உலகில் மிகவும் தனிமைப்படுத்தப்பட்ட மற்றும் சர்வாதிகார நாடாகக் கருதப்படும் வடகொரியாவின் அதிபர் கிம் ஜாங் உன்னை (Kim Jong Un) கடவுள் போலப் போற்றி வணங்கும் ‘ரசிகர் மன்றம்’ ஒன்று பிரிட்டனில் (UK) செயல்பட்டு வரும் அதிர்ச்சித் தகவல் வெளியாகியுள்ளது. சர்வதேச ஊடகங்களால் ‘பருமனான சர்வாதிகாரி’ (Tubby Tyrant) என்று விமர்சிக்கப்படும் கிம்மின் ‘துணிச்சலை’ பாராட்டி, பிரிட்டனைச் சேர்ந்த ஒரு சிறிய குழுவினர் இந்த விசித்திரமான வழிபாட்டு முறையைப் பின்பற்றி வருகின்றனர். ‘பிரிட்டிஷ் கொரிய நட்பு சங்கம்’ (KFA UK) மற்றும் ‘ஜூச்சே சித்தாந்த ஆய்வுக் குழு’ என்ற பெயர்களில் லண்டனை மையமாகக் கொண்டு இந்த வலையமைப்பு இயங்கி வருகிறது.
லண்டனின் முக்கியப் பகுதிகளில் மாதந்தோறும் கூடும் இந்த பிரிட்டன் ஆதரவாளர்கள், வடகொரிய தூதரக அதிகாரிகளுடன் நெருங்கிய தொடர்பில் இருந்து வருகின்றனர். இந்த சந்திப்புகளின் போது, வடகொரியாவின் புரட்சிகரப் பேச்சுகளை வாசிப்பது, அந்நாட்டின் பிரச்சாரத் திரைப்படங்களை (Propaganda films) பார்ப்பது மற்றும் கிம் ஜாங் உன்னுக்கு ஆதரவாக வாழ்த்துச் செய்திகளை அனுப்புவது போன்றவற்றை இவர்கள் வழக்கமாகக் கொண்டுள்ளனர். 64 வயதான ஓய்வு பெற்ற பிரிட்டன் அரசு ஊழியர் டெர்மொட் ஹட்சன் (Dermot Hudson) மற்றும் கம்யூனிச இசையமைப்பாளர் மைக்கோல் சாண்ட் (Michael Chant) ஆகியோர் இந்த விசித்திரக் குழுவை முன்னின்று நடத்தி வருகின்றனர்.
வடகொரியாவில் லட்சக்கணக்கான மக்கள் பட்டினியால் வாடுவதும், அங்குள்ள கடுமையான சிறை முகாம்களில் மனித உரிமை மீறல்கள் நடப்பதும் ஐநா (UN) அறிக்கைகள் மூலம் நிரூபிக்கப்பட்டுள்ளது. ஆனால், இந்த பிரிட்டன் ரசிகர் மன்றத்தினர் அந்த கசப்பான உண்மைகளை முற்றிலும் மறுக்கின்றனர். “மேற்கத்திய நாடுகள் வடகொரியாவை ஒரு சர்வாதிகார நாடாகச் சித்தரித்து அவதூறு பிரச்சாரம் செய்கின்றன” என்று வாதிடும் இவர்கள், கிம் ஜாங் உன் மக்களின் விருப்பத்தைப் பிரதிபலிக்கும் ஒரு சிறந்த தலைவர் என்றும், அவரது அணுஆயுதத் துணிச்சல் அமெரிக்க ஏகாதிபத்தியத்திற்கு எதிரானது என்றும் புகழ்ந்து தள்ளுகின்றனர்.
இந்த விசித்திரமான வழிபாட்டுக் குழுவில் உள்ள முக்கிய நிர்வாகிகள் ஏற்கனவே 20-க்கும் மேற்பட்ட முறை வடகொரியாவிற்குப் பயணம் மேற்கொண்டு அந்நாட்டு அரசின் சிறப்பு உபசாரங்களைப் பெற்றுள்ளனர். இவர்கள் பிரிட்டன் இளைஞர்களைக் கவர்ந்து தங்களது அமைப்பில் இணைக்க இலவச உணவு மற்றும் பயணச் செலவுகளை வழங்குவதாகவும் தகவல்கள் அம்பலமாகியுள்ளன. சொந்த நாட்டில் ஜனநாயகச் சுதந்திரத்தை அனுபவித்துக் கொண்டே, உலகின் மிகக் கொடூரமான சர்வாதிகார ஆட்சியை நியாயப்படுத்தி, ஒரு மாறுபட்ட வழிபாட்டை லண்டன் மண்ணில் இவர்கள் நடத்தி வருவது தற்போது சர்வதேச அளவில் விவாதப் பொருளாக மாறியுள்ளது.
