ஆஸ்திரேலிய சிட்னி பயங்கரவாதத் தாக்குதலின் ‘ஹீரோ’ அகமது அல் அகமது அதிரடி கைது!

ஆஸ்திரேலியாவின் சிட்னி நகரில் உள்ள போண்டி பீச் (Bondi Beach) பகுதியில் கடந்த 2025 டிசம்பரில் நடந்த கொடூரமான துப்பாக்கிச் சூடு பயங்கரவாதத் தாக்குதலின் போது, உயிரைப் பணயம் வைத்து பயங்கரவாதியை வீழ்த்திப் பல டஜன் உயிர்களைக் காப்பாற்றிய ‘தேசிய ஹீரோ’ அகமது அல் அகமது (Ahmed al Ahmed) தற்போது ஆஸ்திரேலிய போலீசாரால் அதிரடியாகக் கைது செய்யப்பட்டுள்ளார். உலக அளவில் பாராட்டுகளைப் பெற்ற ஒரு நபர், தற்போது ஒரு குற்றவழக்கில் சிக்கியிருப்பது ஆஸ்திரேலியா மட்டுமின்றி சர்வதேச ஊடகங்களிலும் பெரும் அதிர்ச்சியை ஏற்படுத்தியுள்ளது.

நியூ சவுத் வேல்ஸ் (NSW) மாகாண போலீசார் வெளியிட்டுள்ள அதிகாரப்பூர்வ அறிக்கையின்படி, 44 வயதான அகமது அல் அகமது, சிட்னியின் தென்மேற்குப் பகுதியில் உள்ள பேங்க்ஸ்டவுன் (Bankstown) என்ற இடத்தில் வசிக்கும் தனது சொந்தத் தந்தையைக் கழுத்தைப் பிடித்து நெரித்துத் தாக்கியதாகக் (Headlock) குற்றம் சாட்டப்பட்டுள்ளது. கடந்த மார்ச் மாத தொடக்கத்தில் குடும்பத் தகராறு காரணமாக இந்தச் சம்பவம் நடந்ததாகக் கூறப்படும் நிலையில், தீவிர விசாரணைக்குப் பிறகு அவர் மீது சாதாரணத் தாக்குதல் (Common Assault) மற்றும் குடும்ப வன்முறை, மிரட்டல் ஆகிய பிரிவுகளின் கீழ் போலீசார் வழக்குப் பதிவு செய்துள்ளனர்.

முன்னதாக, போண்டி பீச் பகுதியில் யூதர்களின் ஹனுக்கா (Hanukkah) பண்டிகை கொண்டாட்டத்தின் போது ஐஎஸ்ஐஎஸ் (ISIS) ஆதரவு பயங்கரவாதிகள் நடத்திய துப்பாக்கிச் சூட்டில் 15 பேர் உயிரிழந்தனர். அப்போது சிரிய வம்சாவளியைச் சேர்ந்த அகமது அல் அகமது, துப்பாக்கியுடன் நின்றிருந்த பயங்கரவாதியைத் தைரியமாகத் தாக்கி அவரிடமிருந்த துப்பாக்கியைப் பறித்து பல உயிர்களைக் காப்பாற்றினார். இந்த மோதலில் அவருக்குப் பலத்த துப்பாக்கிக் காயம் ஏற்பட்டுப் பல அறுவை சிகிச்சைகள் செய்யப்பட்டன. ஆஸ்திரேலிய பிரதமர் அந்தோணி அல்பானீஸ் இவரை நேரில் சந்தித்துப் பாராட்டியதுடன், இவருக்காகப் பொதுமக்களிடம் இருந்து நிதி திரட்டப்பட்டு சுமார் 3 மில்லியன் டாலர் (சுமார் ₹25 கோடி) நிதியுதவியும் வழங்கப்பட்டது குறிப்பிடத்தக்கது.

இந்த பிரம்மாண்ட நிதி உதவி கிடைத்ததைத் தொடர்ந்து, கடந்த மாதம் அகமதுவின் சொந்த சகோதரர்கள் இருவர் அவரிடமிருந்து பணத்தைப் பறிக்க முயன்று மிரட்டல் விடுத்த வழக்கில் கைதாகினர். அந்தத் தொடர் குடும்பப் பிரச்சனை மற்றும் பணப் பஞ்சாயத்துகளின் பின்னணியிலேயே தற்போதைய தந்தை மீதான தாக்குதல் சம்பவமும் அரங்கேறியுள்ளது என்று உள்ளூர் ஊடகங்கள் தெரிவிக்கின்றன. ஆனால் தன் மீதான இந்தக் குற்றச்சாட்டுகள் முற்றிலும் “பொய்யானவை” என்று அகமது அல் அகமது மறுத்துள்ளார். இந்த வழக்கு தொடர்பாக வரும் ஜூலை 29-ஆம் தேதி அவர் பேங்க்ஸ்டவுன் நீதிமன்றத்தில் ஆஜராக உத்தரவிடப்பட்டுள்ளது.