உயிருள்ள செல்களில் இருந்து விசித்திரமான ஒளியொன்று வெளிப்படுவதை விஞ்ஞானிகள் சமீபத்தில்(Dec 2025) எலிகள் மூலம் கண்டறிந்துள்ளனர். இந்த ஒளியானது அந்த உயிரினம் உயிருடன் இருக்கும் வரை மட்டுமே வீசுகிறது என்பதும், அது இறந்த மறுநொடியே மறைந்து விடுகிறது என்பதும் ஆராய்ச்சியாளர்களை வியப்பில் ஆழ்த்தியுள்ளது.
பொதுவாக ஆன்மா அல்லது உடலைச் சுற்றியுள்ள 'ஒளிவட்டம்' (Aura) போன்ற அமானுஷ்யக் கருத்துக்களோடு இது ஒத்துப் போவதால், அறிவியல் உலகில் இது பெரும் விவாதத்தைக் கிளப்பியுள்ளது. 'பயோஃபோட்டான்கள்' (Biophotons) என்று அழைக்கப்படும் இந்த நுண்ணிய ஒளித் துகள்கள் குறித்த ஆர்வம் இந்த கண்டுபிடிப்புக்குப் பின் பன்மடங்கு அதிகரித்துள்ளது.
நமது உடலுக்குத் தேவையான ஆற்றலை வழங்கும் செல்களுக்குள் இருக்கும் 'மைட்டோகாண்ட்ரியா' (Mitochondria) போன்ற கட்டமைப்புகள் இந்த மிக மெல்லிய ஒளித் துகள்களை உருவாக்குகின்றன. இந்த ஒளியானது வெறும் கண்கள் மூலம் பார்க்க முடியாத அளவிற்கு மிக மிக பலவீனமானது.
பல ஆண்டுகளாகவே இது குறித்த ஆய்வுகள் நடந்து வந்தாலும், அகச்சிவப்பு கதிர்வீச்சு (Infrared radiation) போன்ற மற்ற ஒளி மூலங்களில் இருந்து இந்த 'பயோஃபோட்டான்களை' பிரித்தெடுத்துப் பார்ப்பது கடினமாக இருந்ததால், இது ஒரு சர்ச்சைக்குரிய துறையாகவே நீடித்தது. ஆனால் தற்போதைய புதிய தொழில்நுட்பங்கள் மூலம், இந்த ஒளி சிக்னல்கள் உண்மையானவை என நிரூபிக்கப்பட்டுள்ளது.
இந்தத் துகள்கள் வெறும் ஆற்றல் கழிவுகள் மட்டுமல்ல, செல்கள் தங்களுக்குள் தகவல்களைப் பரிமாறிக்கொள்ளப் பயன்படுத்தும் ஒரு ஊடகமாக இருக்கலாம் என்றும் விஞ்ஞானிகள் கருதுகின்றனர். அதாவது, ஒளி மூலமாகவே செல்கள் ஒன்றோடு ஒன்று பேசிக்கொள்கின்றன என்ற புதிய கோட்பாடு உருவாகியுள்ளது. உடலின் ஆரோக்கியம் சீர்குலையும் போது இந்த ஒளியின் அளவு மாறுபடுவதைக் கொண்டு, எதிர்காலத்தில் புற்றுநோய் போன்ற நோய்களை ஆரம்பத்திலேயே கண்டறியும் மருத்துவத் தொழில்நுட்பத்தை உருவாக்க முடியும் என ஆராய்ச்சியாளர்கள் நம்புகின்றனர்.