காசாவில் இயங்கி வரும் பாடசாலைகளில் சிறார்களுக்குக் கற்பிக்கப்படும் பாடத்திட்டங்களில் இஸ்ரேலியர்களுக்கு எதிரான வன்முறையும் வெறுப்புணர்வும் நச்சாகக் கலக்கப்பட்டிருப்பதாக, உயிருக்கு அஞ்சாமல் காசா பகுதியைச் சேர்ந்த சில துணிச்சலான பெற்றோர் மற்றும் பொதுமக்கள் பகிரங்கமாகக் குற்றம்சாட்டி எதிர்ப்புத் தெரிவித்து வருகின்றனர்.
பிரத்தியேகப் புலனாய்வு அறிக்கையின்படி, ஐநா அமைப்பான UNRWA மற்றும் பாலஸ்தீன அதிகார சபையால் நடத்தப்படும் பள்ளிகளின் பாடப்புத்தகங்களில் வன்முறையைத் தூண்டும் கருத்துகள் இடம்பெற்றுள்ளன. சாதாரண அரபு மொழி இலக்கணப் பாடங்கள் மற்றும் கணித வினாக்களில் கூட “இஸ்ரேலியர்களின் தொண்டையை அறுப்பது” மற்றும் “தாக்குதல்களை நடத்துவது” போன்ற வன்முறை உதாரணங்கள் உதாரண வாக்கியங்களாகப் பயன்படுத்தப்பட்டு குழந்தைகளுக்குக் கற்பிக்கப்படுவதாகக் கூறப்பட்டுள்ளது.
காசா பகுதியில் ஹமாஸ் அமைப்பின் பிடி கடுமையானதாக இருக்கும் நிலையிலும், அங்கு வாழும் பொதுமக்கள் சிலர் தங்களது குழந்தைகளின் எதிர்காலம் குறித்துக் கவலை தெரிவித்துள்ளனர். “எங்கள் குழந்தைகளுக்குக் கல்வியை வழங்குவதற்குப் பதிலாக, சிறுவயதிலேயே தீவிரவாத சிந்தனைகளையும் வெறுப்பையும் அவர்களின் மனதில் விதைக்கிறார்கள்; இது எங்களின் அடுத்த தலைமுறையை முற்றிலும் சீரழித்துவிடும்” எனப் பெற்றோர் சிலர் தங்களது அதிருப்தியை வெளிப்படுத்தியுள்ளனர்.
சர்வதேச மனித உரிமைகள் அமைப்புகள் மற்றும் கல்வி ஆராய்ச்சி நிறுவனங்கள் பலமுறை சுட்டிக்காட்டியும், காசாப் பள்ளிகளில் இத்தகைய பாடத்திட்டங்கள் தொடர்ந்து கற்பிக்கப்படுவது அதிர்ச்சியை ஏற்படுத்தியுள்ளது. தீவிரவாதப் போதனைகளுக்குப் பதிலாக அமைதியையும் மனிதநேயத்தையும் போதிக்கும் முறையான கல்வியை குழந்தைகளுக்கு வழங்க வேண்டும் என சர்வதேச சமூகத்திற்கு காசா மக்களே தற்போது கோரிக்கை விடுக்கத் தொடங்கியுள்ளனர்.
