Posted in

செஞ்சி சிறுமி மாயமான வழக்கில் பெற்றோர் பக்கம் திரும்பிய சிபிசிஐடி

.விழுப்புரம் மாவட்டம் செஞ்சியை அடுத்த ஆலம்பூண்டி பகுதியில் கடந்த மாதம் 7 வயது சிறுமி ஹேமலதா மாயமான வழக்கில் சிபிசிஐடி காவல்துறையினர் தீவிர விசாரணையை மேற்கொண்டு வருகின்றனர். சிறுமி காணாமல் போன அன்று இரவு நடந்த பிறந்தநாள் கொண்டாட்டம் மற்றும் குடும்பத்தினரின் நடவடிக்கைகள் குறித்துப் பல்வேறு சந்தேகங்கள் எழுந்துள்ளதால், விசாரணை பெற்றோர் மற்றும் குடும்பத்தினரின் பக்கம் திரும்பியுள்ளது.

சம்பவத்தன்று இரவு சிறுமி தனது தாய் பவானி, தந்தை வடிவேலு மற்றும் பாட்டியுடன் ஒரே அறையில் தூங்கச் சென்ற நிலையில், அதிகாலையில் கதவு திறந்திருந்தும் குழந்தை மட்டும் மாயமானது குறித்துப் பல்வேறு முரண்பாடுகள் கண்டறியப்பட்டுள்ளன. வழக்கமாகப் பூட்டப்படும் கதவு அன்றைய தினம் திறந்திருந்தது குறித்தும், குழந்தையின் தாய் மற்றும் குடும்பத்தினரின் முரணான வாக்குமூலங்கள் குறித்தும் சிபிசிஐடி டிஐஜி விக்ரமன் தலைமையிலான தனிப்படையினர் தீவிரமாக விசாரித்து வருகின்றனர்.

இந்த வழக்கில் இதுவரை பழைய குற்றவாளிகள், உள்ளூர் பிரமுகர்கள் மற்றும் சாமியார்கள் உள்ளிட்ட பலரிடம் விசாரணை நடத்தப்பட்ட நிலையில், தற்போது குடும்பத்தினரின் செல்போன் பதிவுகள் மற்றும் வங்கி ஆவணங்களும் தீவிர ஆய்வுக்கு உட்படுத்தப்பட்டுள்ளன. விசாரணையின் போது குடும்ப உறுப்பினர்கள் திட்டமிட்டுத் தகவல்களை மறைக்கிறார்களா அல்லது முன்னதாகவே கதைகளைத் திட்டமிட்டுச் சொல்கிறார்களா என்ற கோணத்திலும் அதிகாரிகள் தீவிர விசாரணை நடத்தி வருகின்றனர்.

செஞ்சி பகுதியில் பெரும் பரபரப்பை ஏற்படுத்தியுள்ள இந்தச் சிறுமி மாயம் குறித்த வழக்கில், சிபிசிஐடியின் இறுதிக்கட்ட விசாரணையில் விரைவில் உண்மைகள் வெளிவரும் என எதிர்பார்க்கப்படுகிறது. மாயமான சிறுமியைத் தேடும் பணியும், வழக்கில் தொடர்புடைய மர்மங்களை விலக்கும் நடவடிக்கைகளும் தொடர்ந்து நடைபெற்று வருகின்றன.