முடிவைத் தீர்மானிப்பது நாங்களே - ட்ரம்பின் கருத்துக்கு ஈரானிய புரட்சிகர காவல்படை பதிலடி

ஈரான் மீதான அமெரிக்க-இஸ்ரேலிய இராணுவ நடவடிக்கைகள் "கிட்டத்தட்ட நிறைவடைந்துவிட்டன" (Very complete) என்றும், போர் விரைவில் முடிவுக்கு வரும் என்றும் அமெரிக்க ஜனாதிபதி டொனால்ட் ட்ரம்ப் தெரிவித்திருந்த கருத்தை ஈரானின் இஸ்லாமிய புரட்சிகர காவல்படை (IRGC) திட்டவட்டமாக நிராகரித்துள்ளது. "இந்த போரின் முடிவைத் தீர்மானிப்பது வாஷிங்டன் அல்ல, நாங்களே" என்று ஐஆர்ஜிசி (IRGC) இன்று விடுத்துள்ள அறிக்கையில் தெரிவித்துள்ளது. ஈரானின் இராணுவ வலிமை 10 சதவீதமாகக் குறைந்துவிட்டதாக ட்ரம்ப் கூறியதை "முட்டாள்தனமானது" என்று வர்ணித்துள்ள ஈரான், பிராந்தியத்தின் எதிர்கால சமன்பாடுகள் தங்கள் கைகளிலேயே இருப்பதாக எச்சரித்துள்ளது.

அமெரிக்கா மற்றும் இஸ்ரேலின் தாக்குதல்கள் தொடரும் பட்சத்தில், வளைகுடா பிராந்தியத்திலிருந்து "ஒரு சொட்டு எண்ணெய்" கூட வெளியேற அனுமதிக்க மாட்டோம் என்று ஈரான் புதிய எச்சரிக்கை விடுத்துள்ளது. ஹோர்முஸ் ஜலசந்தி வழியாக நடைபெறும் சர்வதேச எண்ணெய் விநியோகத்தை முழுமையாக முடக்கும் வலிமை தங்களுக்கு இருப்பதாகக் கூறியுள்ள ஈரானியத் தளபதிகள், பிராந்திய பாதுகாப்பு என்பது அனைவருக்கும் பொதுவானது அல்லது எவருக்கும் கிடையாது என்ற நிலையை உருவாக்குவோம் என்று தெரிவித்துள்ளனர். இந்த மிரட்டலைத் தொடர்ந்து, சர்வதேச எரிசக்தி சந்தையில் மீண்டும் ஒரு பதற்றமான சூழல் உருவாகியுள்ளது.

அமெரிக்காவிற்கு ஈரான் எண்ணெய் ஏற்றுமதி செய்வதாக எழுந்துள்ள சில தகவல்களையும் ஈரானிய அதிகாரிகள் மறுத்துள்ளனர். அமெரிக்கா போன்ற "எதிரி நாடுகளுக்கு" தங்களின் இயற்கை வளங்களை ஒருபோதும் வழங்கப்போவதில்லை என்றும், தற்போதைய சூழலில் எந்தவொரு பேச்சுவார்த்தைக்கும் இடமில்லை என்றும் ஈரான் வெளியுறவுத்துறை அமைச்சகம் தெளிவுபடுத்தியுள்ளது. ஈரானின் புதிய உச்ச தலைவராக மொஜ்தபா கமேனி பொறுப்பேற்றுள்ள நிலையில், அந்நாட்டின் பாதுகாப்பு மற்றும் வெளியுறவுக் கொள்கைகளில் இன்னும் தீவிரமான போக்கையே கடைப்பிடிக்கப் போவதாக அரசியல் பார்வையாளர்கள் கருதுகின்றனர்.

இதற்கிடையில், ஈரான் எண்ணெய் விநியோகத்தைத் தடுத்தால், இதுவரை நடத்தியதை விட 20 மடங்கு கடுமையான தாக்குதல்களை அமெரிக்கா நடத்தும் என்று ட்ரம்ப் சமூக வலைதளத்தில் எச்சரித்துள்ளார். ஈரானின் மின் உற்பத்தி நிலையங்கள் உள்ளிட்ட முக்கிய இலக்குகளைத் தாக்கத் தயாராக இருப்பதாகவும் அவர் குறிப்பிட்டுள்ளார். இரு நாடுகளுக்கும் இடையே இராஜதந்திர ரீதியான பேச்சுவார்த்தைகள் முடங்கியுள்ள நிலையில், இரு தரப்பும் விடுத்து வரும் இத்தகைய நேரடி எச்சரிக்கைகள் மத்திய கிழக்கு பிராந்தியத்தில் போரின் தீவிரம் குறையப்போவதில்லை என்பதையே காட்டுகின்றன.