ஆப்பிரிக்க நாடான காங்கோ குடியரசில் (DRC) மிக வீரியமிக்க ‘புந்திபுகியோ’ (Bundibugyo) வகை எபோலா வைரஸ் நோய் மிகத் தீவிரமாகப் பரவி வருகிறது. இந்த கொடிய நோய்த்தொற்றால் இதுவரை 220-க்கும் மேற்பட்டோர் பரிதாபமாக உயிரிழந்துள்ளதாகவும், 900-க்கும் அதிகமானோர் தீவிரப் பாதிப்புகளுடன் மருத்துவமனைகளில் அனுமதிக்கப்பட்டுள்ளதாகவும் உலக சுகாதார அமைப்பின் (WHO) தலைமை இயக்குநர் டெட்ரோஸ் அதானோம் கெப்ரேயேசுஸ் அதிகாரப்பூர்வமாக கவலை தெரிவித்துள்ளார். நிலைமை மிக வேகமாக மோசமடைந்து வருவதால், சர்வதேசக் கவலைக்குரிய பொதுச் சுகாதார அவசரநிலையாக (PHEIC) இதனை உலக சுகாதார அமைப்பு பிரகடனப்படுத்தியுள்ளது
இந்த எபோலா அலை காங்கோவின் அண்டை நாடான உகாண்டாவிற்கும் பரவியுள்ளதால் சர்வதேச அளவில் பெரும் பதற்றம் ஏற்பட்டுள்ளது. உகாண்டா தலைநகர் கம்பாலாவில் இதுவரை 7 பேருக்கு எபோலா பாதிப்பு உறுதி செய்யப்பட்டுள்ளதுடன், அங்கு ஒரு மரணமும் பதிவாகியுள்ளது. எபோலா பாதிப்பைக் கண்டறிவதில் ஏற்பட்ட பெரும் தாமதமே இந்த வைரஸ் மிகக் குறுகிய காலத்தில் அசுர வேகத்தில் பரவியதற்குக் காரணம் என்றும், தற்போது தடுப்புப் பணிகளில் ஈடுபட்டுள்ள மருத்துவக் குழுவினர் வைரஸ் பரவலுக்குப் பின்னால் ஓடிப் பிடிக்கும் “கேட்ச்-அப்” (Catch-up) நிலையில் தவித்து வருவதாகவும் உலக சுகாதார அமைப்பு சுட்டிக்காட்டியுள்ளது.
தற்போது பரவி வரும் புந்திபுகியோ வகை எபோலா வைரஸிற்கு எதிராகப் பயன்படுத்த உலகளவில் அங்கீகரிக்கப்பட்ட தடுப்பூசிகளோ (Approved Vaccines) அல்லது குறிப்பிட்ட மருந்து சிகிச்சைகளோ இதுவரை கண்டறியப்படவில்லை என்பது நிலைமையை மேலும் சிக்கலாக்கியுள்ளது. இதனால், பாதிக்கப்பட்டவர்களைத் தனிமைப்படுத்துதல் மற்றும் அவர்களோடு தொடர்பில் இருந்தவர்களைக் கண்டறிதல் (Contact Tracing) போன்ற பாரம்பரியப் பொதுச் சுகாதார உத்திகள் மட்டுமே தற்போதைய ஒரே ஆயுதமாக உள்ளன. இதற்கிடையே, ஆக்ஸ்போர்டு பல்கலைக்கழக விஞ்ஞானிகள் இதற்கான புதிய தடுப்பூசியை உருவாக்கும் பணியில் தீவிரமாக ஈடுபட்டுள்ளதாகவும், அடுத்த 2 முதல் 3 மாதங்களில் அதன் மருத்துவப் பரிசோதனைகள் தொடங்கலாம் என்றும் தகவல் வெளியாகியுள்ளது.
காங்கோவின் இதூரி மற்றும் வட கிவு போன்ற தீவிரவாதம் மற்றும் உள்நாட்டுப் போர் மலிந்த பகுதிகளில் இந்த எபோலா பரவல் மையம்கொண்டுள்ளதால், அங்கு மருத்துவப் பணிகளை மேற்கொள்வது பெரும் சவாலாக மாறியுள்ளது. எபோலா மரணங்களின் போது அதிகாரிகள் கடைப்பிடிக்கும் கடுமையான அடக்க விதிமுறைகளால் ஆத்திரமடைந்த உள்ளூர் மக்கள், அங்குள்ள இரண்டு எபோலா சிகிச்சை மையங்களைத் தீயிட்டுக் கொளுத்தியுள்ள அதிர்ச்சிச் சம்பவங்களும் அரங்கேறியுள்ளன. சமூக வலைதளங்களில் பரவும் தவறான வதந்திகள் மற்றும் மக்களின் அவநம்பிக்கை காரணமாகத் தடுப்பு நடவடிக்கைகள் முடங்கியுள்ள சூழலில், எபோலா பரவல் கட்டுக்குள் வருவதற்கு முன்பாக நிலைமை இன்னும் மோசமடையும் என உலக நாடுகள் எச்சரிக்கப்பட்டுள்ளன.
