புகழ்பெற்ற திருச்செந்தூர் சுப்பிரமணியசுவாமி கோயிலில் ஒட்டுமொத்த ஆன்மீகப் பக்தர்களையும் அதிர்ச்சியில் உறைய வைத்துள்ள ஒரு திடுக்கிடும் லஞ்ச விவகாரம் அம்பலமாகியுள்ளது. தமிழக இந்து சமய அறநிலையத்துறை அமைச்சர் எஸ். ரமேஷ், சாதாரணப் பக்தரைப் போல கருப்பு நிற டி-சர்ட் மற்றும் முகக்கவசம் (Mask) அணிந்து கோயிலுக்குள் ரகசிய ஆய்வு மேற்கொண்டார். அப்போது அமைச்சரின் உதவியாளர் விரைவு விஐபி தரிசனத்திற்கு வழி கேட்க, அங்கு நின்ற அர்ச்சகர் அய்யப்பன் அய்யர் அமைச்சரவை உறுப்பினர் என்று அறியாமல், ஒரு நபருக்கு தலா ₹1,000 வீதம் 4 பேருக்கு ₹4,000 லஞ்சம் கேட்டுள்ளார். கையில் போதிய பணம் இல்லை என்று கூறியதும், “ஜி-பேயில் (Google Pay) அனுப்புங்கள்” என்று கூறி டிஜிட்டல் முறையில் லஞ்சப் பணத்தைப் பெற்று உலுக்கியுள்ளார் அந்த அர்ச்சகர்.
இந்த அதிரடி லஞ்ச வேட்டையின் பின்னணியில் ஒரு சுவாரசியமான திட்டமிடல் இருந்துள்ளது. உண்மையில் அமைச்சர் ரமேஷ் மதுரையில் உள்ள ஒரு கோயிலுக்குச் செல்லவே திட்டமிட்டிருந்தார். ஆனால், தரிசன முறைகேடுகள் மற்றும் பக்தர்களிடம் கூடுதல் பணம் வசூலிப்பது குறித்த புகார்களைத் தொடர்ந்து, தன் பயணத் திட்டத்தை திடீரென மாற்றிவிட்டு அதிகாலையிலேயே தனியார் காரில் திருச்செந்தூருக்குப் புறப்பட்டார். அரசு அதிகாரிகள், உள்ளூர் போலீஸ் பாதுகாப்பு என யாருக்கும் எந்தவிதத் தகவலும் தெரிவிக்காமல் ரகசியமாக உள்ளே நுழைந்ததால், லஞ்சப் பேர்வழிகள் அமைச்சரிடமே கை நீட்டி வசமாகச் சிக்கிக் கொண்டனர். பின்னர் வந்தவர் அமைச்சர் என்பதை உணர்ந்துகொண்ட அர்ச்சகர்கள் உடனடியாக மன்னிப்புக் கடிதம் மற்றும் விளக்கங்களை எழுதிக் கொடுத்துக் காலில் விழாத குறையாகக் கதறியுள்ளனர்.
இருப்பினும், பக்தர்களைச் சுரண்டும் இத்தகைய செயல்களுக்குத் தடா போடும் வகையில், அமைச்சரின் நேரடி உத்தரவின் பேரில் அறநிலையத்துறை அதிரடியான அதிரடி நடவடிக்கைகளை எடுத்துள்ளது. முறைகேடாகப் பணம் பெற்ற அர்ச்சகர் அய்யப்பன் அய்யர், மறு உத்தரவு வரும் வரை கோயிலுக்குள் எவ்வித பூஜையும் செய்யத் தடை விதிக்கப்பட்டு, உடனடியாகப் பணியிடை நீக்கம் (Suspension) செய்யப்பட்டுள்ளார். மேலும், அர்ச்சகருக்கு உடந்தையாக இருந்து, பணம் பெற்றுக்கொண்டு முறைகேடாகப் பக்தர்களை உள்ளே அனுமதித்த சண்முக விலாசம் முகப்புப் பாதுகாப்புப் பணியில் இருந்த கருப்பசாமி மற்றும் தோப்பு ஆகிய இரண்டு முன்னாள் ராணுவ வீரர்களும் பாதுகாப்புப் பணியில் இருந்து அதிரடியாக விடுவிக்கப்பட்டு சஸ்பெண்ட் செய்யப்பட்டுள்ளனர்.
கோயிலுக்குள் நடந்த இந்தச் சுத்திகரிப்பு நடவடிக்கை இத்துடன் நின்றுவிடவில்லை. மொட்டை அடிக்கும் முடி காணிக்கைச் செலுத்தும் இடத்தில், ஏழைப் பக்தர்களிடம் கட்டாயப் பணம் வசூலிப்பதாக வந்த புகாரை அடுத்து, அங்கேயும் மின்னல் வேக ஆய்வு நடத்தப்பட்டது. இதில் பக்தர்களிடம் சட்டவிரோதமாகப் பணம் கேட்டுக் கறாராக வசூலில் ஈடுபட்ட மேலும் இரண்டு ஊழியர்களைத் தற்காலிகப் பணியிடை நீக்கம் செய்து துறை ரீதியான கடுமையான உத்தரவு பிறப்பிக்கப்பட்டுள்ளது. இனி வரும் காலங்களில் இதுபோன்ற முறைகேடுகளில் ஈடுபடுபவர்கள் யாராக இருந்தாலும் அவர்கள் மீது கடுமையான கிரிமினல் நடவடிக்கை பாயும் என அறநிலையத்துறை எச்சரித்துள்ளதுடன், இந்த அதிரடி ஆக்ஷன் ஒட்டுமொத்த தமிழகக் கோயில் வட்டாரங்களிலும் பெரும் பரபரப்பை ஏற்படுத்தியுள்ளது.
