விஜய் தொலைக்காட்சியின் பிக் பாஸ் தமிழ் சீசன் 8 நிகழ்ச்சியின் மூலம் பிரபலமான நடிகை வர்ஷினி வெங்கட், 26 வயது இளைஞர் ஒருவரை மிரட்டி ரூ.5 லட்சம் ரொக்கம் மற்றும் செல்போன்களைப் பறித்ததாகக் கூறப்படும் புகாரின் அடிப்படையில் சென்னை கிண்டி காவல் துறையினரால் அதிரடியாகக் கைது செய்யப்பட்டுள்ளார்.
சென்னையைச் சேர்ந்த 26 வயது இளைஞர் ஒருவர், குறும்படம் (Short Film) தயாரிப்பதற்காகத் தன்னை முதலீடு செய்யச் சொல்லி வர்ஷினி வெங்கட் வாக்குறுதி அளித்ததாகக் கிண்டி காவல் நிலையத்தில் புகார் அளித்துள்ளார். அதனை நம்பி அவர் ரூ.5 லட்சம் பணம் கொடுத்த நிலையில், நீண்ட நாட்களாகக் குறும்படப் பணிகள் தொடங்கப்படாமல் இருந்துள்ளது. இதையடுத்துத் தான் கொடுத்த பணத்தைத் திரும்பக் கேட்டபோது, கடந்த ஆகஸ்ட் 22 அன்று அவரைப் பேச அழைத்த வர்ஷினி மற்றும் அவரது கூட்டாளிகள், அவரைத் தாக்கி 2 செல்போன்கள் மற்றும் ரூ.50,000 ரொக்கத்தைப் பறித்துக் கொண்டதாகத் தெரிகிறது.
அதன் பிறகும் தொலைபேசி வாயிலாகத் தொடர்ந்து மிரட்டல் விடுத்து, ரூ.5 லட்சம் வரை பறித்ததுடன், மேலும் ரூ.25 லட்சம் பணம் தராவிட்டால் பொய் வழக்கில் சிக்க வைப்பதாக மிரட்டியதாகப் பாதிக்கப்பட்ட இளைஞர் புகாரில் குறிப்பிட்டுள்ளார். புகாரின் தீவிரத் தன்மையைக் கருத்தில் கொண்டு வழக்குப் பதிவு செய்த கிண்டி காவல்துறையினர், வர்ஷினி வெங்கட், சஞ்சய் உட்பட 4 பேர் மீது தாக்குதல், பணப்பறிப்பு, ஏமாற்றுதல் மற்றும் கொலை மிரட்டல் உள்ளிட்ட 4 சட்டப் பிரிவுகளின் கீழ் வழக்குப் பதிவு செய்தனர்.
இதனைத் தொடர்ந்து, நடிகை வர்ஷினி வெங்கட்டை காவல்துறையினர் கைது செய்து தீவிர விசாரணை மேற்கொண்டு வருகின்றனர். குறும்படத் தயாரிப்பு பெயரில் நடைபெற்ற இந்த பணப்பறிப்புச் சம்பவத்தின் பின்னணியில் வேறு யாரேனும் பின்னணியாகச் செயல்பட்டார்களா என்பது குறித்தும், பிடிபட்டுள்ள கூட்டாளிகளிடம் காவல்துறையினர் தீவிர விசாரணை நடத்தி வருகின்றனர். பிக் பாஸ் பிரபலம் ஒருவர் பண மோசடி மற்றும் மிரட்டல் வழக்கில் கைது செய்யப்பட்டுள்ள சம்பவம் திரையுலகினர் மற்றும் ரசிகர்கள் மத்தியில் பெரும் அதிர்ச்சியை ஏற்படுத்தியுள்ளது.
