அமெரிக்க அதிபர் டொனால்ட் டிரம்ப் ஈரான் மீது "அர்மாடா" (Armada) எனப்படும் போர்க்கப்பல் படைகளை அனுப்பி மிரட்டி வரும் நிலையில், ஈரான் தனது நிலைப்பாட்டைத் தெளிவுபடுத்தியுள்ளது. இது குறித்து இஸ்தான்புல்லில் செய்தியாளர்களிடம் பேசிய ஈரானின் வெளியுறவுத்துறை அமைச்சர் அப்பாஸ் அராச்சி, "நாங்கள் ஒருபோதும் பேச்சுவார்த்தையை (Negotiations) விரும்பாதவர்கள் அல்ல; ஆனால் அது நீதியாகவும், சர்வதேச சட்டத்தின் அடிப்படையிலும் இருக்க வேண்டும். அமெரிக்காவின் கட்டளைகளுக்குப் பணிந்து நாங்கள் எதையும் செய்யத் தயாராக இல்லை" என்று ஆணித்தரமாகத் தெரிவித்தார்.
இந்தச் சந்திப்பின் போது, அமெரிக்கா முன்வைக்கும் முக்கிய நிபந்தனையான ஈரானின் ஏவுகணைத் திட்டம் (Missile Programme) குறித்தும் அராச்சி தனது கருத்தைப் பதிவு செய்தார். "எங்கள் நாட்டின் பாதுகாப்பு மற்றும் தற்காப்புக்கான மிக முக்கியமான ஆயுதம் ஏவுகணைகள். இதனை ஒருபோதும் பேச்சுவார்த்தைக்கு உட்படுத்த முடியாது (Non-negotiable). எங்கள் பாதுகாப்பைப் பணயம் வைத்து எந்த ஒப்பந்தத்தையும் நாங்கள் செய்யப் போவதில்லை" என்று அவர் திட்டவட்டமாகக் கூறினார். இதன் மூலம், ஏவுகணை விவகாரத்தில் அமெரிக்காவின் எந்தவொரு அழுத்தத்திற்கும் ஈரான் அடிபணியாது என்பதை அவர் உலக நாடுகளுக்கு உணர்த்தியுள்ளார்.
மறுபுறம், டொனால்ட் டிரம்ப் "ஈரானுடன் ஒரு ஒப்பந்தம் செய்ய விரும்புகிறேன்" என்று கூறிக்கொண்டே, மறுபுறம் ராணுவத் தாக்குதலுக்கான தயாரிப்புகளையும் மேற்கொண்டு வருகிறார். டிரம்பின் இந்த இரட்டை நிலைப்பாட்டை விமர்சித்துள்ள ஈரான், "மிரட்டலும் பேச்சுவார்த்தையும் ஒரே நேர்க்கோட்டில் பயணிக்க முடியாது. ஒருபுறம் போர்க்கப்பல்களை அனுப்பிவிட்டு, மறுபுறம் பேச்சுவார்த்தைக்கு அழைப்பது முரணானது" என்று சுட்டிக்காட்டியுள்ளது. துருக்கி, சவுதி அரேபியா போன்ற நாடுகள் இந்தப் பதற்றத்தைத் தணிக்க ராஜதந்திர ரீதியாக முயற்சி செய்து வருவதையும் ஈரான் வரவேற்றுள்ளது.
தற்போது ஈரானில் நிலவும் உள்நாட்டுப் போராட்டங்கள் மற்றும் கடந்த ஜூன் மாதம் நடந்த 12 நாள் போரின் பாதிப்புகளுக்குப் பிறகு, நாடு பலவீனமடைந்துள்ளதாக அமெரிக்கா கருதுகிறது. ஆனால், "அமெரிக்காவால் எங்களை ஒன்றும் செய்ய முடியாது" என ஈரான் தொடர்ந்து மார்தட்டி வருகிறது. போருக்கு 200 சதவீதம் தயாராக இருப்பதாகவும், அதே சமயம் நியாயமான பேச்சுவார்த்தைக்குக் கதவுகள் திறந்தே இருப்பதாகவும் ஈரான் கூறியிருப்பது, மத்திய கிழக்கு பிராந்தியத்தில் ஒரு "திக் திக்" சூழலை உருவாக்கியுள்ளது.