Posted in

சூடானில் புதைந்திருந்த பிரமாண்ட தேவாலயத்தின் தரைத்தளம் கண்டுபிடிப்பு: தொல்லியல் ஆய்வாளர்கள் சாதனை

வடக்கு சூடானில் உள்ள பழமையான நகரமான ஓல்ட் டோங்கோலாவில் (Old Dongola) மேற்கொள்ளப்பட்ட தொல்லியல் அகழாய்வில், இடைக்காலத்தைச் சேர்ந்த பிரமாண்ட தேவாலயத்தின் அசல் தரைத்தளம் முதன்முறையாகக் கண்டறியப்பட்டுள்ளது. போலந்து நாட்டின் வார்சா பல்கலைக்கழகத் தொல்லியல் மையம் மற்றும் சூடான் தேசிய தொல்லியல் மற்றும் அருங்காட்சியகக் கழகம் ஆகியவை இணைந்து நடத்திய ஆய்வில் இந்த ‘கிரேட் சர்ச் ஆஃப் ஜீசஸ்’ (Great Church of Jesus) தேவாலயப் பகுதி வெளிச்சத்திற்கு வந்துள்ளது.

கி.பி. ஆறாம் நூற்றாண்டில் கிறிஸ்தவ மதத்தைத் தழுவிய செழிப்பான நூபியன் (Nubian) ராஜ்ஜியமான மகுரியாவின் (Makuria) தலைநகரமாக ஓல்ட் டோங்கோலா விளங்கியது. 154 அடி அகலமும் 187 அடி நீளமும் கொண்ட இந்தப் பிரமாண்ட தேவாலயம், சுமார் ஆறு மாடிகளுக்கு மேல் உயரமானதாகவும், அந்தப் பிராந்தியத்தின் மிக முக்கியமான கிறிஸ்தவ வழிபாட்டுத் தலமாகவும் திகழ்ந்துள்ளது. தரைத்தளத்துடன் சேர்த்து 36 அடி உயரச் சுவர்களைக் கொண்ட பிரமாண்ட படிக்கட்டுகளின் அடிப்பகுதியையும் ஆய்வாளர்கள் தற்போது கண்டுபிடித்துள்ளனர்.

கட்டிடக்கலை வரலாற்றில் இஸ்தான்புல்லில் உள்ள ஹேகியா சோபியா (Hagia Sophia) எவ்வாறு ஒரு முன்னோடியாகத் திகழ்ந்ததோ, அதேபோல நூபியா மற்றும் ஆப்பிரிக்காவின் இந்தப் பகுதியில் ‘கிரேட் சர்ச் ஆஃப் ஜீசஸ்’ தேவாலயம் கட்டிடக்கலையில் ஒரு முன்மாதிரியாக விளங்கியதாக வார்சா பல்கலைக்கழக அகழாய்வு இயக்குநர் ஆர்தர் ஒப்லுஸ்கி (Artur Obłuski) தெரிவித்துள்ளார். இடைக்கால மக்கள் வழிபாடு நடத்திய அசல் தரைப்பகுதி கண்டறியப்பட்டிருப்பது, அக்காலத்துக் கட்டிடக்கலை நுணுக்கங்கள் மற்றும் மத வரலாற்றைப் புரிந்துகொள்ளப் பேருதவியாக இருக்கும் என்று ஆய்வாளர்கள் கருதுகின்றனர்.

1365-ஆம் ஆண்டில் அரசவை ஓல்ட் டோங்கோலாவை விட்டு வெளியேறிய பின்னரும் பல நூற்றாண்டுகள் மக்கள் வசிப்பிடமாகத் தொடர்ந்த இந்தப் பகுதியில், தற்போதும் அகழாய்வுப் பணிகள் தீவிரமாக நடைபெற்று வருகின்றன. வரும் நாட்களில் மேற்கொள்ளப்படும் தொடர் ஆய்வுகள் மூலம், நைல் நதிக்கரையில் செழித்து வளர்ந்த பண்டைய ஆப்பிரிக்க கிறிஸ்தவ ராஜ்ஜியத்தின் கலை மற்றும் கட்டிடக்கலைச் சிறப்புகள் குறித்த கூடுதல் தகவல்கள் வெளிவரும் என எதிர்பார்க்கப்படுகிறது.