உக்ரைனின் மின் உள்கட்டமைப்புகள் மீது ரஷ்யா நடத்திய ஏவுகணைத் தாக்குதலால் 6 லட்சம் மக்கள் மின்சாரமின்றி பாதிக்கப்பட்டுள்ளதாக உக்ரைன் அதிபர் வோலோடிமிர் செலென்ஸ்கி தெரிவித்துள்ளார்.
அமெரிக்க அதிபர் டொனால்ட் டிரம்ப் அறிவித்த “எரிசக்தி போர் நிறுத்த ஒப்பந்தத்தை” மீறி, ரஷ்யப் படைகள் 39 பாலிஸ்டிக் ஏவுகணைகள் மற்றும் 120க்கும் மேற்பட்ட ட்ரோன்களைக் கொண்டு இரவோடு இரவாகக் கடுமையான தாக்குதலை நடத்தியுள்ளன. கீவ் மற்றும் கார்கிவ் ஆகிய பிராந்தியங்களில் உள்ள மின்சாரம் மற்றும் தகவல் தொடர்பு நிலையங்களை இலக்காகக் கொண்டு இந்தத் தாக்குதல்கள் மேற்கொள்ளப்பட்டுள்ளன. நாட்டின் மின் அமைப்பில் உள்ள 26 இடங்களிலும், எண்ணெய் மற்றும் எரிவாயு சார்ந்த 4 மையங்களிலும் உபகரணங்கள் பலத்த சேதமடைந்துள்ளதாகக் கூறப்பட்டுள்ளது.
அமெரிக்க அதிபரின் போர் நிறுத்த அறிவிப்பை ரஷ்யா ஒரு பொருட்டாகக் கருதவில்லை என்பதை இந்தத் தாக்குதல் வெளிப்படுத்துவதாக அதிபர் செலென்ஸ்கி தனது ‘எக்ஸ்’ பக்கத்தில் விமர்சித்துள்ளார். அமெரிக்க அதிபர் வழங்கிய எச்சரிக்கைகளை மீறி ரஷ்யா செயல்பட்டுள்ளதால், அந்நாட்டின் மீது கடுமையான தடைகளை அமெரிக்கா விதிக்க வேண்டும் என அவர் கோரிக்கை விடுத்துள்ளார்.
மேலும், “வலிமை மூலம் மட்டுமே அமைதியைக் கொண்டுவர முடியும்” என்றும், ரஷ்யாவைத் தனியாக எதிர்கொள்ள உக்ரைனை விட்டுவிடக் கூடாது என்றும் அவர் வலியுறுத்தினார். தாக்குதலுக்கு உள்ளான மின் கட்டமைப்பு நிலையங்களில் மீட்புக் குழுவினரும் பொறியாளர்களும் சீரமைப்புப் பணிகளைத் தீவிரமாக மேற்கொண்டு வருகின்றனர்.
அமெரிக்கா மற்றும் சர்வதேச நட்பு நாடுகள் ரஷ்யாவிற்கு எதிராக எடுக்கவுள்ள அடுத்தகட்ட தடைகள் குறித்த நடவடிக்கைகள் தீவிரமாக எதிர்பார்க்கப்படுகின்றன.
