பிரிட்டன் பாதுகாப்பு அமைச்சகம் (MoD) வெளியிட்டுள்ள அதிகாரப்பூர்வ தகவல்களின்படி, இங்கிலாந்து நேரப்படி புதன்கிழமை அதிகாலை 4:00 மணிக்கு முன்பாக, டெவோன் மாகாணத்தின் ஓக்ஹாம்ப்டன் அருகே உள்ள ‘சௌர்டன் டவுன்’ (Sourton Down) என்ற கிராமப்புற பகுதியில் இந்த விபத்து நிகழ்ந்துள்ளது. இந்த பகுதி வடக்கு டார்ட்மூர் (Dartmoor) எல்லைக்கு அருகில் உள்ளதால், இங்கு வழக்கமாக ராணுவ ஹெலிகாப்டர்கள் மற்றும் போர் விமானங்கள் தீவிரப் பயிற்சிப் பறப்புகளை மேற்கொள்வது வழக்கம். அவ்வாறு அதிகாலைப் பயிற்சியில் ஈடுபட்டிருந்த போதே இந்த விபத்து நேரிட்டுள்ளதாக முதற்கட்ட விசாரணையில் தெரியவந்துள்ளது.
விபத்து நடந்தவுடன் டெவோன் மற்றும் கார்ன்வால் காவல்துறையினர் (Devon and Cornwall Police) அந்தப் பகுதியைத் தங்களின் முழுக் கட்டுப்பாட்டிற்குள் கொண்டு வந்துள்ளனர். விபத்தின் தீவிரத்தைக் கருத்தில் கொண்டு, சௌர்டன் டவுன் பகுதியை இணைக்கும் முக்கிய நெடுஞ்சாலைகளான A386 மற்றும் A30 ஆகிய சாலைகள் முழுமையாக மூடப்பட்டுப் போக்குவரத்து மாற்றி விடப்பட்டுள்ளது. ஹெலிகாப்டரில் எத்தனை வீரர்கள் பயணம் செய்தனர், விபத்தில் உயிரிழப்புகள் அல்லது காயங்கள் ஏதேனும் ஏற்பட்டுள்ளதா என்பது குறித்த துல்லியமான விபரங்களை வெளியிடப் பாதுகாப்பு அமைச்சகம் தற்காலிகமாக மறுத்துவிட்டது.
இங்கிலாந்தின் ராயல் கடற்படை பொதுவாக மெர்லின் (Merlin) மற்றும் வைல்ட்காட் (Wildcat) ஆகிய இரு முக்கிய அதிநவீன ஹெலிகாப்டர் ரகங்களையே தங்களின் கடற்படை மற்றும் விமானப் பயிற்சிகளுக்குப் பயன்படுத்தி வருகிறது. விபத்துக்குள்ளான ஹெலிகாப்டர் இதில் எந்த ரகத்தைச் சேர்ந்தது என்பதைக் கண்டறியவும், விபத்திற்கான துல்லியமான காரணத்தை ஆராயவும் பிரிட்டன் விமான விபத்து புலனாய்வுப் பிரிவினர் மற்றும் கடற்படை அதிகாரிகள் அடங்கிய உயர் மட்டக் குழு விசாரணையைத் தொடங்கியுள்ளது.
