சென்னை: தமிழகத்தில் 2026 சட்டமன்றத் தேர்தலுக்கான அரசியல் களம் இப்போதே சூடுபிடிக்கத் தொடங்கியுள்ளது. ஆளும் திமுக தனது கூட்டணியைப் பலப்படுத்தும் நோக்கில், மறைந்த நடிகர் விஜயகாந்தின் தேமுதிகவை (DMDK) தங்கள் பக்கம் இழுக்கத் தீவிர பேச்சுவார்த்தையில் ஈடுபட்டு வருகிறது. இந்நிலையில், தொகுதிப் பங்கீடு தொடர்பாக இரு கட்சிகளுக்கும் இடையே நிலவும் இழுபறி தமிழக அரசியலில் பெரும் விவாதத்தை ஏற்படுத்தியுள்ளது.
திமுகவின் 'சிங்கிள் டிஜிட்' ஆஃபர்: தேமுதிக பொதுச்செயலாளர் பிரேமலதா விஜயகாந்த், திமுக மேலிடத்துடன் ரகசியப் பேச்சுவார்த்தையில் ஈடுபட்டு வருவதாகத் தகவல்கள் தெரிவிக்கின்றன. இந்தப் பேச்சுவார்த்தையில், தேமுதிகவிற்கு ஒரு ராஜ்யசபா (Rajya Sabha) இடமும், 6 சட்டமன்றத் தொகுதிகளும் ஒதுக்க திமுக முன்வந்துள்ளதாகக் கூறப்படுகிறது. அதிகபட்சமாக 7 இடங்கள் வரை கொடுக்க திமுக தயாராக இருந்தாலும், அதற்கு மேல் ஒதுக்க வாய்ப்பில்லை என்று ஆளுங்கட்சி திட்டவட்டமாகத் தெரிவித்துள்ளதாக அறிவாலய வட்டாரங்கள் கூறுகின்றன.
தேமுதிகவின் அதிரடி டிமாண்ட்: ஆனால், திமுகவின் இந்த சலுகையை பிரேமலதா விஜயகாந்த் ஏற்க மறுத்து வருவதாகத் தெரிகிறது. குறைந்தபட்சம் 12 இடங்களாவது (இரட்டை இலக்க தொகுதிகள்) தங்களுக்கு வேண்டும் என்பதில் தேமுதிக உறுதியாக உள்ளது. விஜயகாந்த் இல்லாத முதல் சட்டமன்றத் தேர்தல் என்பதால், தங்கள் பலத்தை நிரூபிக்க அதிக தொகுதிகளில் போட்டியிட வேண்டியது அவசியம் என கட்சி நிர்வாகிகள் பிரேமலதாவிற்கு அழுத்தம் கொடுத்து வருகின்றனர். ஒரு ராஜ்யசபா சீட் உறுதியானாலும், 6 இடங்கள் என்பது மிகக் குறைவு என்பதே அவர்களின் வாதமாக உள்ளது.
கூட்டணி மாறுமா? அல்லது முடிவாகுமா? ஏற்கனவே அதிமுக-பஜக கூட்டணி இறுதி வடிவம் பெற்று வரும் நிலையில், தேமுதிக அதில் இணையாமல் தள்ளி இருந்தது. தற்போது திமுகவுடன் பேச்சுவார்த்தை நடத்தினாலும், தொகுதிப் பங்கீட்டில் உடன்பாடு ஏற்படாவிட்டால் தேமுதிகவின் அடுத்த கட்ட நகர்வு என்னவாக இருக்கும் என்ற கேள்வி எழுந்துள்ளது. "திமுக கூட்டணியில் இணைந்தால் மட்டுமே வெற்றி வாய்ப்பு பிரகாசமாக இருக்கும், எனவே ஒற்றை இலக்கத் தொகுதிகளை ஏற்றுக்கொள்வதே நல்லது" என திமுக தரப்பு தேமுதிகவை வலியுறுத்தி வருகிறது.