மத்திய கென்யாவில் உள்ள லாய்கிபியா (Laikipia) விமானப்படை தளத்தில், 50 படுக்கை வசதிகளுடன் இந்த தற்காலிக மருத்துவமனையை அமெரிக்க ராணுவம் கட்டமைத்திருந்தது. ஆப்பிரிக்காவில் எபோலா தொற்றால் பாதிக்கப்படும் அமெரிக்கர்களை அமெரிக்க மண்ணிற்குள் கொண்டு வராமல், இங்கேயே தனிமைப்படுத்தி கண்காணிக்க டிரம்ப் அரசு முடிவெடுத்திருந்தது. இதற்காக கென்யாவின் எபோலா தடுப்புப் பணிகளுக்கு 13.5 மில்லியன் டாலர் நிதியுதவி வழங்குவதாக அமெரிக்க வெளியுறவுத்துறை அமைச்சர் மார்கோ ரூபியோ அறிவித்திருந்தார். அமெரிக்கா தனது சொந்த குடிமக்களைத் தாய்நாட்டிற்குள் அனுமதிக்க மறுத்து, ஆப்பிரிக்க நாடான கென்யாவைப் பகடைக்காயாகப் பயன்படுத்துவதாக இந்தத் திட்டம் பெரும் சர்ச்சையைக் கிளப்பியது.
இந்த ரகசிய உடன்படிக்கைக்கு எதிராகக் கென்யாவின் அரசியலமைப்பு உரிமைகளுக்கான ‘கதிபா இன்ஸ்டிடியூட்’ (Katiba Institute) மற்றும் கென்யா சட்டச் சங்கம் ஆகிய அமைப்புகள் நீதிமன்றத்தில் பொதுநல வழக்கு தொடர்ந்தன. மக்களின் உயிர் வாழும் உரிமை, பொது சுகாதாரப் பாதுகாப்பு மற்றும் நாடாளுமன்ற ஒப்புதல் இன்றி தன்னிச்சையாக இந்த முடிவு எடுக்கப்பட்டுள்ளதாக அவர்கள் குற்றம் சாட்டினர். மேலும், இத்தகைய மிக மோசமான வைரஸ் தொற்றைக் கையாளுவதற்குக் கடுமையான உயிரியல் பாதுகாப்பு உள்கட்டமைப்புகள் (high-containment infrastructure) கென்யாவில் இல்லை என்றும், இதனால் உள்ளூர் மக்களுக்குப் பாதிப்பு ஏற்படும் என்றும் வாதாடப்பட்டது.
அரசாங்கத்தின் இந்த முடிவுக்குக் கென்ய மருத்துவர்கள் மற்றும் சுகாதாரப் பணியாளர்கள் சங்கமும் (KMPDU) கடுமையான எதிர்ப்பைப் பதிவு செய்து, 48 மணி நேர வேலைநிறுத்த எச்சரிக்கை விடுத்திருந்தது. “அமெரிக்காவிற்கு ஆபத்தானது என்றால், அது கென்யாவிற்கும் ஆபத்தானதுதான்; எங்களை அமெரிக்காவின் குப்பைத் தொட்டியாக (dumping ground) மாற்றக் கூடாது” என்று மருத்துவ சங்கத் தலைவர் தேவ்ஜி அதெல்லா கொதித்தெழுந்தார். பொதுமக்களின் பலத்த எதிர்ப்பை அடுத்து, இந்த வழக்கின் அடுத்தகட்ட விசாரணை ஜூன் 2 ஆம் தேதிக்கு ஒத்திவைக்கப்பட்டு, அதுவரை இந்த மையத்தை இயக்கக் கூடாது என நீதிமன்றம் முட்டுக்கட்டை போட்டுள்ளது.
