ரகசியத்தை உடைத்த 'லியோ' இயக்குனர்: 'ஜனநாயகன்' படத்தில் இத்தனை ஆச்சரியங்களா?

'தளபதி' படத்தில் லோகேஷ் கனகராஜ்! ரகசியத்தை உடைத்த 'லியோ' இயக்குனர்: 'ஜனநாயகன்' படத்தில் இத்தனை ஆச்சரியங்களா?

தமிழக வெற்றி கழகத்தின் தலைவரான நடிகர் விஜய்யின் நடிப்பில் உருவாகியுள்ள 'ஜனநாயகன்' திரைப்படம், தற்போது தமிழக அரசியலிலும் திரையுலகிலும் ஹாட் டாபிக்காக மாறியுள்ளது. எச். வினோத் இயக்கத்தில் உருவாகியுள்ள இந்தப் படம், முதலில் ஜனவரி 9-ம் தேதி வெளியாகும் என அறிவிக்கப்பட்டிருந்தது. ஆனால், படத்தின் அரசியல் வசனங்கள் மற்றும் காட்சிகள் காரணமாக தணிக்கை சான்றிதழ் பெறுவதில் சிக்கல் நீடிப்பதால், ரிலீஸ் தேதி தள்ளிப்போயுள்ளது ரசிகர்களிடையே பெரும் ஏமாற்றத்தை ஏற்படுத்தியுள்ளது.

இந்நிலையில், இந்தப் படத்தில் ஒரு சுவாரசியமான தகவல் தற்போது வெளியாகியுள்ளது. லோகேஷ் கனகராஜ் இயக்கத்தில் விஜய் நடித்த 'லியோ' திரைப்படம் மிகப்பெரிய வெற்றி பெற்றதைத் தொடர்ந்து, லோகேஷ் மற்றும் விஜய்யின் நட்பு திரையுலகில் அனைவரும் அறிந்தது. தற்போது விஜய்யின் 'ஜனநாயகன்' படத்திலும் லோகேஷ் கனகராஜ் ஒரு முக்கியப் பங்கு வகிப்பதாகத் தகவல்கள் வெளியாகின. இது வெறும் வதந்தியா அல்லது உண்மையா என்ற குழப்பம் நீடித்து வந்தது.

இந்தக் குழப்பங்களுக்கு இன்று முற்றுப்புள்ளி வைத்துள்ளார் இயக்குனர் லோகேஷ் கனகராஜ். செய்தியாளர்களைச் சந்தித்த அவரிடம் 'ஜனநாயகன்' படத்தில் நீங்கள் நடித்திருக்கிறீர்களா? என்று கேட்கப்பட்டது. அதற்குப் பதிலளித்த அவர், "விஜய் அண்ணாவும், வினோத் அண்ணாவும் என்னைச் சிறப்புத் தோற்றத்தில் (Cameo) நடிக்குமாறு அன்போடு கேட்டுக் கொண்டனர். அவர்களின் அழைப்பை ஏற்று நானும் அந்தப் படத்தில் நடித்துள்ளேன்" எனத் தனது பங்களிப்பை உறுதிப்படுத்தினார்.

இருப்பினும், தான் எந்த மாதிரியான கதாபாத்திரத்தில் நடித்துள்ளேன் என்பது குறித்து இப்போது விரிவாகச் சொல்ல முடியாது என லோகேஷ் மழுப்பலாகப் பதிலளித்துள்ளார். விஜய்யின் அரசியல் ஆக்ஷன் த்ரில்லராகக் கருதப்படும் இந்தப் படத்தில், லோகேஷ் கனகராஜ் ஒரு இயக்குனராகவே வருவாரா அல்லது கதையைத் திருப்பும் ஒரு முக்கியக் கதாபாத்திரத்தில் வருவாரா என்ற ஆர்வம் ரசிகர்களிடையே பன்மடங்கு அதிகரித்துள்ளது. லோகேஷ் கனகராஜ் ஏற்கனவே 'மாஸ்டர்' படத்தின் ஒரு காட்சியில் தலையை மட்டும் காட்டியிருப்பார் என்பது குறிப்பிடத்தக்கது.

'ஜனநாயகன்' திரைப்படம் விஜய்யின் திரையுலகப் பயணத்தின் மிக முக்கியமான மைல்கல்லாகப் பார்க்கப்படுகிறது. படத்தில் அரசியல் நெடி அதிகமாக இருப்பதால் தணிக்கைக் குழுவின் கெடுபிடிகள் இன்னும் குறையவில்லை. லோகேஷ் கனகராஜின் இந்த 'கேமியோ' உறுதிப்படுத்தல், படத்தின் மீதான எதிர்பார்ப்பை எகிற வைத்துள்ளது. விரைவில் தணிக்கை சிக்கல்கள் முடிந்து, அதிகாரப்பூர்வ ரிலீஸ் தேதி அறிவிக்கப்படும் என எதிர்பார்க்கப்படுகிறது.