இந்த ஆறு கிரகங்களில் வியாழன், சுக்கிரன் மற்றும் சனி ஆகியவற்றை வெறும் கண்களால் எளிதாகக் காண முடியும். குறிப்பாக, வியாழன் கிரகம் மிகவும் பிரகாசமாகத் தெரியும். புதன் கிரகம் சற்று மங்கலாகத் தெரிவதால், அதைத் தெளிவாகக் காணப் பைனாகுலர் (Binoculars) உதவக்கூடும். அதேசமயம், தொலைதூரக் கிரகங்களான யுரேனஸ் மற்றும் நெப்டியூனைப் பார்ப்பதற்கு நிச்சயம் சிறிய ரகத் தொலைநோக்கி தேவைப்படும். சூரிய அஸ்தமனத்திற்குப் பிறகு சுமார் 30 முதல் 60 நிமிடங்கள் வரை இந்த கிரகங்கள் மேற்கு திசை வானில் அணிவகுத்துத் தோன்றும்.
பிரிட்டனில் இங்கிலாந்து மற்றும் வேல்ஸ் பகுதிகளில் சனிக்கிழமை இரவு வானம் மேகமூட்டமின்றித் தெளிவாக இருக்கும் என எதிர்பார்க்கப்படுவதால், அங்கிருப்பவர்களுக்குப் பார்க்கும் வாய்ப்பு அதிகம். இருப்பினும், ஸ்காட்லாந்து மற்றும் வடக்கு அயர்லாந்து பகுதிகளில் மேகமூட்டம் இருக்கக்கூடும் என்பதால் ஞாயிற்றுக்கிழமை மாலை அவர்களுக்குச் சிறந்த நேரமாக அமையும். நகர விளக்குகளின் ஒளி மாசு (Light pollution) இல்லாத திறந்தவெளிகள் அல்லது உயரமான இடங்களைத் தேர்ந்தெடுப்பது இந்த அற்புத நிகழ்வை ரசிக்கச் சிறந்த வழியாகும்.
வானியல் ரீதியாகப் பல கிரகங்கள் ஒரே நேரத்தில் பூமிக்கு நேராகத் தோன்றுவது அரிதான நிகழ்வாகும். அனைத்து கிரகங்களும் சூரியனை வெவ்வேறு வேகத்தில் சுற்றி வருவதால், அவை எப்போதாவது ஒருமுறை மட்டுமே இவ்வாறு ஒரே திசையில் வரிசை கட்டுகின்றன. இதற்கு முன்னதாக 2025-ல் ஏழு கிரகங்கள் அணிவகுத்தன. மீண்டும் இதுபோன்ற ஆறு கிரகங்களின் அணிவகுப்பு வரும் ஆகஸ்ட் 12, 2026 அன்று அதிகாலை வேளையில் நிகழ வாய்ப்புள்ளதாக நாசா (NASA) தெரிவித்துள்ளது.