மத்திய கிழக்கில் அமெரிக்கா மற்றும் இஸ்ரேல் முன்னெடுத்து வரும் ஆபரேஷன் எபிக் பியூரி (Operation Epic Fury) போரின் ஒரு பகுதியாக, ஈரானின் மிகப்பெரிய பெருமையான ‘ஷாஹித் பாகேரி’ (Shahid Bagheri) எனும் ட்ரோன் தாங்கிக் கப்பலை அமெரிக்கப் படைகள் தாக்கி அழித்துள்ளன. 40,000 டன் எடையுள்ள இந்த பிரம்மாண்ட கப்பல், ஈரானின் ட்ரோன் மற்றும் ஹெலிகாப்டர் தாக்குதல்களுக்கான ஒரு ‘நடமாடும் தளம்’ (Mothership) ஆகும். பெண்டகன் வெளியிட்டுள்ள தகவலின்படி, இந்தக் கப்பல் தாக்கப்பட்டதில் அது பெரும் தீப்பற்றி எரிந்து கடலில் மூழ்கியுள்ளது. ஈரானியக் கடற்படையை முற்றிலுமாக முடக்கி, அவர்களைக் கடலில் இருந்து அகற்றும் அமெரிக்காவின் லட்சியத்தில் இது ஒரு மிகப்பெரிய வெற்றியாகக் கருதப்படுகிறது.
ஈரானின் இந்த ட்ரோன் தாங்கிக் கப்பல் சமீபத்தில் தான் சேவையில் இணைக்கப்பட்டது. இதில் 180 மீட்டர் நீளமுள்ள ஓடுபாதை மற்றும் அதிநவீன ஏவுகணைகள் பொருத்தப்பட்டிருந்தன. அமெரிக்காவின் யுஎஸ்எஸ் ஆபிரகாம் லிங்கன் (USS Abraham Lincoln) விமானம் தாங்கிக் கப்பலைத் தாக்கி மூழ்கடித்துவிட்டதாக ஈரான் பொய்ப் பிரச்சாரம் செய்த நிலையில், அதற்குப் பதிலடியாக அமெரிக்கா இந்தக் கப்பலைத் தகர்த்துள்ளது. “ஈரானிடம் தற்போது ஒரு கப்பல் கூடச் செயல்பாட்டில் இல்லை; அவர்களது கடற்படைத் தலைமையகம் சிதைக்கப்பட்டுவிட்டது” என்று அமெரிக்க மத்திய கட்டளையகம் (CENTCOM) அதிரடியாக அறிவித்துள்ளது.
இந்தத் தாக்குதல் ஈரானின் ராணுவக் கட்டமைப்பிற்கு விழுந்த பேரிடியாகும். ஏற்கனவே ஈரானின் உயர்மட்டத் தலைவர்கள் மற்றும் ஏவுகணைத் தளங்கள் தாக்கப்பட்ட நிலையில், இந்தக் கப்பல் அழிப்பு ஈரானின் வான்வழித் தாக்குதல் திறனைப் பாதியாகக் குறைத்துள்ளது. ஈரானின் மற்றொரு முக்கிய கப்பலான ‘IRIS Makran‘ எனும் தளமும் பாந்தர் அப்பாஸ் (Bandar Abbas) துறைமுகத்தில் வைத்துத் தாக்கப்பட்டதைச் செயற்கைக்கோள் புகைப்படங்கள் உறுதி செய்துள்ளன. இதன் மூலம், ஈரானின் 47 ஆண்டுகாலக் கடற்படை ஆதிக்கம் தற்போது முடிவுக்கு வந்துள்ளது.
தற்போதைய நிலவரப்படி, சுமார் 20-க்கும் மேற்பட்ட ஈரானியப் போர்க்கப்பல்கள் மற்றும் ஒரு நீர்மூழ்கிக் கப்பலை அமெரிக்கா கடலில் மூழ்கடித்துள்ளது. இலங்கை கடற்பரப்பில் ஈரானியப் போர்க்கப்பல் மூழ்கடிக்கப்பட்ட சம்பவத்தைத் தொடர்ந்து, தற்போது இந்த ட்ரோன் தாங்கிக் கப்பல் சிதைக்கப்பட்டுள்ளது. “ஈரானியப் படைகள் தங்கள் ஆயுதங்களைக் கீழே போட்டுவிட்டுச் சரணடைய வேண்டும்; இல்லையேல் அவர்கள் கடலின் அடியில் தான் இருப்பார்கள்” என்று அதிபர் டொனால்ட் டிரம்ப் கடுமையாக எச்சரித்துள்ளார். இந்தப் போரின் வேகம் ஈரானை ஒரு மிகப்பெரிய அரசியல் மற்றும் ராணுவ வீழ்ச்சியை நோக்கித் தள்ளியுள்ளது.
