தமிழக சட்டமன்றத் தேர்தலில் நடிகர் விஜய் தலைமையிலான தமிழக வெற்றிக் கழகம் (தவெக) அமோக வெற்றி பெற்று, தற்போது ஆட்சியைப் பிடித்துள்ளது. முதலமைச்சர் விஜய் தலைமையில் புதிய அரசு அமைந்து, அமைச்சரவை விரிவாக்கப் பணிகளும் தீவிரமாக நடந்து வரும் நிலையில், கட்சியின் பொதுச்செயலாளர் புஸ்ஸி ஆனந்த் தவெக தொண்டர்கள் மற்றும் நிர்வாகிகளுக்கு மிகக் கடுமையான எச்சரிக்கை ஒன்றை விடுத்துள்ளார். தவெகவினர் அனைவரும் தங்களது எல்லையை அறிந்து, பொதுமக்களுக்கும் அரசு அதிகாரிகளுக்கும் எவ்வித இடையூறும் இன்றி கண்ணியத்துடன் செயல்பட வேண்டும் என்று அவர் திட்டவட்டமாகக் குறிப்பிட்டுள்ளார்.
கட்சியின் தலைமை அலுவலகத்திலிருந்து மாவட்ட, ஒன்றிய, நகர மற்றும் கிளைக் கழக நிர்வாகிகளுக்கு அனுப்பப்பட்டுள்ள அவசர சுற்றறிக்கையில் இந்த அறிவுறுத்தல்கள் வழங்கப்பட்டுள்ளன. அதில், தவெக ஆட்சிப் பொறுப்பேற்றுள்ள இந்தச் சூழ்நிலையில், கட்சியின் பெயரையோ அல்லது கட்சிப் பதவிகளையோ பயன்படுத்தி எவரும் தன்னிச்சையான அதிகார மையங்களாகச் செயல்படக் கூடாது என்று புஸ்ஸி ஆனந்த் எச்சரித்துள்ளார். குறிப்பாக அரசு அலுவலகங்கள், காவல் நிலையங்கள் மற்றும் பொது இடங்களுக்குச் செல்லும்போது கட்சியின் மாண்பைக் குலைக்கும் வகையில் எவ்வித செயல்பாடுகளிலும் ஈடுபடக் கூடாது என உத்தரவிடப்பட்டுள்ளது.
ஆட்சி அதிகாரம் கைக்கு வந்துவிட்டது என்ற மிதப்பில், சில இடங்களில் உள்ளூர் நிர்வாகிகள் வரம்பு மீறிச் செயல்படுவதாகத் தலைமைக்கு புகார்கள் வந்துள்ள பின்னணியிலேயே இந்த அதிரடி நடவடிக்கை எடுக்கப்பட்டுள்ளது. “நம்மை மக்கள் உற்று நோக்கிக் கொண்டிருக்கிறார்கள். தலைவர் விஜய்யின் நற்பெயருக்குக் களங்கம் விளைவிக்கும் வகையில் யாராவது செயல்பட்டால், அவர்கள் எவ்வளவு பெரிய பொறுப்பில் இருந்தாலும் கட்சியின் அடிப்படை உறுப்பினர் தகுதியிலிருந்து உடனடியாக நீக்கப்படுவார்கள்” என்று புஸ்ஸி ஆனந்த் தனது அறிக்கையில் மிகக் காரசாரமாக எச்சரித்துள்ளார்.
மேலும், தவெக நிர்வாகிகள் அனைவரும் அரசு நிர்வாகத்திற்கு முழு ஒத்துழைப்பு வழங்கி, மக்கள் நலத்திட்டங்கள் அடித்தட்டு மக்களைச் சென்றடைய மட்டுமே உதவ வேண்டும் என்று அறிவுறுத்தப்பட்டுள்ளது. எளிய பின்னணியைக் கொண்டவர்கள் அமைச்சர்களாகப் பொறுப்பேற்றுள்ள இந்தச் சூழலில், தொண்டர்களின் இத்தகைய ஒழுக்கமே தவெக அரசின் நீண்ட கால வெற்றிக்கு அடித்தளமாக அமையும் என்றும், தலைவரின் கட்டளையை ஏற்று அனைவரும் கட்டுப்பாட்டுடன் மக்கள் பணியாற்ற வேண்டும் என்றும் அந்த அறிக்கையில் வலியுறுத்தப்பட்டுள்ளது.
