கடந்த பிப்ரவரி 23-ம் தேதி நள்ளிரவு 1:30 மணியளவில் தபாஸ் ஹில் டெரஸ் பகுதியில் உள்ள இரண்டு அடுக்கு குடியிருப்பில் இந்தத் தீ விபத்து ஏற்பட்டது. தகவல் அறிந்து சம்பவ இடத்திற்கு விரைந்த 40-க்கும் மேற்பட்ட தீயணைப்பு வீரர்கள் சுமார் ஒரு மணி நேரத்திற்கும் மேலாகப் போராடி தீயைக் கட்டுக்குள் கொண்டு வந்தனர். இருப்பினும், வீட்டின் தரைத்தளம் மற்றும் முதல் தளத்தில் புகை வேகமாகப் பரவியதால், காந்தி அபிஷேக் மூச்சுத்திணறி சம்பவ இடத்திலேயே உயிரிழந்தார்.
மற்றொரு மாணவரான சாய் ஸ்ரீகர் படுகாயங்களுடன் மீட்கப்பட்டு குரோய்டன் பல்கலைக்கழக மருத்துவமனையில் அனுமதிக்கப்பட்டார். அங்கு அவருக்குத் தீவிர சிகிச்சை அளிக்கப்பட்ட போதிலும், பிப்ரவரி 27-ம் தேதி அவர் மூளைச்சாவு அடைந்ததாக மருத்துவர்கள் அறிவித்தனர். தனது மகனை இழந்த துயரத்திலும், சாய் ஸ்ரீகரின் பெற்றோர் அவனது உடல் உறுப்புகளைத் தானம் செய்ய முன்வந்தனர். இதன் மூலம் மற்றவர்களின் வாழ்வில் ஒளி ஏற்ற அவர் முடிவு செய்திருப்பது அனைவரையும் நெகிழ வைத்துள்ளது.
உயிரிழந்த மாணவர்களின் உடல்களை இந்தியா கொண்டு வரத் தேவையான நடவடிக்கைகளை லண்டனில் உள்ள இந்தியத் தூதரகம் மேற்கொண்டு வருகிறது. விபத்து நடந்த நேரத்தில் அவர்களுடன் இருந்த மற்றுமொரு மாணவர் காயங்களுடன் தப்பியுள்ளார். விபத்திற்கான காரணம் குறித்து லண்டன் பெருநகர காவல்துறையும் தீயணைப்புத் துறையும் இணைந்து விசாரணை நடத்தி வருகின்றன. முதற்கட்ட ஆய்வில் இதில் மர்மமான பின்னணி எதுவும் இல்லை என்று கூறப்பட்டுள்ளது.