தெஹ்ரானில் எண்ணெய் கிடங்குகள் மீது தாக்குதல்: நச்சு மழை எச்சரிக்கையால் மக்கள் அச்சம்

ஈரான் மற்றும் அமெரிக்கா-இஸ்ரேல் படைகளுக்கு இடையே நடைபெற்று வரும் போர் ஒன்பதாவது நாளை எட்டியுள்ள நிலையில், நேற்று இரவு தெஹ்ரான் மற்றும் அதைச் சுற்றியுள்ள பகுதிகளில் உள்ள முக்கிய எண்ணெய் கிடங்குகள் மீது அமெரிக்கா மற்றும் இஸ்ரேலியக் கூட்டுப் படைகள் தீவிர வான்வழித் தாக்குதல்களை நடத்தின. இந்தத் தாக்குதல்களால் ஏற்பட்ட பிரம்மாண்டமான தீப்பிழம்புகள் மற்றும் கரும்புகை தெஹ்ரானின் வானத்தை மறைத்து, நகரை இருளில் மூழ்கடித்துள்ளது. இந்தத் தாக்குதல்களில் நான்கு எண்ணெய் கிடங்குகள் மற்றும் பெட்ரோலியப் பொருட்கள் விநியோக மையம் சேதமடைந்துள்ளதாக ஈரான் அரசுத் தரப்பு உறுதிப்படுத்தியுள்ளது.

தாக்குதலைத் தொடர்ந்து, எரிபொருள் கிடங்குகளில் இருந்து வெளியேறிய நச்சுத்தன்மை வாய்ந்த ஹைட்ரோகார்பன், கந்தகம் மற்றும் நைட்ரஜன் ஆக்சைடு வாயுக்கள் வளிமண்டலத்தில் கலந்துள்ளன. இதனால், மழையுடன் வினைபுரிந்து நச்சுத்தன்மை கொண்ட 'அமில மழை' (Acid rain) பெய்ய வாய்ப்புள்ளதாக ஈரானிய ரெட் கிரசண்ட் (Red Crescent) அமைப்பு எச்சரித்துள்ளது. "இந்த மழை தோல் மற்றும் நுரையீரலுக்குக் கடுமையான பாதிப்புகளை ஏற்படுத்தக்கூடும்" என்று கூறியுள்ள அந்த அமைப்பு, மக்கள் வீட்டை விட்டு வெளியேற வேண்டாம் என்றும், ஏர் கண்டிஷனர்களை இயக்க வேண்டாம் என்றும் அறிவுறுத்தியுள்ளது. தெஹ்ரானின் முக்கிய வீதிகளில் கறுப்பு நிறத்திலான மழைத்துளிகள் விழுந்ததாக அங்கிருந்து வரும் செய்திகள் தெரிவிக்கின்றன.

இந்தச் சூழலில், அமெரிக்க ஜனாதிபதி டொனால்ட் ட்ரம்ப், ஈரானுக்கு எதிரான போரில் அமெரிக்கா மற்றும் இஸ்ரேல் தரப்பு பெரும் வெற்றியைப் பெற்றுள்ளதாகத் தெரிவித்துள்ளார். "ஈரானின் ஒட்டுமொத்த தீய சாம்ராஜ்யத்தையும் நாங்கள் சிதைத்துவிட்டோம்; நாங்கள் போரை வென்றுவிட்டோம்" என்று அவர் குறிப்பிட்டுள்ளார். எனினும், ஈரானியத் தரப்பில், போரை இன்னும் ஆறு மாதங்களுக்குத் தொடரும் வலிமை தங்களுக்கு இருப்பதாக ஐஆர்ஜிசி (IRGC) அமைப்பு எச்சரித்துள்ளது. இரு தரப்பினரும் தங்களின் இராணுவ நிலைப்பாடுகளில் உறுதியாக இருப்பதால், போரின் தாக்கம் தொடர்ந்து அதிகரித்து வருகிறது.

போரின் இந்த புதிய கட்டம், மத்திய கிழக்கு பிராந்தியத்தின் எரிசக்தி உள்கட்டமைப்பை இலக்காகக் கொண்டு நகர்வது சர்வதேச அளவில் பெரும் கவலையை ஏற்படுத்தியுள்ளது. வளைகுடா நாடுகளில் உள்ள விமான நிலையங்கள் மற்றும் எரிசக்தி விநியோக அமைப்புகள் மீது ஈரான் நடத்தி வரும் பதிலடித் தாக்குதல்களும் தொடர்கின்றன. அமைதிப் பேச்சுவார்த்தைகளுக்குச் சாத்தியக்கூறுகள் ஏதும் இல்லாத நிலையில், இந்த மோதல் உலகளாவிய பொருளாதாரத்தில் நீண்டகால பாதிப்புகளை ஏற்படுத்தும் என்று அரசியல் ஆய்வாளர்கள் அஞ்சுகின்றனர்.