தமிழக அரசியலில் தவெக (தமிழக வெற்றி கழகம்) தலைமையிலான புதிய கூட்டணி ஆட்சி அமைந்துள்ள சூழலில், அடுத்தடுத்து அரங்கேறி வரும் அரசியல் நகர்வுகள் முதலமைச்சர் விஜய்க்கு புதிய நெருக்கடிகளை ஏற்படுத்தி வருகின்றன. கடந்த சட்டப்பேரவை தேர்தலுக்குப் பிறகு, பிரதான எதிர்க்கட்சி அந்தஸ்தை இழந்த அதிமுகவிலிருந்து அடுத்தடுத்து சில எம்.எல்.ஏ.க்கள் ராஜினாமா செய்துவிட்டு தவெகவில் தங்களை இணைத்துக் கொண்டு வருகின்றனர். இந்த விவகாரம் தமிழக அரசியல் வட்டாரத்தில் பெரும் விவாதத்தைக் கிளப்பியுள்ள நிலையில், தவெகவின் கூட்டணி கட்சிகளே இந்த கட்சித் தாவல் நடவடிக்கைக்கு அதிருப்தி தெரிவிக்கத் தொடங்கியிருப்பது கூட்டணிக்குள் சலசலப்பை ஏற்படுத்தியுள்ளது.
குறிப்பாக, தவெக அரசுக்கு ஆதரவளித்து அமைச்சரவையில் இணைந்துள்ள விடுதலைச் சிறுத்தைகள் கட்சியின் (விசிக) தலைவர் தொல். திருமாவளவன், இந்த விவகாரத்தில் தனது கடுமையான எதிர்ப்பைப் பதிவு செய்துள்ளார். திருச்சியில் செய்தியாளர்களைச் சந்தித்த அவர், மக்களால் தேர்ந்தெடுக்கப்பட்ட மாற்றுக்கட்சி எம்.எல்.ஏ.க்களை, குறிப்பாக பிரதான எதிர்க்கட்சியான அதிமுகவிலிருந்து எம்.எல்.ஏ.க்களை தவெகவில் இணைத்துக் கொள்வது அரசியல் அறத்திற்கு அப்பாற்பட்டது என்று சுட்டிக்காட்டியுள்ளார். மேலும், மக்களின் வாக்குகளைப் பெற்று வெற்றி பெற்ற மக்கள் பிரதிநிதிகள் இவ்வாறு கட்சி மாறுவதை தவெக தலைமை தவிர்க்க வேண்டும் என்றும் அவர் வலியுறுத்தியுள்ளார்.
கூட்டணி ஆட்சி அமைந்த சில மாதங்களிலேயே தவெகவின் முக்கிய கூட்டணிக் கட்சியான விசிக இந்த விவகாரத்தை கையில் எடுத்திருப்பது முதலமைச்சர் விஜய்க்கு ஒரு புதிய தலைவலியாக மாறியுள்ளது. ஏற்கனவே பாஜகவின் ‘ஆபரேஷன் தாமரை’ பாணியிலான அரசியல் இது என்ற விமர்சனங்கள் எதிர்க்கட்சிகளால் முன்வைக்கப்படும் நிலையில், தற்போது திருமாவளவனும் இதற்கு எதிர்ப்பு தெரிவித்திருப்பது தவெக தலைமைக்கு தர்மசங்கடத்தை ஏற்படுத்தியுள்ளது. தூய்மையான அரசியல் மற்றும் ஊழலற்ற நிர்வாகத்தை வழங்குவதாகக் கூறி ஆட்சிக்கு வந்த தவெக, இதுபோன்ற கட்சித் தாவல்களை ஊக்குவிக்கக் கூடாது என்பதே திருமாவளவனின் பிரதான வாதமாக உள்ளது.
தமிழகத்தின் மாறும் அரசியல் சமன்பாடுகளுக்கு மத்தியில், இந்த விவகாரம் தவெக-விசிக இடையேயான உறவில் விரிசலை ஏற்படுத்துமா அல்லது தவெக தனது நிலைப்பாட்டை மாற்றிக்கொள்ளுமா என்ற எதிர்பார்ப்பு எழுந்துள்ளது. எதிர்க்கட்சிகளைப் பலவீனப்படுத்த எம்.எல்.ஏ.க்களை ஈர்க்கும் தவெகவின் உத்தி, சொந்தக் கூட்டணியிலேயே அதிர்வலைகளை உருவாக்கியிருப்பது தற்போதைய தமிழக அரசியலின் ஹாட் டாபிக் ஆகும். இந்த விவகாரத்தில் முதலமைச்சர் விஜய் அடுத்து என்ன மாதிரியான முடிவை எடுக்கப்போகிறார் என்பதைப் பொறுத்தே கூட்டணியின் எதிர்கால நகர்வுகள் அமையும் என அரசியல் விமர்சகர்கள் கருதுகின்றனர்.
