இந்திய-நேபாள எல்லையான உத்தரப் பிரதேசத்தின் மகாராஜ்கஞ்ச் மாவட்ட சோனாலி சோதனைச் சாவடி அருகே, தகுந்த ஆவணங்களின்றி நேபாளத்திற்குள் நுழைய முயன்ற ஜோர்டான் பிரவுன் (Jordan Brown) என்ற 36 வயது அமெரிக்கக் குடிமகன், சாஸ்திர சீமா பல் (SSB) பாதுகாப்புப் படையினரால் அதிரடியாகக் கைது செய்யப்பட்டுள்ளார். கலிபோர்னியாவைச் சேர்ந்த இவர், பாதுகாப்புப் படையினரைக் கண்டதும் தப்பியோட முயன்றபோது உள்ளூர் மக்களின் உதவியுடன் துரத்திப் பிடிக்கப்பட்டார். இவரிடம் நடத்தப்பட்ட முதற்கட்ட சோதனையில் பறிமுதல் செய்யப்பட்ட பொருட்கள், மத்திய உளவு அமைப்புகள் மற்றும் பாதுகாப்பு முகமைகளை அதிர்ச்சியில் ஆழ்த்தியுள்ளன.
கைது செய்யப்பட்ட அமெரிக்க நபரிடமிருந்து முறையான அமெரிக்க பாஸ்போர்ட் அல்லது அடையாள ஆவணங்கள் எதுவும் கண்டெடுக்கப்படவில்லை. மாறாக, அவரிடமிருந்து ஒரு சீன பாஸ்போர்ட் (Chinese Passport), வேண்டுமென்றே திட்டமிட்டு உடைக்கப்பட்ட இரண்டு மொபைல் போன்கள் (Damaged Mobile Phones), இந்திய மற்றும் நேபாள நாட்டு ரூபாய் நோட்டுகள், ஒரு டைரி மற்றும் ஒரு கைக்கடிகாரம் ஆகியவை பறிமுதல் செய்யப்பட்டுள்ளன. இவை தவிர, அதிநவீன செயற்கை நுண்ணறிவு தொழில்நுட்பத்துடன் கூடிய மொழிபெயர்ப்பு சாதனம் (AI-powered translation device) மற்றும் சில மதப் புத்தகங்களையும் போலீஸார் அவரிடமிருந்து கைப்பற்றியுள்ளனர்.
விசாரணையின் போது, தான் ஒரு முன்னாள் அமெரிக்க கடற்படை (US Navy) வீரர் என்று பிரவுன் மாற்றி மாற்றிப் பேசியது அதிகாரிகளுக்குப் பெரும் சந்தேகத்தை ஏற்படுத்தியுள்ளது. டூரிஸ்ட் விசா மூலம் தாய்லாந்து சென்றதாகவும், அங்கு தனது பாஸ்போர்ட்டைத் தொலைத்துவிட்டு கடல் வழியாக இலங்கைக்கும், பின்னர் அங்கிருந்து கடந்த நவம்பர் மாதம் கடல் வழியாகவே இந்தியாவிற்குள் நுழைந்து கோவாவில் வசித்து வந்ததாகவும் அவர் முன்னுக்குப் பின் முரணான வாக்குமூலங்களை அளித்துள்ளார். இதனால், அவரது வாக்குமூலங்களை முழுமையாக நம்பாத போலீஸார், அவர் இந்தியாவுக்குள் ஊடுருவிய பின்னணி குறித்து தீவிரமாக ஆராய்ந்து வருகின்றனர்.
தற்போது ஜோர்டான் பிரவுன் மீது வெளிநாட்டினர் சட்டத்தின் (Foreigners Act) கீழ் வழக்குப் பதிவு செய்யப்பட்டு நீதிமன்றக் காவலில் வைக்கப்பட்டுள்ளார். அவரிடம் பறிமுதல் செய்யப்பட்ட சீன பாஸ்போர்ட் உண்மையானதா அல்லது போலியானதா என்பது குறித்தும், உடைந்த மொபைல் போன்களை தடயவியல் சோதனைக்கு உட்படுத்தியும் போலீஸார் புலனாய்வு செய்து வருகின்றனர். இதுவரை நாட்டின் பாதுகாப்புக்கு எதிரான சந்தேகத்திற்குரிய நடவடிக்கைகள் எதுவும் கண்டறியப்படவில்லை என்றாலும், எல்லையில் சீன பாஸ்போர்ட் மற்றும் AI சாதனத்துடன் அமெரிக்கர் பிடிபட்ட விவகாரம் டெல்லி உயர் மட்ட வட்டாரங்களில் பெரும் பரபரப்பை ஏற்படுத்தியுள்ளது.
