தமிழக அரசியல் களம் தற்போது பெரும் பரபரப்பை சந்தித்து வருகிறது. தமிழக சட்டப்பேரவைத் தேர்தலில் பெரும்பான்மை இடங்களைப் பெறாத தமிழக வெற்றிக் கழகம் (தவெக), சில கட்சிகளின் ஆதரவுடன் ஆட்சியைப் பிடித்துள்ளது. இந்த நிலையில், சட்டப்பேரவையில் அண்மையில் நடைபெற்ற நம்பிக்கை வாக்கெடுப்பின் போது அதிமுகவைச் சேர்ந்த 25 எம்எல்ஏக்கள் அரசுக்கு ஆதரவாக வாக்கு செலுத்தினர். இது தமிழக அரசியலில் பெரும் அதிர்வலைகளை ஏற்படுத்திய நிலையில், தற்போது அடுத்த கட்ட நடவடிக்கைகள் தீவிரமடைந்துள்ளன.
அரசுக்கு ஆதரவளித்த 25 அதிமுக எம்எல்ஏக்களில் 21 பேர் தாங்கள் செய்த செயலுக்கு வருத்தம் தெரிவித்து மீண்டும் அதிமுக பொதுச்செயலாளர் எடப்பாடி பழனிசாமி முன்னிலையில் தாய் கழகத்திற்கே திரும்பினர். அவர்களை மன்னித்துவிட்டதாக எடப்பாடி பழனிசாமி அறிவித்ததை அடுத்து, அந்த 21 பேர் மீதும் தகுதிநீக்க நடவடிக்கை எதுவும் எடுக்கப்படாது என்று சட்டப்பேரவைத் தலைவர் ஜே.சி.டி. பிரபாகரன் அதிகாரப்பூர்வமாக அறிவித்துவிட்டார். இதனால் அவர்களின் பதவிகளுக்கு தற்காலிகமாக ஆபத்து நீங்கியுள்ளது.
ஆனால், மீதமுள்ள ஜெயக்குமார், இசக்கி சுப்பையா, மரகதம் குமரவேல் மற்றும் சத்யபாமா ஆகிய 4 அதிமுக எம்எல்ஏக்களும் தங்களது பதவிகளை ராஜிநாமா செய்துவிட்டு முறைப்படி முதல்வர் விஜய் தலைமையிலான தவெக கட்சியில் இணைந்தனர். இவர்கள் மீது அதிமுக தரப்பில் அளிக்கப்பட்ட கட்சித் தாவல் தடைச் சட்டத்தின் கீழ் தொடரப்பட்ட புகார்கள் இன்னமும் நிலுவையில் உள்ளன. ராஜிநாமா செய்திருந்தாலும், அவர்கள் மீதான சட்டரீதியான நடவடிக்கைகள் தொடரும் என சபாநாயகர் முன்பே தெளிவுபடுத்தியிருந்தார்.
இந்நிலையில், ராஜிநாமா செய்த அந்த 4 முன்னாள் எம்எல்ஏக்களுக்கும் சட்டப்பேரவைத் தலைவர் ஜே.சி.டி. பிரபாகரன் தற்போது அதிரடியாக நோட்டீஸ் அனுப்பியுள்ளார். அதில், “நீங்கள் ஏன் எம்எல்ஏ பதவியை ராஜிநாமா செய்தீர்கள்? உங்கள் மீது கட்சித் தாவல் தடைச் சட்டத்தின் கீழ் ஏன் உரிய நடவடிக்கை எடுக்கக் கூடாது?” என்று கேள்வி எழுப்பப்பட்டுள்ளது. மேலும், இந்த நோட்டீஸிற்கு அடுத்த 7 நாட்களுக்குள் அவர்கள் விரிவான விளக்கம் அளிக்க வேண்டும் என்றும் சபாநாயகர் உத்தரவிட்டுள்ளார்.
