அமெரிக்க அதிபராக இரண்டாவது முறை பதவியேற்று வழிநடத்தி வரும் டொனால்ட் டிரம்ப், வரும் ஜூன் 14-ஆம் தேதியுடன் தனது 80-வது பிறந்தநாளைக் கொண்டாட உள்ளார். அமெரிக்க வரலாற்றிலேயே மிக அதிக வயதில் அதிபர் பதவியேற்ற நபர் என்ற சாதனையைப் பெற்றுள்ள டிரம்பின் வயது மற்றும் உடல்நிலை குறித்து அண்மைக்காலமாகப் பல்வேறு விவாதங்களும் கேள்விகளும் எழுந்து வருகின்றன. இந்தச் சூழலில், தனது 80-வது பிறந்தநாளுக்கு இன்னும் சில நாட்களே உள்ள நிலையில், வாஷிங்டனுக்கு அருகில் உள்ள ‘வால்டர் ரீட்’ (Walter Reed) தேசிய ராணுவ மருத்துவமனைக்கு டிரம்ப் நேற்று காலை திடீரெனச் சென்று தனது வருடாந்திர மருத்துவப் பரிசோதனையை (Annual Physical Exam) மேற்கொண்டுள்ளார்.
கடந்த 13 மாதங்களில் அதிபர் டிரம்ப் வால்டர் ரீட் மருத்துவமனைக்குச் செல்லும் 3-வது முறை இது என்பதால், அமெரிக்க ஊடகங்கள் மற்றும் அரசியல் வட்டாரங்களில் அவரது ஆரோக்கியம் குறித்து பெரும் பரபரப்பு கிளம்பியுள்ளது. கடந்த சில கூட்டங்களின் போது அதிபர் டிரம்ப் அசதியுடன் தூங்குவது போலக் காணப்பட்டதும், அவரது வலது கையில் ஏற்பட்டிருந்த கன்றிப்போன தழும்புகளை மேக்கப் மூலம் மறைக்க முயன்ற புகைப்படங்களும் இந்தச் சந்தேகங்களை மேலும் வலுப்படுத்தின. மேலும், அவரது கழுத்துப் பகுதியில் ஏற்பட்டுள்ள சிவந்த தடிப்பு (Rash) குறித்தும் மக்கள் மத்தியில் தீவிர ஊகங்கள் பரவி வருகின்றன.
இந்த விமர்சனங்களுக்குப் பதிலளித்துள்ள வெள்ளை மாளிகை, அதிபர் டிரம்ப் முழுமையான ஒட்டுமொத்த ஆரோக்கியத்துடன் (Excellent Health) இருப்பதாகத் தெரிவித்துள்ளது. டிரம்பின் கைகளில் உள்ள தழும்புகள், அவரது இதய ஆரோக்கியத்திற்காகத் தினசரி எடுத்துக்கொள்ளும் ஆஸ்பிரின் (Aspirin) மாத்திரைகளின் பக்கவிளைவால் ஏற்பட்டவை என்றும், கழுத்துத் தடிப்பிற்குத் தற்காப்பு கிரீம்கள் பயன்படுத்தப்பட்டு வருவதாகவும் வெள்ளை மாளிகை மருத்துவர் கேப்டன் சீன் பார்பபெல்லா விளக்கம் அளித்துள்ளார். மேலும், கடந்த ஆண்டு அவருக்குக் கால்களில் ஏற்பட்ட வீக்கத்திற்காக நடத்தப்பட்ட பரிசோதனையில், அது ஆபத்தில்லாத ‘நாள்பட்ட நரம்புப் பற்றாக்குறை’ (Chronic Venous Insufficiency) குறைபாடுதான் என்பதும் உறுதி செய்யப்பட்டது.
தனது அரசியல் எதிரியான முன்னாள் அதிபர் ஜோ பைடனை “தூங்குமூஞ்சி” (Sleepy Joe) என விமர்சித்து, தான் அவரை விட உடல் ரீதியாகவும் மன ரீதியாகவும் அதிக சுறுசுறுப்புடன் இருப்பதாக டிரம்ப் எப்போதும் தேர்தல் பிரச்சாரங்களில் பெருமையாகக் கூறி வந்துள்ளார் . “நான் 50 ஆண்டுகளுக்கு முன்பு எப்படி உணர்ந்தேனோ அப்படியே இப்போதும் உணர்கிறேன்; ஒருவேளை துரித உணவுகள் (Junk Food) உடலுக்கு நல்லது என்று நினைக்கிறேன்” என டிரம்ப் அண்மையில் ஓவல் அலுவலகத்தில் நகைச்சுவையாகக் குறிப்பிட்டிருந்தார். மருத்துவப் பரிசோதனை முடிந்த சில மணி நேரங்களிலேயே வெள்ளை மாளிகை திரும்பிய அதிபர் டிரம்ப், ஈரான் போர் தொடர்பான மிக முக்கிய மூலோபாயக் கொள்கை கூட்டத்தை வழிநடத்தித் தனது சுறுசுறுப்பை மீண்டும் நிரூபித்துள்ளார்.
