இங்கிலாந்தின் டெர்பி பகுதியில், உலகையே உலுக்கும் வகையில் ஒரு பதின்ம வயதுச் சிறுவன் தன் வளர்ப்புத் தந்தையை ஈவுஇரக்கமின்றி 70 முறை கத்தியால் குத்திக் கொலை செய்துள்ளான். தனது வீட்டில் கொல்லப்பட வேண்டியவர்களின் பட்டியலை (Kill List) தயாரித்த அந்தச் சிறுவன், அதில் முதலிடத்தில் இருந்த வளர்ப்புத் தந்தை கிறிஸ்டோபர் ஓவனை (57) அக்டோபர் 22-ம் தேதி நள்ளிரவில் இரண்டு கத்திகளால் துடிதுடிக்கச் சிதைத்துள்ளான். இந்த கொடூரக் கொலைச் சம்பவம் அந்தப் பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது.
தந்தையைக் கொன்று முடித்த அந்தத் ‘திரிக்கப்பட்ட’ மனநிலை கொண்ட சிறுவன், அங்கிருந்த செல்லப் பிராணியான ‘பாப்பி’ என்ற ஜாக் ரஸ்ஸல் ரக நாயையும் குத்திக் கொன்றுள்ளான். இதற்குக் காரணம் கேட்டபோது, நாயைக் கொன்றால் தான் இன்னும் “தனித்துவமாக” (Unique) உணர முடியும் என்று அவன் கூறியது நீதிபதிகளையே அதிர வைத்துள்ளது. ஒரு மனித உயிர் மற்றும் வாயில்லாப் பிராணியைக் கொல்வதை ஒரு சாதனையாக நினைத்து அந்தச் சிறுவன் செயல்பட்டது அவனது வக்கிரமான மனநிலையைத் தோலுரித்துக் காட்டியுள்ளது.
வழக்கை விசாரித்த டெர்பி கிரவுன் நீதிமன்றத்தில், அந்தச் சிறுவனின் அறையில் இருந்து பல அதிர்ச்சிகரமான பட்டியல்களைக் காவல்துறையினர் கண்டெடுத்தனர். அதில் யாரையெல்லாம் கொல்ல வேண்டும், எப்படிப் பல்வேறு முறைகளில் சித்திரவதை செய்ய வேண்டும் என்ற குறிப்புகள் இருந்தன. குறிப்பாக ‘வீடு’ (Home) என்ற பட்டியலில் அவனது சொந்தத் தாய் மற்றும் குடும்ப உறுப்பினர்களின் பெயர்களும் இருந்தன. ஆனால், முதலிடத்தில் இருந்த கிறிஸ்டோபரைத் தனது கொலைப் பட்டியலில் இருந்து முதலில் தீர்த்துக் கட்டியுள்ளான்.
நீதிபதி ஷான் ஸ்மித் இந்தச் சம்பவத்தை “பயங்கரமான மற்றும் வெறித்தனமானத் தாக்குதல்” என்று வர்ணித்துள்ளார். இந்தக் கொடூரக் குற்றத்திற்காக அந்தச் சிறுவனுக்குக் குறைந்தபட்சம் 20 ஆண்டுகள் மற்றும் 10 மாதங்கள் சிறைத்தண்டனையுடன் கூடிய ஆயுள் தண்டனை விதிக்கப்பட்டுள்ளது. யாருமே எதிர்பார்க்காத ஒரு பயங்கரம் அந்த வீட்டிற்குள் நிகழ்ந்து முடிந்துவிட்டதாகக் கண்ணீர் மல்கக் கூறி நீதிபதி தீர்ப்பளித்தார். சமூக வலைதளங்களில் இந்தச் செய்தி காட்டுத்தீயாகப் பரவி பெரும் விவாதத்தைக் கிளப்பியுள்ளது.
