தமிழ்நாடு சட்டப்பேரவையில் நடைபெறும் கூட்டத்தொடர்களின் போது, சபாநாயகர் இருக்கைக்கு அருகிலேயே பல மணி நேரம் தொடர்ந்து நின்றுகொண்டே பணியாற்றும் சட்டப்பேரவை ஊழியர் ஒருவருக்கு அமர்வதற்கு நாற்காலி வசதி செய்து தர வேண்டும் என்ற கோரிக்கை சமூக வலைத்தளங்களில் வைரலாகி வருகிறது. ஜனநாயகத்தின் அடையாளமாக விளங்கும் சட்டமன்றத்தில் பணியாற்றும் ஊழியர்களின் உடல்நலனையும் உழைப்பையும் கருத்தில் கொண்டு மனிதநேய அடிப்படையில் இக்கோரிக்கையை நிறைவேற்ற வேண்டும் என நெட்டிசன்கள் குரல் கொடுத்து வருகின்றனர்.
சட்டமன்ற நடவடிக்கைகள் தொடங்கி முடியும் வரை சபாநாயகருக்குத் தேவையான கோப்புகள், குறிப்புகள் மற்றும் ஆவணங்களை உடனுக்குடன் எடுத்து வழங்கி உதவி செய்யும் பொறுப்பில் அந்த ஊழியர் ஈடுபட்டு வருகிறார். பேரவையின் நீண்ட நேர விவாதங்கள் நடைபெறும் வேளையிலும் கூட, அவர் ஒரு நொடி கூட அமராமல் தொடர்ந்து நின்று கொண்டே பணியாற்றுவதைப் பார்க்கும் போது மிகுந்த சிரமமாக இருக்கிறது எனப் பொதுமக்கள் மற்றும் சமூக ஆர்வலர்கள் சுட்டிக்காட்டியுள்ளனர்.
இதுதொடர்பான புகைப்படங்களைச் சமூக வலைத்தளங்களில் பகிர்ந்து வரும் நெட்டிசன்கள், முதலமைச்சர் மற்றும் சபாநாயகரின் கவனத்திற்குச் செல்லும் வகையில் பதிவுகளைத் தட்டி விட்டு வருகின்றனர். “மக்களுக்கான சட்டங்களை இயற்றும் மன்றத்தில், அங்கு பணியாற்றும் கடைநிலை ஊழியரின் சிரமத்தைப் புரிந்துகொண்டு அவருக்குச் சிறிய இருக்கை வசதி அமைத்துத் தருவதுதான் உண்மையான மனிதநேயமாக இருக்கும்” என்று கருத்துப் பதிவிட்டு வருகின்றனர்.
காலங்காலமாகப் பின்பற்றப்பட்டு வரும் சட்டமன்ற விதிகளுக்கு உட்பட்டு, அந்த ஊழியரின் பணிக்கு எவ்வித இடையூறும் ஏற்படாத வகையில் ஒரு சிறிய நாற்காலி போட அரசு நடவடிக்கை எடுக்குமா என்பதே அனைவரின் எதிர்பார்ப்பாக உள்ளது. இணையத்தில் எழுந்துள்ள இந்த நெகிழ்ச்சியான கோரிக்கை, பேரவைச் செயலகம் மற்றும் அரசுத் தரப்பின் கவனத்தைப் பெற்றுள்ளது.
