அமெரிக்காவின் 250-வது சுதந்திர தினக் கொண்டாட்டங்களுக்கு மத்தியில், அமெரிக்க அதிபர் டொனால்ட் டிரம்ப் மற்றும் ரஷ்ய அதிபர் விளாடிமிர் புதின் ஆகிய இரு உலகத் தலைவர்களும் தொலைபேசி வாயிலாக சுமார் 90 நிமிடங்கள் மிக முக்கியமான பேச்சுவார்த்தையை நடத்தியுள்ளனர். துருக்கியின் அங்காரா நகரில் நடைபெறவிருக்கும் நேட்டோ (NATO) உச்சி மாநாட்டுக்கு முன்னதாக நடந்துள்ள இந்த நீண்ட உரையாடலில், உக்ரைன் போரை உடனடியாக முடிவுக்குக் கொண்டு வருவதற்கான அமைதித் திட்டங்கள் குறித்து டிரம்ப் விரிவாக ஆலோசித்துள்ளார். போரை நிறுத்தத் தேவையான அனைத்து உதவிகளையும் செய்ய அமெரிக்கா தயாராக இருப்பதாக அவர் புதினிடம் மீண்டும் உறுதிப்படுத்தியுள்ளார்.
கெரெம்லின் மாளிகையின் மூத்த அதிகாரி யூரி உஷாகோவ் இந்தச் சந்திப்பு குறித்து அதிகாரப்பூர்வமாக அறிக்கை வெளியிட்டுள்ளார். டிரம்ப் மற்றும் புதின் இடையிலான இந்த உரையாடல் மிகவும் ஆக்கப்பூர்வமாகவும், வணிக ரீதியாகவும் அமைந்திருந்ததாக அவர் குறிப்பிட்டுள்ளார். உக்ரைன் உடனான மோதலைத் தூதரக ரீதியாகவும், அரசியல் வழியிலும் தீர்க்கவே ரஷ்யா விரும்புவதாகவும், அதேநேரம் ரஷ்யாவின் அடிப்படைப் பாதுகாப்பு நிபந்தனைகளை அமெரிக்கா கவனத்தில் கொள்ள வேண்டும் என்றும் புதின் இதில் வலியுறுத்தியுள்ளார். மேலும், உக்ரைனும் அதன் ஐரோப்பிய கூட்டாளிகளும் போரை மேலும் நீட்டிக்கவும், தீவிரப்படுத்தவும் முயல்வதாக ரஷ்யா குற்றம் சாட்டியுள்ளது.
மறுபுறம், உக்ரைன் அதிபர் வோலோடிமிர் ஜெலென்ஸ்கியும் சனிக்கிழமையன்று அதிபர் டொனால்ட் டிரம்ப்புடன் மற்றொரு தனிப்பட்ட தொலைபேசி அழைப்பில் பேசியதை உறுதிப்படுத்தியுள்ளார். டிரம்பினுடனான உரையாடல் மிகவும் சிறப்பாக அமைந்ததாகக் குறிப்பிட்ட ஜெலென்ஸ்கி, 1200 கிலோமீட்டர் நீளமுள்ள போர்க்கள நிலவரங்கள் குறித்துப் பேசியதாகத் தெரிவித்தார். “இந்த கொடூரமான போரை முடிவுக்குக் கொண்டு வருவதற்கான உண்மையான வாய்ப்புகள் தற்போது தென்படுகின்றன; இதில் அமெரிக்காவின் தீர்க்கமான முடிவுகளே மிக முக்கியப் பங்கு வகிக்கும்” என்று ஜெலென்ஸ்கி நம்பிக்கை தெரிவித்துள்ளார். மேலும், துருக்கியில் நடக்கும் நேட்டோ மாநாட்டின் போது இந்த விவாதங்கள் தொடரும் என்றும் அவர் கூறியுள்ளார்.
இருப்பினும், இந்த அமைதிப் பேச்சுவார்த்தைகளுக்கு மத்தியிலும் உக்ரைன் போர்க்களத்தில் பதற்றம் தணியவில்லை. கிழக்கு உக்ரைனின் டோனெட்ஸ்க் பிராந்தியத்தில் உள்ள மூலோபாய முக்கியத்துவம் வாய்ந்த ‘கொஸ்தியான்டினிவ்கா’ (Kostyantynivka) நகரைத் தங்கள் படைகள் முழுமையாகக் கைப்பற்றிவிட்டதாக ரஷ்யா உரிமை கொண்டாடியுள்ளது. ஆனால், இந்த அறிவிப்பை முற்றிலும் மறுத்துள்ள உக்ரைன் ராணுவம், அது ரஷ்யாவின் அப்பட்டமான பொய் என்றும், அந்நகரம் இன்னும் உக்ரைன் கட்டுப்பாட்டிலேயே இருப்பதாகவும் தெரிவித்துள்ளது. அமைதிப் பேச்சுவார்த்தைகள் ஒருபுறம் தீவிரமடைந்தாலும், களத்தில் இரு நாடுகளும் தாக்குதல்களைக் குறைப்பதாகத் தெரியவில்லை என்பதே தற்போதைய யதார்த்தமாக உள்ளது.
