பஞ்ச் குட்டி குரங்கு பொம்மையுடன் இருக்கும் வீடியோக்கள் டிக்-டாக் (TikTok) மற்றும் இன்ஸ்டாகிராம் (Instagram) போன்ற சமூக வலைதளங்களில் வெளியானவுடன், உலகம் முழுவதும் லட்சக்கணக்கானோரால் பகிரப்பட்டு வைரலானது. மக்கள் இதனை மிகவும் நெகிழ்ச்சியுடன் பார்த்ததோடு, பஞ்ச் வைத்திருக்கும் அந்தப் பொம்மை எந்த நிறுவனத்துடையது என்று தேடத் தொடங்கினர். இது ஐக்கியா நிறுவனத்தின் 'ஜுங்கேல்ஸ்காக்' (DJUNGELSKOG) ஒராங்குட்டான் பொம்மை என்று தெரியவந்ததைத் தொடர்ந்து, அதன் விற்பனை பல நாடுகளில் மின்னல் வேகத்தில் அதிகரித்தது.
வளர்ந்து வரும் தேவை காரணமாக, அமெரிக்கா, ஜப்பான் மற்றும் தென் கொரியா போன்ற நாடுகளில் உள்ள ஐக்கியா கடைகளில் இந்தப் பொம்மை முற்றிலும் விற்றுத் தீர்ந்துவிட்டது. இதனைப் பயன்படுத்திக்கொண்ட சில மறுவிற்பனையாளர்கள் (Resellers), ஆன்லைன் வர்த்தகத் தளங்களில் இந்தப் பொம்மையின் விலையை பல மடங்கு உயர்த்தியுள்ளனர். சுமார் 1,600 ரூபாய் (20 டாலர்) மட்டுமே விலை கொண்ட இந்தப் பொம்மை, தற்போது இணையத்தில் சுமார் 32,000 ரூபாய் (350 டாலர்) வரை விற்பனை செய்யப்படுகிறது.
பொம்மையின் விலை உயர்ந்தாலும், மக்களின் ஆர்வம் குறையவில்லை. பொம்மையுடன் விளையாடும் பஞ்ச் குட்டி குரங்கைக் காண இச்சிகாவா சிட்டி மிருகக்காட்சிசாலையில் தினமும் ஆயிரக்கணக்கான மக்கள் நீண்ட வரிசையில் காத்து நிற்கின்றனர். மக்களின் இந்த பாசத்தைப் பார்த்து நெகிழ்ந்த ஐக்கியா நிறுவனம், பஞ்ச் குரங்கிற்குப் பதிலாக புதிய பொம்மைகளை மிருகக்காட்சிசாலைக்கு நன்கொடையாக வழங்கியுள்ளது. இது வெறும் பொம்மை விற்பனை அல்ல, ஒரு விலங்கின் அன்பிற்குக் கிடைத்த அங்கீகாரம் என சமூக ஆர்வலர்கள் கருத்து தெரிவிக்கின்றனர்.