கிரிக்கெட் உலகில் 'பிக்ஸிங்' பூகம்பம்: பாகிஸ்தானை கதறவிட்ட வீரருக்கு ஐசிசி அதிரடி தடை! 14 நாட்களில் விளக்கமளிக்க கெடு!
2024 டி20 உலகக்கோப்பையில் தனது அதிரடி ஆட்டத்தால் ஒட்டுமொத்த கிரிக்கெட் உலகையும் திரும்பிப் பார்க்க வைத்தவர் அமெரிக்க அணியின் நட்சத்திர பேட்டர் ஆரோன் ஜோன்ஸ். குறிப்பாக பாகிஸ்தான் அணிக்கு எதிரான வரலாற்றுச் சிறப்புமிக்க வெற்றியில் முக்கியப் பங்காற்றிய இவர், தற்போது மேட்ச் பிக்ஸிங் புகாரில் சிக்கியுள்ளது ரசிகர்களிடையே பெரும் அதிர்ச்சியை ஏற்படுத்தியுள்ளது. கடந்த 2023-24 ஆம் ஆண்டு பார்படாஸில் நடைபெற்ற 'BIM10' லீக் தொடரில் இவர் சூதாட்ட நடவடிக்கைகளில் ஈடுபட்டதாகக் குற்றச்சாட்டுகள் எழுந்துள்ளன.
சர்வதேச கிரிக்கெட் கவுன்சில் (ICC) மற்றும் வெஸ்ட் இண்டீஸ் கிரிக்கெட் வாரியத்தின் (CWI) ஊழல் தடுப்பு விதிகளை 5 இடங்களில் ஆரோன் ஜோன்ஸ் மீறியுள்ளதாக ஐசிசி தெரிவித்துள்ளது. சூதாட்டத் தரகர்கள் தன்னை அணுகிய விவரத்தை அதிகாரிகளிடம் தெரிவிக்காமல் மறைத்தது, ஆட்டத்தின் முடிவை மாற்ற முயற்சித்தது மற்றும் ஊழல் தடுப்புப் பிரிவின் விசாரணைக்குச் சரியாக ஒத்துழைக்காமல் ஆதாரங்களை மறைக்க முயன்றது போன்றவை அவர் மீது சுமத்தப்பட்டுள்ள மிக முக்கியமான குற்றச்சாட்டுகள் ஆகும்.
இந்தக் கடுமையான விதிகளின் மீறல் காரணமாக, ஆரோன் ஜோன்ஸ் அனைத்து விதமான கிரிக்கெட் போட்டிகளிலும் பங்கேற்க ஐசிசி உடனடியாக இடைக்காலத் தடை விதித்துள்ளது. வரும் பிப்ரவரி 7-ஆம் தேதி தொடங்கவுள்ள 2026 டி20 உலகக்கோப்பைத் தொடருக்கான அமெரிக்கப் பயிற்சி முகாமில் அவர் இருந்த நிலையில், இந்த அதிரடித் தடை வந்துள்ளது. இதனால் அவர் தனது சொந்த மண்ணில் நடைபெறவுள்ள உலகக்கோப்பைத் தொடரில் பங்கேற்கும் வாய்ப்பை முற்றிலும் இழந்துள்ளார்.
ஐசிசி-யின் இந்த நடவடிக்கையைத் தொடர்ந்து, அவருக்கு 14 நாட்கள் அவகாசம் வழங்கப்பட்டுள்ளது. அதாவது, ஜனவரி 28, 2026 முதல் அடுத்த 14 நாட்களுக்குள் தன் மீது சுமத்தப்பட்டுள்ள குற்றச்சாட்டுகளுக்கு உரிய ஆதாரங்களுடன் அவர் விளக்கமளிக்க வேண்டும். அவர் அளிக்கும் விளக்கம் திருப்திகரமாக இல்லாவிட்டால் அல்லது குற்றச்சாட்டுகள் உறுதியானால், அவருக்குப் பல ஆண்டுகள் வரை கிரிக்கெட் விளையாட நிரந்தரத் தடை விதிக்கப்பட வாய்ப்புள்ளதாகக் கூறப்படுகிறது.
அமெரிக்க கிரிக்கெட்டின் முகமாகப் பார்க்கப்பட்ட ஒரு வீரர், இத்தகைய ஊழல் சர்ச்சையில் சிக்கியிருப்பது வளர்ந்து வரும் கிரிக்கெட் நாடுகளுக்கு ஒரு பின்னடைவாகக் கருதப்படுகிறது. "விளையாட்டின் தூய்மையைக் காக்க எந்த வீரராக இருந்தாலும் சமரசம் செய்ய மாட்டோம்" என்று ஐசிசி தனது அறிக்கையில் திட்டவட்டமாகத் தெரிவித்துள்ளது. இந்த விவகாரத்தில் மேலும் சில வீரர்களுக்குத் தொடர்பு இருக்கலாம் எனச் சந்தேகிக்கும் ஐசிசி, தனது விசாரணையைத் தீவிரப்படுத்தியுள்ளது.