தமிழக சட்டமன்றத் தேர்தலில் தமிழக வெற்றிக் கழகத் தலைமையிலான கூட்டணி அமோக வெற்றி பெற்று, மே 10-ஆம் தேதி அக்கட்சியின் தலைவர் சி. ஜோசப் விஜய் புதிய முதலமைச்சராகப் பதவியேற்றார். அதனைத் தொடர்ந்து அண்மையில் அமைச்சரவை விரிவாக்கமும் வெற்றிகரமாக நிறைவடைந்தது. இந்த நிலையில், புதிய அரசு பொறுப்பேற்ற பிறகு அரசு முறைப் பயணமாக முதன்முறையாக முதலமைச்சர் விஜய் நாட்டின் தலைநகரான புதுடெல்லிக்குச் செல்லத் திட்டமிட்டுள்ளார். அங்கு அவர் பிரதமர் நரேந்திர மோடியை நேரில் சந்தித்துப் பேச உள்ளதாகக் கோட்டை வட்டாரங்கள் தெரிவிக்கின்றன.
தமிழக முதலமைச்சராகப் பொறுப்பேற்றுள்ள நடிகர் விஜய்க்குப் பிரதமர் நரேந்திர மோடி ஏற்கனவே தனது வாழ்த்துகளைத் தெரிவித்திருந்தார். அதற்குத் தனது எக்ஸ் (X) சமூக வலைதளப் பக்கத்தின் வாயிலாக முதல்வர் விஜய் நன்றியும் கூறியிருந்தார். இந்த சுமுகமான அரசியல் சூழலில், டெல்லியில் உள்ள பிரதமரின் அதிகாரப்பூர்வ இல்லத்தில் இந்த சந்திப்பு நடைபெற உள்ளது. முதலமைச்சராகப் பதவியேற்ற பிறகு பிரதமரைச் சந்திப்பது ஒரு மரபு சார்ந்த அரசு நடைமுறை என்றாலும், தற்போதைய அரசியல் சூழலில் இந்த சந்திப்பு மிக முக்கியமானதாகப் பார்க்கப்படுகிறது.
இந்த சந்திப்பின் போது, தமிழகத்தின் வளர்ச்சித் திட்டங்கள் மற்றும் மாநிலத்திற்குத் தேவையான மத்திய அரசின் நிதி ஒதுக்கீடுகள் குறித்துப் பிரதமர் மோடியிடம் முதல்வர் விஜய் விரிவான மனு ஒன்றை அளிக்க உள்ளதாகத் தெரிகிறது. குறிப்பாக, தமிழகத்தின் உள்கட்டமைப்பு திட்டங்கள், சென்னை மெட்ரோ ரயில் திட்டத்தின் அடுத்தகட்டப் பணிகள் மற்றும் கல்வி, சுகாதாரத் துறைகளுக்கான மத்திய அரசின் பங்கீடுகள் குறித்து இருவரும் ஆலோசிக்க வாய்ப்புள்ளதாகத் தலைமைச் செயலக அதிகாரிகள் தரப்பில் கூறப்படுகிறது. புதிய அமைச்சரவை விரிவாக்கத்திற்குப் பிறகு நடக்கும் பயணம் என்பதால் இது கூடுதல் கவனம் பெற்றுள்ளது.
மறுபுறம், இந்த அரசு முறைப் பயணத்தின் போது பிரதமர் மோடி மட்டுமின்றி, மத்திய உள்துறை அமைச்சர் அமித் ஷா மற்றும் நிதி அமைச்சர் நிர்மலா சீதாராமன் ஆகியோரையும் முதல்வர் விஜய் சந்திக்க வாய்ப்புள்ளதாகக் கூறப்படுகிறது. தமிழகத்தில் பா.ஜ.க மற்றும் தவெக ஆகிய கட்சிகள் தனித்தனி அரசியல் பாதையைக் கொண்டிருந்தாலும், மாநிலத்தின் நலனுக்காக மத்திய அரசுடன் சுமுகமான உறவைப் பேண முதல்வர் விஜய் விரும்புவதையே இந்த டெல்லி பயணம் காட்டுவதாக அரசியல் விமர்சகர்கள் கருதுகின்றனர்.
