அமெரிக்காவில் நடைபெற்ற இடைத்தேர்தலில் ஜனநாயகக் கட்சி நாடாளுமன்றத்தின் இரு அவைகளின் கட்டுப்பாட்டையும் கைப்பற்றியது. இது தொடர்பாக ஈரானின் உயர்மட்ட பாதுகாப்பு அதிகாரியான மோ்சென் ரெசாய் தனது சமூக வலைதளப் பக்கத்தில் கருத்து வெளியிட்டுள்ளார். அதில், போர்க்களத்திலும் ஹோர்முஸ் ஜலசந்தியும் ஈரானிய தேசம் அமெரிக்காவிற்கு மூலோபாயத் தோல்வியைப் பரிசளித்த நிலையில், தற்போது வாஷிங்டனிலும் அரசியல் ரீதியான பெரிய தோல்வியை வழங்கியுள்ளதாக அவர் குறிப்பிட்டுள்ளார்.
அமெரிக்காவின் போர் நடவடிக்கைகளின் நிதிச் சுமையை சாதாரண அமெரிக்க குடிமக்கள்தான் சுமக்க வேண்டிய நிலைக்கு ஆளாகியுள்ளனர் என்றும் அவர் கடுமையாக விமர்சித்துள்ளார். ஈரானை எதிர்த்துப் போட்டியிடுபவர்கள் போர்க்களம் முதல் தங்கள் சொந்த வாசல்படி வரை அதற்கான விலையைக் கொடுக்க நேரிடும் என்றும் அவர் எச்சரிக்கை விடுத்துள்ளார். அமெரிக்காவின் இடைத்தேர்தல் முடிவுகள் மற்றும் பொருளாதார நெருக்கடிகள் காரணமாக டிரம்ப் நிர்வாகம் உள்நாட்டிலும் கடும் அழுத்தங்களைச் சந்தித்து வருவதாகச் சர்வதேச ஊடகங்கள் செய்தி வெளியிட்டுள்ளன.
மத்திய கிழக்கு பிராந்தியத்தில் பதற்றமான சூழல் நிலவி வரும் வேளையில், ஈரானிய பாதுகாப்புத் தலைவரின் இந்த நேரடியான கருத்துகள் உலக அரசியல் அரங்கில் பெரும் விவாதங்களை ஏற்படுத்தியுள்ளன.
அமெரிக்கா மற்றும் ஈரான் இடையேயான தற்போதைய அரசியல் மற்றும் ராணுவச் சூழல்கள் எவ்வாறு மாறப் போகின்றன என்பதை உலக நாடுகள் கவனித்து வருகின்றன.
