அமெரிக்க அதிபர் டொனால்ட் டிரம்ப், தன்னை இயேசு கிறிஸ்துவைப் போன்ற தோற்றத்தில் காட்டும் சர்ச்சைக்குரிய ஏஐ (AI) புகைப்படத்தைத் தனது ‘ட்ரூத் சோஷியல்’ பக்கத்தில் பகிர்ந்திருந்தார். அந்தப் படத்தில் டிரம்ப் புனிதமான உடையில் ஒரு நோயாளியைக் குணப்படுத்துவது போலவும், அவரைச் சுற்றி அமெரிக்கக் கொடி மற்றும் ராணுவ வீரர்கள் இருப்பது போலவும் சித்தரிக்கப்பட்டிருந்தது. இந்தப் படம் வெளியான சில மணி நேரங்களிலேயே கத்தோலிக்க மதத் தலைவர்கள் மற்றும் கிறிஸ்தவ அமைப்புகள் மத்தியில் பெரும் கொந்தளிப்பை ஏற்படுத்தியது.
வழக்கமாக டிரம்பிற்கு ஆதரவு அளிக்கும் தீவிர கிறிஸ்தவ வலதுசாரி அமைப்புகளே இந்த முறைக் கடும் கண்டனம் தெரிவித்தன. “அதிபர் டிரம்ப் ஒரு அரசியல் தலைவர், அவர் தன்னை கடவுளாகவோ அல்லது இயேசுவாகவோ உருவகப்படுத்துவது ‘தெய்வ நிந்தனை’ (Blasphemy) ஆகும்” என்று அவரது ஆதரவு தளத்தைச் சேர்ந்த முக்கிய மத போதகர்கள் அதிருப்தி வெளியிட்டனர். குறிப்பாக, மார்ஜோரி டெய்லர் கிரீன் போன்ற டிரம்பின் நெருங்கிய விசுவாசிகளே, இந்தச் செயல் எல்லை மீறியது என விமர்சித்ததைத் தொடர்ந்து டிரம்ப் அந்தப் புகைப்படத்தை நீக்க முடிவு செய்தார்.
மத ரீதியான இந்தத் தாக்குதல் வரும் தேர்தல்களில் கத்தோலிக்க வாக்குகளைப் பாதிக்கக்கூடும் என டிரம்பின் ஆலோசகர்கள் எச்சரித்ததாகவும் கூறப்படுகிறது. போப் லியோ XIV மற்றும் டிரம்ப் இடையே ஏற்கனவே போர் விவகாரத்தில் மோதல் நிலவி வரும் சூழலில், இத்தகைய புகைப்படங்கள் மதவாத மோதல்களை மேலும் தூண்டும் என அஞ்சப்பட்டது. இதனாலேயே, எவ்வித விளக்கமும் அளிக்காமல் டிரம்ப் அந்தப் பதிவை நீக்கியுள்ளார். இருப்பினும், அந்தப் புகைப்படத்தின் ஸ்கிரீன்ஷாட்டுகள் இணையத்தில் வைரலாகி வருகின்றன.
இந்த விவகாரம் குறித்து ஜனநாயகக் கட்சியினர் விமர்சிக்கையில், டிரம்ப் தன்னை ஒரு சர்வாதிகாரியாகவும் தெய்வமாகவும் நிலைநிறுத்த முயற்சிப்பதாகக் குற்றம் சாட்டினர். மதச் சின்னங்களைத் தனது சுய அரசியல் லாபத்திற்காகப் பயன்படுத்துவது கண்டிக்கத்தக்கது என்றும் அவர்கள் தெரிவித்தனர். இந்தப் புகைப்படம் நீக்கப்பட்டிருந்தாலும், டிரம்பின் இந்தச் செயல் அவரது சொந்த ஆதரவாளர் தளத்திலேயே ஒரு தற்காலிக விரிசலை ஏற்படுத்தியுள்ளதாக அரசியல் ஆய்வாளர்கள் கருதுகின்றனர்.
