நேபாளத்தில் ஜென்-இசட் (Gen Z) போராட்டங்கள்: திட்டமிடப்பட்ட சதி என முன்னாள் பிரதமர் கே.பி. சர்மா குற்றச்சாட்டு
நேபாளத்தில் கடந்த 2025 செப்டம்பர் மாதம் நடைபெற்ற வன்முறைப் போராட்டங்கள் தற்செயலானவை அல்ல என்றும், அவை முறையாகத் திட்டமிடப்பட்ட ஒரு சதி என்றும் அந்நாட்டின் முன்னாள் பிரதமர் கே.பி. சர்மா ஒலி தெரிவித்துள்ளார். இந்தப் போராட்டங்களின் விளைவாக ஏற்பட்ட வன்முறையில் 77 பேர் உயிரிழந்தனர் மற்றும் 2,000-க்கும் மேற்பட்டோர் காயமடைந்தனர். இதன் காரணமாகவே தாம் பிரதமர் பதவியிலிருந்து விலக நேரிட்டதாக அளித்த பேட்டியில் அவர் குறிப்பிட்டுள்ளார். இப்போராட்டங்கள் நேபாளத்தின் ஜனநாயகத்தைத் தகர்க்கவும், மக்களை மீண்டும் வறுமைக்குத் தள்ளவும் நடத்தப்பட்ட தாக்குதல் என்று அவர் சாடியுள்ளார்.
இந்த எழுச்சி குறித்து அண்டை நாடுகளான இலங்கை மற்றும் வங்கதேசம் முன்கூட்டியே எச்சரித்ததாக சர்மா ஒலி வெளிப்படுத்தியுள்ளார். இலங்கையிலும் வங்கதேசத்திலும் முன்னதாக ஏற்பட்ட மக்கள் எழுச்சி போன்றே நேபாளத்திலும் ஆட்சி மாற்றத்திற்கான போராட்டங்கள் வெடிக்கக்கூடும் என அந்த நாட்டுத் தலைவர்கள் தன்னிடம் கூறியிருந்ததாக அவர் தெரிவித்தார். தெற்காசிய நாடுகளில் நிலவும் இத்தகைய அரசியல் மாற்றங்கள் ஒரு தொடர் சங்கிலி போலத் திட்டமிட்டு நடத்தப்படுவதாக அவர் தனது கவலையை வெளிப்படுத்தியுள்ளார்.
இந்தப் போராட்டங்களுக்குப் பின்னால் வெளிநாட்டு சக்திகளின் தலையீடு இருப்பதாகக் கூறப்படும் தகவல்கள் அதிரச்சியை ஏற்படுத்தியுள்ளன. குறிப்பாக, அமெரிக்க வெளியுறவுத்துறையின் நிதியுதவி பெறும் 'நேஷனல் எண்டோமென்ட் ஃபார் டெமாக்ரசி' (NED) என்ற அமைப்பு, நேபாள இளைஞர்களுக்குப் போராட்டங்களை நடத்துவதற்குப் பயிற்சி அளிக்கப் பெருமளவு பணம் செலவிட்டதாகக் கசிந்த ஆவணங்கள் தெரிவிக்கின்றன. இதே போன்ற அமைப்புகள் வங்கதேசம் மற்றும் உக்ரைன் போன்ற நாடுகளிலும் ஆட்சி மாற்ற நடவடிக்கைகளில் ஈடுபட்டதாகக் குற்றம் சாட்டப்பட்டுள்ளது குறிப்பிடத்தக்கது.
தற்போது நேபாளத்தில் முன்னாள் தலைமை நீதிபதி சுஷிலா கார்க்கி தலைமையில் இடைக்கால அரசு செயல்பட்டு வருகிறது. எதிர்வரும் மார்ச் மாதம் பொதுத்தேர்தல் நடத்தத் திட்டமிடப்பட்டிருந்தாலும், நாட்டில் நிலவும் தற்போதைய சூழல் தேர்தலுக்கு உகந்ததாக இல்லை என சர்மா கருத்து தெரிவித்துள்ளார். இப்போராட்டங்கள் மற்றும் ஆட்சி மாற்றம் நேபாளத்தின் ஸ்திரத்தன்மையைச் சிதைத்துள்ளதாக அரசியல் விமர்சகர்கள் கருதுகின்றனர்.