களில் லண்டனின் டாடன்ஹாம் (Tottenham) பகுதியில் நடுத்தரக் குடும்பத்தில் வளர்ந்தபோது, தானும் ஒரு கறுப்பினச் சிறுவன் என்பதால் எந்த நேரத்திலும் சிறைக்குச் செல்ல நேரிடலாம் என்ற அச்சம் எப்போதும் தமக்குள் இருந்ததாகக் குறிப்பிட்டுள்ளார். பல சிறுவர்கள் பள்ளிகளைப் புறக்கணித்து, தவறான நண்பர்களின் சேர்க்கையால் சிறு குற்றங்களில் ஈடுபட்டு, மிக எளிதாகச் சிறை முறைமைக்குள் தள்ளப்படுவதைக் கண்முன்னே பார்த்ததாகவும், கல்வி உதவித்தொகை கிடைத்ததால் மட்டுமே தாம் அந்தச் சூழலில் இருந்து தப்பியதாகவும் அவர் நெகிழ்ச்சியுடன் தெரிவித்துள்ளார்.

மிகக் குறுகிய காலச் சிறைத்தண்டனைகள் கூட சிறார்களின் எதிர்காலத்தை முற்றிலுமாகச் சிதைத்து, அவர்களை மேலும் வன்முறையாளர்களாகவும், பெரிய குற்றவாளிகளாகவும் மாற்றும் ஆபத்து இருப்பதாக பிரிட்டன் நீதித்துறை சுட்டிக்காட்டியுள்ளது. கடுமையான குற்றங்களைச் செய்தவர்களுக்குச் சிறைத்தண்டனை என்பது பொதுமக்களின் பாதுகாப்பிற்கு அவசியமானது என்றாலும், எளிய குற்றங்களைச் செய்யும் சிறார்களை நல்வழிப்படுத்த ஆண்டுதோறும் 15 மில்லியன் பவுண்டுகள் (சுமார் ₹150 கோடிக்கும் அதிகம்) சிறப்பு நிதி ஒதுக்கப்படவுள்ளது. இதன் மூலம் சிறார்களைக் குற்றங்களில் ஈடுபடுத்தும் பெரியவர்களுக்கு எதிரான சட்டங்கள் கடுமையாக்கப்பட உள்ளன.

பிரிட்டனின் சிறார் நல ஆணையர் ரேச்சல் டி சௌசா இந்த வரலாற்றுச் சிறப்புமிக்க சட்டச் சீர்திருத்தங்களுக்குத் தனது முழுமையான ஆதரவைத் தெரிவித்துள்ளார். சிறார்களைச் சிறைகளில் அடைத்துத் தண்டிப்பதை விட, சமூக அளவிலான சீர்திருத்தப் பயிற்சிகளை வழங்கி அவர்களின் நடத்தையில் அர்த்தமுள்ள மாற்றங்களை ஏற்படுத்துவதே இந்தத் திட்டத்தின் முதன்மை நோக்கம் என்று அவர் பாராட்டியுள்ளார். இந்தச் சமூக அடிப்படையிலான தண்டனை முறைகள் (Community sentences) மூலம் பிரிட்டனின் ஒட்டுமொத்த இளம் கைதிகளின் எண்ணிக்கை விரைவில் 20 சதவீதம் வரை குறையும் என்று எதிர்பார்க்கப்படுகிறது.