உலக அளவில் கச்சா எண்ணெய் மற்றும் சுத்திகரிக்கப்பட்ட எரிபொருட்களின் விலை தொடர்ந்து அதிகரித்து வரும் நிலையில், ஜி7 உறுப்பு நாடுகளின் தலைவர்கள் பங்கேற்கும் காணொலிக் காட்சி வாயிலான அவசரக் கூட்டத்திற்கு பிரான்ஸ் ஏற்பாடு செய்துள்ளது. பிரான்ஸ் அதிபர் இம்மானுவேல் மேக்ரான் தலைமையில் இக்கூட்டம் பாரிஸ் நேரப்படி பிற்பகல் 2:30 மணிக்கு நடைபெறுகிறது. எரிபொருள் சந்தையை சீரமைக்கவும், சந்தை நிலவரங்களைக் கட்டுப்படுத்தவும் தேவையான கூட்டு நடவடிக்கைகளை எடுப்பது குறித்து இக்கூட்டத்தில் விவாதிக்கப்பட உள்ளது.
இக்கூட்டத்திற்கு முன்னதாக, பிரான்ஸ் அதிபர் இம்மானுவேல் மேக்ரான் அமெரிக்க அதிபர் டொனால்ட் டிரம்ப் மற்றும் கனடா பிரதமர் மார்க் கர்னி ஆகியோருடன் தொலைபேசி வாயிலாக ஆலோசனை நடத்தினார். சர்வதேச அளவில் அதிகரித்து வரும் டீசல் தேவையை பூர்த்தி செய்ய ஐரோப்பிய ஒன்றிய நாடுகள் தங்களது அவசரகால டீசல் இருப்பை வெளியிட வேண்டும் என்றும் பிரான்ஸ் வலியுறுத்தியுள்ளது. மேலும், அமெரிக்கா தரப்பில் இருந்து ஐரோப்பிய நாடுகளுக்கு எரிபொருள் விநியோகத்தை அதிகரிப்பது தொடர்பாகவும் கடுமையான அழுத்தங்கள் கொடுக்கப்பட்டு வருவதாகத் தகவல்கள் தெரிவிக்கின்றன.
ஜி7 தலைவர்களின் இந்த ஆலோசனையைத் தொடர்ந்து, சர்வதேச அளவில் கச்சா எண்ணெய் மற்றும் டீசல் கையிருப்பை கூட்டு அடிப்படையில் வெளியிடுவது குறித்து முக்கிய முடிவுகள் எடுக்கப்படும் என எதிர்பார்க்கப்படுகிறது. இக்கூட்டம் பற்றிய செய்தி வெளியானதைத் தொடர்ந்து சர்வதேச சந்தையில் கச்சா எண்ணெய் விலை 2 சதவீதத்திற்கும் அதிகமாக சரிவடைந்துள்ளது. எரிபொருள் சந்தையில் நிலவும் தட்டுப்பாட்டைப் போக்கி விலையைக் கட்டுக்குள் கொண்டுவர சர்வதேச ஆற்றல் முகமையுடன் சேர்ந்து அடுத்த கட்ட முடிவுகள் எடுக்கப்படும் என்று தெரிவிக்கப்பட்டுள்ளது.
