அமெரிக்கா மற்றும் இஸ்ரேலை எதிர்கொள்ள ஈரான் வகுத்துள்ள புதிய வியூகம்!

அமெரிக்கா மற்றும் இஸ்ரேலுக்கு எதிராக ஒரு நீண்டகாலப் போரை எதிர்கொள்வதற்காக, ஈரான் தனது இராணுவக் கட்டமைப்பில் மிகப்பெரிய மாற்றங்களைச் செய்துள்ளது. "மொசைக் பாதுகாப்பு" (Mosaic Defence) என்று அழைக்கப்படும் இந்த வியூகம், மையப்படுத்தப்பட்ட கட்டளை அமைப்பைத் தவிர்த்து, நாட்டை பல தன்னாட்சி பெற்ற பிராந்திய அடுக்குகளாகப் பிரிப்பதாகும். இதனால், தலைநகர் அல்லது முக்கிய இராணுவத் தளங்கள் மீதான தாக்குதல்களால் ஈரானின் கட்டளை அமைப்பு முடங்காது. போரின் முடிவைத் தீர்மானிப்பது ஒரு குறிப்பிட்ட அதிகார மையம் அல்ல, மாறாக நாடு முழுவதும் பரவியுள்ள தன்னாட்சி பெற்ற சிறிய பிரிவுகளின் கூட்டுச் செயல்பாடே ஆகும் என்று ஈரானிய இராணுவ ஆய்வாளர்கள் குறிப்பிடுகின்றனர்.

இந்த வியூகத்தின் மிக முக்கியமான அங்கமாக, ஈரானின் உச்ச தலைவர்கள் அல்லது முக்கிய தளபதிகள் கொல்லப்பட்டாலும், ஆட்சி மற்றும் போர் நடவடிக்கை தொடர்வதை உறுதி செய்யும் "நான்காவது வாரிசு" (Fourth Successor) எனப்படும் ஒரு தானியங்கி அதிகாரப் பகிர்வு முறை உருவாக்கப்பட்டுள்ளது. சத்தாம் ஹுசைனின் ஆட்சி வீழ்ச்சி மற்றும் அமெரிக்காவின் வளைகுடா பிராந்திய ஆதிக்கத்தைக் கூர்ந்து கவனித்த ஈரான், தனது அதிகாரத்தை பரவலாக்குவதன் மூலம் மட்டுமே ஒரு நீண்டகாலப் போரைத் தாங்கிப் பிடிக்க முடியும் என்பதைக் கண்டறிந்துள்ளது. இந்த முறை, எதிரி நாடுகள் ஈரானின் இராணுவ வலிமையை ஒரே அடியில் செயலிழக்கச் செய்வதைத் தடுக்கிறது.

அமெரிக்க ஜனாதிபதி டொனால்ட் ட்ரம்ப், ஈரானின் இராணுவ வலிமை குறைந்துவிட்டதாக அறிவித்தாலும், ஈரான் தற்போது ஒரு தற்காப்புப் போரையே (War of Attrition) முன்னெடுத்து வருகிறது. இதன் நோக்கம், போரைத் தாக்குதல்களின் எண்ணிக்கையால் அளவிடாமல், பொறுமையின் சோதனையாக (Test of endurance) மாற்றுவதாகும். ஈரான், ஹோர்முஸ் ஜலசந்தியில் எண்ணெய் விநியோகத்தைத் தடுத்து, அதன் மூலம் சர்வதேச சந்தையில் எரிசக்தி விலையை உயர்த்தி, அமெரிக்காவின் நட்பு நாடுகளின் மீது பொருளாதார அழுத்தத்தைக் கொடுக்கும் வியூகத்தைக் கையாண்டு வருகிறது.

ஈரானின் புதிய உச்ச தலைவராக மொஜ்தபா கமேனி நியமிக்கப்பட்ட பிறகு, இந்த நீண்டகாலப் போர் வியூகம் இன்னும் தீவிரப்படுத்தப்பட்டுள்ளது. இராஜதந்திரப் பேச்சுவார்த்தைகளுக்கு வாய்ப்பில்லை என்று வெளிப்படையாக அறிவித்துள்ள ஈரான், பொருளாதார நெருக்கடியால் பிற நாடுகள் தலையிட்டு அமெரிக்காவைத் தடுத்து நிறுத்த வேண்டிய சூழலை உருவாக்க முயல்கிறது. தற்போதைய சூழலில், அமெரிக்கா மற்றும் இஸ்ரேலின் இராணுவ மேலாதிக்கத்திற்கு எதிராக நேரடி மோதலைத் தவிர்த்து, நீண்டகாலப் பொருளாதார மற்றும் இராணுவ அழுத்தங்களை உருவாக்குவதே ஈரானின் முதன்மை இலக்காக உள்ளது.