சீனாவின் ஒரு பகுதியான தைவானை முழுமையாக இணைப்பது தவிர்க்க முடியாத வரலாற்றுப் பணி என அந்நாட்டு அதிபர் சி ஜின்பிங் தெரிவித்துள்ளார். தைவானுடன் அமைதியான முறையில் பேச்சுவார்த்தை நடத்த சீனா தயாராக உள்ளதாகவும், அதேசமயம் பிரிவினைவாத நடவடிக்கைகளை எக்காலத்திலும் அனுமதிக்க முடியாது என்றும் அவர் எச்சரித்துள்ளார்.
புரட்சியாளர் சன் யாட்-சென் அவர்களின் 160-வது பிறந்தநாளை முன்னிட்டு பெய்ஜிங்கில் நடைபெற்ற நிகழ்ச்சியில் பேசிய அதிபர் சி ஜின்பிங் இந்தக் கருத்துக்களைத் தெரிவித்தார். ‘ஒரே சீனா’ கொள்கை மற்றும் 1992 உடன்படிக்கையின் அடிப்படையில் தைவான் மக்களுடன் பேச்சுவார்த்தை நடத்தத் தயாராக இருப்பதாகக் குறிப்பிட்ட அவர், ‘ஒரு நாடு, இரு அமைப்புகள்’ என்ற கொள்கையின் கீழ் அமைதியான முறையில் தாய்நாட்டுடன் தைவானை இணைப்பதே இலக்கு என்றார். மேலும், தைவான் பிராந்தியத்தில் பிரிவினைவாத சக்திகளுக்கு இடமளிக்கப்படாது என்றும், சீனாவின் ஒருமைப்பாட்டைக் காக்க அனைத்து தரப்பினரும் ஒன்றிணைந்து செயல்பட வேண்டும் என்றும் அவர் கேட்டுக் கொண்டார்.
அதிபர் சி ஜின்பிங்கின் இந்தப் பேச்சுக்குத் தைவான் தரப்பிலிருந்து முறையான மறுப்பு தெரிவிக்கப்பட்டுள்ளது. ‘ஒரு நாடு, இரு அமைப்புகள்’ கொள்கையைத் தைவான் அரசாங்கமும் பொதுமக்களும் ஒருபோதும் ஏற்க மாட்டார்கள் எனத் தைவானின் பிராந்திய விவகாரப் பேரவை செய்தித் தொடர்பாளர் லியாங் வென்-சீச் செய்தியாளர்களிடம் தெரிவித்தார். மேலும், தைவானின் எதிர்காலம் மற்றும் இறையாமை குறித்துத் தீர்மானிக்கக் தைவான் மக்களுக்கு மட்டுமே முழு உரிமை உண்டு எனத் தைவான் தரப்பு திட்டவட்டமாகத் தெரிவித்துள்ளது.
சீனாவின் இந்தத் தொடர் அழுத்தங்களுக்கு மத்தியில், தைவானைச் சுற்றியுள்ள கடல் மற்றும் வானூர்திப் பகுதிகளில் சீன ராணுவத்தின் நடவடிக்கைகள் தொடர்ந்து கண்காணிப்பில் வைக்கப்பட்டுள்ளன. இரு தரப்புக்கும் இடையிலான இந்த அரசியல் பதற்றங்கள் ஆசிய பிராந்தியத்தில் தொடர்ந்து விவாதப் பொருளாகவே நீடித்து வருகின்றன.
