வடகொரியாவுடன் வர்த்தக ஒப்பந்தம்? நாடாளுமன்றத்தில் வாய் தவறி உளறிய பிரிட்டன் பிரதமர் கீர் ஸ்டார்மர்!

பிரிட்டன் நாடாளுமன்றத்தில் நடைபெற்ற பிரதமர் கேள்வி நேரத்தின் (PMQs) போது, அந்நாட்டுப் பிரதமர் கீர் ஸ்டார்மர் (Keir Starmer) வாய் தவறிப் பேசிய விசித்திரமான வார்த்தை ஒன்று, அவை முழுவதையும் சிரிப்பலையில் ஆழ்த்தியதோடு சமூக வலைதளங்களிலும் காட்டுத்தீயாய் பரவி வைரலாகி வருகிறது. பிரிட்டன் அரசு சர்வதேச அளவில் செய்து வரும் வர்த்தக உடன்படிக்கைகள் குறித்து நாடாளுமன்றத்தில் பெருமிதத்துடன் பட்டியலிட்ட பிரதமர் ஸ்டார்மர், தென் கொரியாவிற்குப் பதிலாகத் தவறுதலாக வடகொரியாவின் பெயரைக் குறிப்பிட்டதுதான் இந்த விவாதப் புயலுக்குக் காரணமாகும்.

லிபரல் டெமாக்ரடிக் கட்சியின் தலைவர் எட் டேவி எழுப்பிய கேள்விக்கு நாடாளுமன்றத்தில் பதிலளித்த பிரதமர் ஸ்டார்மர், “கடந்த இரண்டு ஆண்டுகளில் நமது பொருளாதாரத்தின் மிக முக்கியமான துறைகளுக்குத் தேவையான தீவிரமான வர்த்தக ஒப்பந்தங்களை நான் பேச்சுவார்த்தை மூலம் சாத்தியமாக்கியுள்ளேன். நாங்கள் ஐரோப்பிய ஒன்றியம், இந்தியா, வடகொரியா மற்றும் அமெரிக்கா ஆகிய நாடுகளுடன் வர்த்தக ஒப்பந்தங்களைச் செய்துள்ளோம்” என்று மிக ஆணித்தரமாகக் கூறினார். உலகின் மிக மோசமான சர்வாதிகார நாடான கிம் ஜாங் உன்னின் வடகொரியாவுடன் பிரிட்டன் ஒப்பந்தம் செய்துள்ளதாகப் பிரதமர் கூறியதைக் கேட்டு, எதிர்க்கட்சி எம்பிக்கள் அதிர்ச்சியிலும் சிரிப்பிலும் மூழ்கினர்.

அவர் பேசி முடித்த சில நிமிடங்களிலேயே, அவரது சொந்தக் கட்சியின் மூத்த நிர்வாகிகள் அதிர்ச்சியடைந்து, பிரதமரிடம் அது ஒரு மாபெரும் தவறு என்பதை உணர்த்தும் அவசரக் குறிப்பு (Note) அடங்கிய காகிதம் ஒன்றை மேடையில் நீட்டினர். அந்த காகிதத்தைப் படித்துப் பார்த்த பிரதமர் கீர் ஸ்டார்மர், தனது தவறை உணர்ந்து அவையிலேயே சத்தமாகச் சிரிக்கத் தொடங்கினார். உடனடியாக மீண்டும் மைக் பிடித்த அவர், “தென் கொரியாவிற்குப் பதிலாக நான் வடகொரியாவுடன் வர்த்தக ஒப்பந்தம் செய்ததாகத் தவறுதலாகக் கூறிவிட்டதாக இப்போது எனக்கு ஒரு குறிப்பு வழங்கப்பட்டுள்ளது” என்று நகைச்சுவையுடன் ஒப்புக்கொண்டார்.

மேலும் தொடர்ந்து பேசிய அவர், “ஒருவேளை அது உண்மையாக இருந்திருந்தால், அது உலக அளவில் மிகப்பெரிய முக்கியச் செய்தியாக (Breaking News) மாறியிருக்கும்; ஆனால் அது நம் நாட்டுக்கு அவ்வளவு நல்லதாக இருந்திருக்காது. இது வெறும் நாக்கு பிறழ்வுதான் (Slip of the tongue), ஆனால் மிகவும் துரதிர்ஷ்டவசமான ஒரு தவறு” என்று கூறித் தனது விளக்கத்தை அவையில் பதிவு செய்தார். பிரிட்டனில் நிலவி வரும் உள்நாட்டு அரசியல் நெருக்கடிகளுக்கு இடையே, நாடாளுமன்றத்தில் அரங்கேறிய இந்த சுவாரசியமான சினிமா பாணி குளறுபடி வீடியோ தற்போது உலகளவில் ட்ரெண்டாகி வருகிறது.