அமெரிக்க அதிபர் டொனால்ட் டிரம்ப் நிர்வாகத்தால் கொண்டு வரப்பட்ட சர்ச்சைக்குரிய 1.8 பில்லியன் டாலர் மதிப்புள்ள ‘அரசியல் பழிவாங்கல் தடுப்பு நிதிக்கு’ (Anti-Weaponization Fund) அமெரிக்க கூட்டாட்சி நீதிமன்றம் தற்காலிகத் தடை விதித்துள்ளது. வர்ஜீனியா மாகாணத்தின் மாவட்ட நீதிபதியான லியோனி பிரின்கேமா இந்த அதிரடி உத்தரவைப் பிறப்பித்துள்ளார். டிரம்ப் அரசின் இந்த நிதி ஒதுக்கீட்டு நடவடிக்கைக்கு எதிராகத் தொடரப்பட்ட வழக்கினை விசாரித்த நீதிபதி, நீதிமன்றத்தின் அடுத்தகட்ட உத்தரவு வரும் வரை இந்த நிதியிலிருந்து யாருக்கும் பணம் விநியோகிக்கப்படக் கூடாது என்று திட்டவட்டமாகத் தெரிவித்துள்ளார்.
டிரம்ப் தனது வருமான வரி விவரங்கள் கசிந்தது தொடர்பாக, உள்நாட்டு வருவாய் சேவை (IRS) துறைக்கு எதிராகத் தொடர்ந்த வழக்கைத் திரும்பப் பெறுவதற்காக நீதித்துறை மூலமாக இந்த நிதி உருவாக்கப்பட்டது. ஜோ பைடன் அரசாங்கத்தின் போது தங்களுக்கு எதிராக நடத்தப்பட்ட அரசியல் பழிவாங்கல் மற்றும் பாரபட்சமான விசாரணைகளால் பாதிக்கப்பட்ட டிரம்ப்பின் ஆதரவாளர்களுக்கு இழப்பீடு வழங்குவதே இந்த நிதியின் நோக்கம் என்று டிரம்ப் நிர்வாகம் தரப்பில் கூறப்பட்டது. நாட்டின் சுதந்திர ஆண்டைக் குறிக்கும் வகையில் $1.776 பில்லியன் (சுமார் 1.8 பில்லியன்) ஆக இந்த நிதித் தொகை நிர்ணயிக்கப்பட்டிருந்தது.
இருப்பினும், இந்த நிதிக்கு அமெரிக்காவின் இரு கட்சிகளைச் சேர்ந்த அரசியல்வாதிகள் மற்றும் சட்ட வல்லுநர்களிடமிருந்து கடுமையான எதிர்ப்புகள் கிளம்பின. குறிப்பாக, கடந்த ஜனவரி 6, 2021 அன்று அமெரிக்க நாடாளுமன்றக் கட்டிடத்தின் மீது தாக்குதல் நடத்திய டிரம்ப் ஆதரவாளர்களுக்குப் பொதுமக்களின் வரிப்பணத்தைச் சட்டவிரோதமாக வாரி வழங்குவதற்காக உருவாக்கப்பட்ட “ரகசிய அரசியல் நிதி” (Slush Fund) இதுவென்று ஜனநாயகக் கட்சியினர் மற்றும் சில குடியரசுக் கட்சி உறுப்பினர்களும் குற்றம் சாட்டினர். இந்த நிதியானது வெளிப்படைத்தன்மை அற்றது என்றும், டிரம்ப்பின் அரசியல் கூட்டாளிகளுக்கு வெகுமதி அளிப்பதற்காகவே வடிவமைக்கப்பட்டுள்ளது என்றும் கூறி ‘டெமாக்ரசி ஃபார்வர்ட்’ என்ற சட்ட அமைப்பு நீதிமன்றத்தில் வழக்கு தொடர்ந்தது.
இந்த வழக்கின் தீவிரத்தன்மையை ஆராய்ந்த நீதிபதி லியோனி பிரின்கேமா, பொதுமக்களின் பணம் இவ்வாறு தன்னிச்சையாக விநியோகிக்கப்படுவதைத் தடுக்க இடைக்காலத் தடை அவசியம் என்று கூறினார். மேலும், இந்த விவகாரம் குறித்து முழுமையான விசாரணை நடத்த ஜூன் 12 ஆம் தேதிக்கு நீதிமன்றம் நாள் குறித்துள்ளது. அமெரிக்க நீதித்துறையின் தற்காலிக அட்டர்னி ஜெனரலான டாட் பிளான்ச் இந்த நிதி அமைப்பை நியாயப்படுத்தி வந்த நிலையில், நீதிமன்றத்தின் இந்தத் தற்காலிகத் தடை உத்தரவு டொனால்ட் டிரம்ப் நிர்வாகத்திற்குப் பின்னடைவாகக் கருதப்படுகிறது.
