சர்வதேச கடற்பரப்பில் அதிரடி: ரஷ்யாவின் 'நிழல் கப்பல்களை' பறிமுதல் செய்ய பிரிட்டன் அதிரடி சட்டம்! உலக வர்த்தகத்தில் புதிய பதற்றம்!
பிரிட்டிஷ் எல்லைக்குள் நுழையும் எந்தவொரு கப்பலும் ரஷ்யாவின் 'நிழல் கப்பற்படை' (Shadow Fleet) எனச் சந்தேகிக்கப்பட்டால், அதை ராணுவத்தைக் கொண்டு பறிமுதல் செய்ய தமக்கு சட்டப்பூர்வ அதிகாரம் உள்ளதாக பிரிட்டன் அரசு கருதுவதாக பிபிசி (BBC) செய்தி வெளியிட்டுள்ளது. மேற்கத்திய நாடுகளின் பொருளாதாரத் தடைகளை மீறி ரஷ்யா, ஈரான் மற்றும் வெனிசுலா போன்ற நாடுகள் மூன்றாம் தரப்புக் கப்பல்கள் மூலம் எண்ணெய் வர்த்தகத்தில் ஈடுபடுவதைத் தடுக்க லண்டன் இந்த அதிரடி முடிவை எடுத்துள்ளது. உலகின் பரபரப்பான கடல் வழித்தடமான 'ஆங்கிலக் கால்வாய்' (English Channel) வழியாகச் செல்லும் கப்பல்களையும் இந்தச் சட்டம் கட்டுப்படுத்தும் என்பது குறிப்பிடத்தக்கது.
பிரிட்டனின் 2018-ஆம் ஆண்டு 'பொருளாதாரத் தடைகள் மற்றும் பணமோசடி தடுப்புச் சட்டத்தின்' கீழ் இந்த நடவடிக்கைகள் எடுக்கப்பட உள்ளன. இச்சட்டத்தின்படி, லண்டனால் குறிவைக்கப்படும் குறிப்பிட்ட கப்பல்களைத் தனது கடல் எல்லைக்குள் நுழையவிடாமல் தடுக்கவோ அல்லது சிறைபிடிக்கவோ அரசுக்கு அதிகாரம் உண்டு. வெளிநாட்டு கடற்படைக் கப்பல்களைத் தவிர, மற்ற அனைத்து வர்த்தகக் கப்பல்களையும் இலக்கு வைக்க இந்தச் சட்டம் வழிவகை செய்கிறது. இருப்பினும், இத்தகைய நடவடிக்கைகளின் போது ராணுவ வலிமையைப் பயன்படுத்துவது குறித்த தெளிவான விளக்கங்கள் சட்டத்தில் இல்லை என்பது ஒரு விவாதப் பொருளாக மாறியுள்ளது.
கடந்த வாரம் ஸ்காட்லாந்துக்கு வடமேற்கே சர்வதேச கடற்பரப்பில் 'மரைனெரா' (Marinera) என்ற எண்ணெய் கப்பலை அமெரிக்கா பறிமுதல் செய்ததற்கு பிரிட்டன் பெரும் ஆதரவை வழங்கியது. இந்தக் கப்பலுக்கு ரஷ்யா தற்காலிகப் பயண அனுமதியை வழங்கியிருந்த நிலையில், இந்த நடவடிக்கை சர்வதேச விதிகளை மீறிய செயல் என மாஸ்கோ கடும் கண்டனம் தெரிவித்துள்ளது. உக்ரைன் போர் தொடங்கியதிலிருந்து இதுவரை 500-க்கும் மேற்பட்ட சந்தேகத்திற்குரிய 'நிழல் கப்பல்கள்' மீது பிரிட்டன் கட்டுப்பாடுகளை விதித்துள்ளது.
ஒருபுறம் கடுமையான பொருளாதாரத் தடைகளை விதித்தாலும், மறுபுறம் ரஷ்ய கச்சா எண்ணெயைச் சுத்திகரிக்கும் ஆலைகளிலிருந்து சுமார் 3 பில்லியன் பவுண்டுகள் மதிப்பிலான எரிபொருளைப் பிரிட்டன் இறக்குமதி செய்துள்ளதாக ஆய்வுகள் தெரிவிக்கின்றன. இது ரஷ்யாவிற்கு சுமார் 510 மில்லியன் பவுண்டுகள் வருவாயை ஈட்டித் தந்துள்ளது. இத்தகைய முரண்பட்ட சூழலில், தற்போது கப்பல்களைப் பறிமுதல் செய்ய பிரிட்டன் எடுத்துள்ள இந்த ராணுவ ரீதியான முடிவு, சர்வதேச கடல்சார் உறவுகளில் பெரும் கொந்தளிப்பை ஏற்படுத்தும் என எதிர்பார்க்கப்படுகிறது.