சுற்றுலாத் தலங்களைச் சூழும் காட்டுத்தீ.. ஹோட்டல்கள், முகாம்களில் இருந்து அலறியடித்து ஓடும் சுற்றுலாப் பயணிகள்! 

ஐரோப்பிய நாடான ஸ்பெயினின் புகழ்பெற்ற சுற்றுலாத் தலமான கோஸ்டா பிராவா (Costa Brava) கடற்கரைப் பகுதியை ஒட்டியுள்ள காடுகளில் பரவி வரும் பிரம்மாண்ட காட்டுத்தீ, அங்கு விடுமுறையைக் கழிக்க வந்துள்ள பன்னாட்டுச் சுற்றுலாப் பயணிகளுக்குப் பெரும் நரகமாக மாறியுள்ளது. வடகிழக்கு பிராந்தியமான கட்டலோனியாவின் ஜிரோனா (Girona) மாகாணத்தில் உள்ள லா பிஸ்பால் டி எம்போர்டா (La Bisbal d’Emporda) பகுதியில் கடந்த வெள்ளிக்கிழமை தொடங்கிய இந்த காட்டுத்தீ, பலத்த காற்றின் காரணமாகப் பல நூறு ஹெக்டேர் பரப்பளவிற்கு மளமளவெனப் பரவி தகித்து வருகிறது. இதனால் புகழ்பெற்ற கடற்கரை ஓய்விடங்கள் (Hotspots), ஹோட்டல்கள் மற்றும் தங்கும் விடுதிகளைச் சூழ்ந்துள்ள அடர்ந்த புகையினால் மூச்சுத்திணறல் ஏற்பட்டு, நூற்றுக்கணக்கான சுற்றுலாப் பயணிகள் தங்களது உடமைகளை அப்படியே போட்டுவிட்டுப் பாதுகாப்பான இடங்களுக்குத் தப்பியோடி வருகின்றனர்.

தற்போதைய நிலவரப்படி, சுமார் 2,200 ஹெக்டேருக்கும் (5,400 ஏக்கர்) அதிகமான வனப்பகுதிகள் முற்றிலும் சாம்பலாகியுள்ளதாக ஸ்பெயின் தீயணைப்புத் துறை தெரிவித்துள்ளது. தீயின் தீவிரம் குடியிருப்பு மற்றும் சுற்றுலா விடுதிகள் உள்ள பகுதிகளை நோக்கி நகர்வதால், அப்பகுதியில் உள்ள கோடைகால முகாம்களில் (Holiday Camps) தங்கியிருந்த 70 குழந்தைகள் உட்பட 150-க்கும் மேற்பட்ட சுற்றுலாப் பயணிகள் அவசர அவசரமாகப் பாதுகாப்புப் படையினரால் வெளியேற்றப்பட்டுள்ளனர். மேலும், நிலைமை மோசமடைந்து வருவதால் புகழ்பெற்ற பிளாட்ஜா டி ஆரோ (Platja d’Aro) உள்ளிட்ட கடற்கரை ரிசார்ட்டுகளில் வசிக்கும் ஆயிரக்கணக்கான உள்ளூர் மக்களையும், சுற்றுலாப் பயணிகளையும் வீடுகளை விட்டு வெளியேற வேண்டாம் என்றும், ஜன்னல் மற்றும் கதவுகளைப் பூட்டி வைக்குமாறும் பிராந்திய அரசு அவசர உத்தரவு பிறப்பித்துள்ளது.

இந்த காட்டுத்தீ விபத்து குறித்துக் கட்டலோனியா மாகாண காவல்துறை நடத்திய முதற்கட்ட விசாரணையில் அதிர வைக்கும் உண்மை ஒன்று வெளியாகியுள்ளது. சாலையோரம் ஒருவர் ‘ஆங்கிள் கிரைண்டர்’ (Angle Grinder) எனப்படும் இரும்பு வெட்டும் இயந்திரத்தைப் பயன்படுத்தியபோது அதிலிருந்து தெறித்த தீப்பொறி, கோடைகால கடுமையான வெப்பத்தால் காய்ந்து போயிருந்த புற்களில் பட்டு இந்த பிரம்மாண்ட விபத்து ஏற்பட்டுள்ளது தெரியவந்துள்ளது. இதனை அடுத்து, அலட்சியமாகச் செயல்பட்டு காட்டுத்தீ உருவாகக் காரணமான அந்த நபரை ஸ்பெயின் போலீஸார் உடனடியாகக் கைது செய்து சிறையிலடைத்துள்ளனர்.

ஸ்பெயினில் தற்போது நிலவி வரும் 40 டிகிரி செல்சியஸைத் (104°F) தாண்டிய கடுமையான வெயில் அலை (Heatwave) மற்றும் வறண்ட வானிலை காரணமாகத் தீயைக் கட்டுப்படுத்துவதில் 200-க்கும் மேற்பட்ட தீயணைப்பு வீரர்களுக்குப் பெரும் சவால் ஏற்பட்டுள்ளது. இதனால் ராணுவத்தின் அவசரக்கால பிரிவும் (UME) தற்போது போர்க்களத்தில் இறக்கப்பட்டுள்ளது. ஸ்பெயின் மட்டுமன்றி அதன் அண்டை நாடுகளான பிரான்ஸ், போர்ச்சுகல் மற்றும் கிரீஸ் உள்ளிட்ட ஒட்டுமொத்த தெற்கு ஐரோப்பாவிலும் இந்த ஆண்டு காட்டுத்தீ சீக்கிரமாகவே தொடங்கிப் பேரழிவை ஏற்படுத்தி வருவதால், காலநிலை மாற்றத்தின் (Climate Change) கோர முகத்தை உலகம் இப்போது நேரடியாக எதிர்கொண்டு வருவதாகச் சர்வதேச சுற்றுச்சூழல் ஆர்வலர்கள் கவலை தெரிவித்துள்ளனர்.