‘நேஷனல் கிரஷ்’ என ரசிகர்களால் கொண்டாடப்படும் நடிகை ரஷ்மிகா மந்தனா, தான் ‘ஹைதராபாத்தைச் சேர்ந்தவள்’ என்று சமீபத்தில் ஒரு நிகழ்ச்சியில் கூறிய கருத்து, பெரும் சர்ச்சையை ஏற்படுத்தி சமூக வலைத்தளங்களில் கடும் எதிர்ப்பைச் சந்தித்து வருகிறது. ரஷ்மிகா, கர்நாடக மாநிலம் கொடகு மாவட்டத்தில் உள்ள விராஜ்பேட்டையைச் சேர்ந்தவர் என்பது குறிப்பிடத்தக்கது.
ரஷ்மிகா நடிப்பில் வெளியான ‘சாவா’ என்ற இந்திப் படத்தின் விளம்பர நிகழ்ச்சியில் அவர் பேசிய வீடியோ ஒன்று வைரலாகி வருகிறது. அதில், “நான் ஹைதராபாத்தைச் சேர்ந்தவள், நான் இங்கு தனியாக வந்தேன், இப்போது நானும் உங்கள் குடும்பத்தில் ஒருவர் என்று நினைக்கிறேன், நன்றி” என்று ரஷ்மிகா கூறினார்.
இந்தக் கருத்து கன்னட ரசிகர்களிடையே பெரும் கொந்தளிப்பை ஏற்படுத்தியுள்ளது. சமூக வலைத்தளங்களில் பலரும் ரஷ்மிகாவை கடுமையாக விமர்சித்து வருகின்றனர். “விராஜ்பேட்டை, கொடகு மாவட்டம் ஹைதராபாத்தில் உள்ளதா?”, “சொந்த ஊரை மறந்துவிட்டாயா?”, “வெற்றி கிடைத்தவுடன் சொந்த ஊரையே மாற்றிவிடுவார்களா?” என்று கேள்விகளை எழுப்பி வருகின்றனர்.
ரஷ்மிகா மந்தனா கன்னடத் திரைப்படமான ‘கிரிஷ் பார்ட்டி’ மூலம் திரையுலகில் அறிமுகமானார். பின்னர் தெலுங்கு திரையுலகில் நுழைந்து பெரும் புகழ்பெற்றார். ‘புஷ்பா’ போன்ற வெற்றிப் படங்கள் அவரை தேசிய அளவில் பிரபலமாக்கின. பல ஆண்டுகளாகவே, கன்னட ரசிகர்கள் சிலர், ரஷ்மிகா தனது பூர்வீகத்தைப் புறக்கணிப்பதாகக் குற்றம் சாட்டி வருகின்றனர்.
இந்தச் சம்பவம், ரஷ்மிகாவுக்கு முதல் முறையல்ல. இதற்கு முன்னரும், தன்னை திரையுலகில் அறிமுகப்படுத்திய தயாரிப்பு நிறுவனத்தின் பெயரை ஒரு நேர்காணலில் குறிப்பிடத் தவறியதற்காகவும் அவர் கடுமையாக விமர்சிக்கப்பட்டார். அப்போதும், சமூக வலைத்தளங்களில் அவரது படங்களைப் புறக்கணிக்க வேண்டும் என்ற கோரிக்கைகள் எழுந்தன.
இந்த முறை ரஷ்மிகாவுக்கு எதிராக கடுமையான விமர்சனங்கள் எழுந்தாலும், சிலர் அவருக்கு ஆதரவாகவும் கருத்து தெரிவித்து வருகின்றனர். “அவர் தற்போது ஹைதராபாத்தில் வசிக்கிறார், அதனால்தான் அப்படிச் சொல்லியிருக்கலாம்” என்றும், “கன்னட மக்களால் தொடர்ந்து ட்ரோல் செய்யப்படுவதால், அவர் இந்த முடிவை எடுத்திருக்கலாம்” என்றும் சிலர் வாதிடுகின்றனர். ரஷ்மிகா தனது சொந்த ஊரான கொடகுவைப் பற்றி பலமுறை பேசியுள்ள பழைய வீடியோக்களையும் சில ரசிகர்கள் பகிர்ந்து வருகின்றனர்.
ரஷ்மிகாவின் இந்தக் கருத்து, அவர் தனது தொழில் வாழ்க்கையின் முன்னேற்றத்திற்காக தெலுங்கு மற்றும் இந்தி ரசிகர்களைக் கவர முயற்சிக்கிறார் என்றும், இது ஒரு ‘திறமையான தொழில்முறை முடிவு’ என்றும் சிலர் கருதுகின்றனர்.
இந்தச் சர்ச்சை, ரஷ்மிகா மந்தனாவை மீண்டும் ஒருமுறை சமூக வலைத்தளங்களில் முக்கிய பேசுபொருளாக்கியுள்ளது.
