அமெரிக்காவின் பிலடெல்பியா நகரில் திகில் திரைப்பட பாணியில் ‘சாக்கி’ (Chucky) பொம்மை முகமூடி அணிந்த மர்ம நபர் ஒருவர் பொதுமக்களை அச்சுறுத்தி வரும் சம்பவம் பெரும் பரபரப்பை ஏற்படுத்தியுள்ளது. சிட்டி ஹால் பகுதியில் உலா வரும் இந்த நபர், சாலையில் நடந்து செல்வோரையும் நடைபயிற்சி (Jogging) மேற்கொள்பவர்களையும் திடீரென துரத்திச் சென்று பயமுறுத்தி வருகிறான்.
இந்த நபர் சாலையில் சென்ற பெண் ஒருவரை மறித்து, “நீ சாகத் தயாரா?” (Are you ready to die?) என்று மிரட்டும் தொனியில் கேட்டதாக காவல்துறை தெரிவித்துள்ளது. இந்த கொடூரமான செயல் குறித்த வீடியோ ஆதாரங்கள் சமூக வலைதளங்களில் பரவி, அப்பகுதி மக்களிடையே பெரும் பீதியை கிளப்பியுள்ளது.
சம்பவம் நடந்த இடத்தில் உள்ள கண்காணிப்பு கேமராக்கள் மூலம் பதிவு செய்யப்பட்ட காட்சிகளை ஆய்வு செய்து வரும் காவல்துறையினர், அந்த மர்ம நபரை தீவிரமாக தேடி வருகின்றனர். அவர் வெறும் குறும்புத்தனத்திற்காக இப்படி செய்கிறாரா அல்லது ஏதேனும் அசம்பாவிதத்தை திட்டமிடுகிறாரா என்ற கோணத்திலும் விசாரணை தீவிரப்படுத்தப்பட்டுள்ளது.
பொதுமக்கள் நடமாட்டம் மிகுந்த பகுதியில் நடந்த இந்த சம்பவம், அக்கம் பக்கத்தினரிடையே பாதுகாப்பின்மையை உருவாக்கியுள்ளது. இரவு மற்றும் அதிகாலை வேளைகளில் வெளியில் செல்பவர்கள் கூடுதல் எச்சரிக்கையுடன் இருக்குமாறு உள்ளூர் தகவல்கள் அறிவுறுத்துகின்றன.
